រាជធានីភ្នំពេញ ៖ បន្ទាប់ពីមានកិច្ចប្រជុំដ៏ធំមួយរវាងសហព័ន្ធកីឡាជាតិទាំងអស់ជាមួយក្រសួងអប់រំ យុវជន និងកីឡា នៅភោជនីយដ្ឋាននទន្លេបាសាក់២ កាលពីពេលថ្មីៗកន្លងមកនេះ ហើយក្រសួងអប់រំ យុវជន និងកីឡាបានព្រមានខ្លាំងៗចំពោះសហព័ន្ធកីឡាជាតិមួយចំនួនថាមិនបានគ្រប់គ្រងកីឡាករថ្នាលឱ្យបានល្អ ចេញចូលស្រេចតែចិត្ត ចាយលុយរដ្ឋខុសទិសដៅនោះ ពេលនេះសហព័ន្ធកីឡាជាតិដែលទទួលការព្រមាននោះប្រកាសថានឹងលែងទុកមុខដល់កីឡាករ កីឡាការិនី ឪពុកម្ដាយឬអាណាព្យាបាលដែលមិនគោរពកិច្ចសន្យាទៀតហើយ។
ជាក់ស្ដែង សហព័ន្ធកីឡាប្រដាល់សកលកម្ពុជា កំពុងតែមានប្រតិកម្មយ៉ាងខ្លាំងជាមួយ កីឡាករត្រកូលអេ៣រូបគឺអេព្រីយ៉ានុត, អេ អាំម៉ារីនភូថង និងអេ វីរៈខាំឈីតភូថង (ម៉ឺន មេឃា) ដែលបានចាកចេញទៅហ្វឹកហាត់ជាមួយក្លិបដទៃដោយគ្មានការអនុញ្ញាត ។ ក្នុងនោះមានកីឡាការិនី អេព្រី យ៉ានុត ស្ថិតក្នុង
ក្រុមជម្រើសជាតិឈុតធំ កីឡាករ អេ វីរៈខាំឈីតភូថង និងកីឡាករ អេ អាំម៉ារីនភូថង ស្ថិតក្នុងក្រុមជម្រើសតិឈុតថ្នាលទាំងពីរនាក់។
លោកវេជ្ជបណ្ឌិត ឆឹង យ៉ៅយ៉េន ប្រធានសហព័ន្ធកីឡាប្រដាល់សកលកម្ពុជា បានព្រមានថា ចំពោះកីឡាករត្រកូលអេទាំង៣រូបចាប់ពីពេលនេះទៅលោកលែងមានមនោសញ្ចេតនាទៀតហើយ ។ លោកនឹងលេងធម៌ក្ដៅតែម្ដង ចំពោះកីឡាករដែលមិនគិតពីប្រយោជន៍ជាតិគិតតែពីប្រយោជន៍ផ្ទាល់ខ្លួន ចាកចេញដោយគ្មានការអនុញ្ញាតបំពានកិច្ចសន្យា ។
លោកថា គ្រប់កីឡាករថ្នាលទាំងអស់ដែលមកប្រមូលផ្ដុំហ្វឹកហាត់សុទ្ធតែមានការព្រមព្រៀងគ្នា ចុះកិច្ចសន្យាត្រឹមត្រូវរវាងអាណាព្យាបាលជាមួយសហព័ន្ធ ដើម្បីទទួលបានប្រាក់ឧបត្ថម្ភប្រចាំថ្ងៃពីក្រសួងអប់រំ យុវជន និងកីឡា ក្នុង១ថ្ងៃជាង៤ម៉ឺនរៀល ដើម្បីត្រៀមប្រកួតកីឡាស៊ីហ្គេម ឆ្នាំ២០២៣ ។ កីឡាករ អេ វីរៈខាំឈីតភូថង និងកីឡាករ អេ អាំម៉ារីនភូថង ដែលជាកីឡាករថ្នាលទាំងពីរនាក់នេះ មានឈ្មោះនៅក្នុងបញ្ជីប្រមូលផ្ដុំរយៈពេល២ឆ្នាំមកហើយ ចំណែកកីឡាការិនី អេព្រី យ៉ានុត ដែលស្ថិតនៅក្នុងឈុតធំក៏ត្រូវមានវិធានការដែរ។
លោកបានឱ្យដឹងទៀតថា រដូវកាលប្រមូលផ្ដុំក្រុមកីឡាជម្រើសជាតិទាំងឈុតធំនិងឈុតថ្នាលឆ្នាំ២០១៩ ចាប់ផ្ដើមពីថ្ងៃទី១ ខែមីនា ខាងមុខនេះហើយ ។ ដូច្នេះលោកនឹងប្រើធម៌ក្ដៅចាត់ការទៅលើអ្នកដែលមិនគោរពច្បាប់ មិនគោរពកិច្ចសន្យា ។ លោកបានត្រៀមធ្វើរបាយការណ៍ផ្ញើជូនទៅក្រសួងអប់រំ យុវជន និងកីឡា ដើម្បីឱ្យក្រសួងចាត់ការតាមផ្លូវច្បាប់ ។
ចំណាត់ការតាមផ្លូវច្បាប់នោះគឺតម្រូវឱ្យពួកគេសងប្រាក់ឧបត្ថម្ភដែលបានបើកយកទៅចាយរយៈពេល២ឆ្នាំនោះមកវិញ ឬយ៉ាងណានៅមិនទាន់ដឹងទេ ទុកឱ្យក្រសួងជាអ្នកសម្រេចចុះ ។ ប៉ុន្តែនៅក្នុងកិច្ចសន្យាដែលបានចុះជាមួយសហព័ន្ធគឺបានចែងច្បាស់ថា ត្រូវតែសង ព្រោះគេខំចិញ្ចឹម២ឆ្នាំមកហើយបែរជារត់ចោលទៅវិញ។ លោកថា គោលការណ៍កីឡាករថ្នាល ត្រូវទទួលការបណ្ដុះបណ្ដាលដែលមានរយៈពេលវែងតាមផែនការបានកំណត់ មិនមែនចេញចូលតាមតែចិត្តនឹកឃើញនោះទេ គឺជាផែនការហ្វឹកហាត់សម្រាប់ការប្រកួតកីឡាស៊ីហ្គេមឆ្នាំ២០២៣។
ពាក់ព័ន្ធនឹងបញ្ហានេះ លោក អេ ភូថងដែលត្រូវជាឪពុកកីឡាករ-កីឡាការិនីត្រកូលអេ បានឱ្យដឹងដែរថា តាមពិតកិច្ចសន្យាហ្វឹកហាត់មានសុពលភាពត្រឹមតែអំឡុងពេលប្រមូលផ្ដុំហ្វឹកហាត់ប៉ុណ្ណោះ បានន័យថាមានដំណាក់កាលរបស់វា ។ ពេលនេះលោកបានសុំឱ្យកូនរបស់លោកឈប់ហ្វឹកហាត់ប្រដាល់ហើយដូច្នេះគ្មានអ្វីដែលត្រូវនិយាយទៀតទេ ទោះលោកចង់ឱ្យកូនៗទៅហ្វឹកហាត់នៅសហព័ន្ធណាក៏បានដែរ៕
ចែករំលែកព័តមាននេះ