ប្រទេសវេណេស៊ុយអេឡា ៖ ប្រធានគណៈកម្មការកិច្ចការបរទេសរបស់សភាអាមេរិក អ្នកប្រជាធិបតេយ្យលោកELIOT ENGEL សន្យាកាលពីថ្ងៃទី១៣កុម្ភៈថា សភានឹងពុំផ្ដល់ការយល់ព្រមដល់អន្តរាគមន៍យោធាមួយ របស់សហរដ្ឋអាមេរិក នៅវេណេស៊ុយអេឡាឡើយ ទោះបីលោកដូណាល់ត្រាំលើកពីរឿងនោះក្ដី។
ថ្លែងទៅកាន់សារព័ត៌មាន ពេលបើកកិច្ចប្រជុំមួយពិវិបត្តិនៅវេណេស៊ុយអេឡា លោកENGELអះអាងថា ខ្ញុំមានការបារម្ភចំពោះពាក្យពេចន៍សង្គ្រាមរបស់ប្រធានាធិបតី ពេលលោកនិយាយថា អន្តរាគមន៍យោធាអាមេរិកមួយពុំបដិសេធឡើយ។ ខ្ញុំសូមបញ្ជាក់ប្រាប់ទៅពួកអ្នក ដែលចង់បានសង្គ្រាមថា អន្តរាគមន៍យោថារបស់អាមេរិកត្រូវបដិសេធ។
សមាជិកសភាគណបក្សប្រជាធិបតេយ្យរូបនោះ សម្ដែងការបារម្ភម្យ៉ាងទៀត លើបណ្ដាផលវិបាកនៃទណ្ឌកម្ម ដែលក្រុងវ៉ាស៊ិនតោនបានដាក់ ប្រឆាំងក្រុមហ៊ុនប្រេងកាតរដ្ឋវេណេស៊ុយអេឡាPDVSA ដើម្បីគាបប្រធានាធិបតីលោកនីកូឡាស់ម៉ាឌូរ៉ូ កុំឲ្យទទួលបានប្រភពចំណូលសំខាន់ថា វាអាចផ្ដល់ផលវិបាកកាន់តែគ្រោះថ្នាក់ ដល់ប្រជាជនវេណេស៊ុយអេឡា ប្រសិនបើលោកម៉ាឌូរ៉ូពុំព្រមចាកចេញពីតំណែង ក្នុងបណ្ដាសប្ដាហ៍ខាងមុខ។
ចំណែកមេដឹកនាំប្រឆាំងលោកJUAN GUAIDO ប្រកាសនាថ្ងៃទី១៤កុម្ភៈពីការតែងតាំងថ្នាក់ដឹកនាំថ្មី របស់ក្រុមហ៊ុនCITGO ជាសាខារបស់ក្រុមហ៊ុនPDVSA ក្នុងការប៉ុនប៉ងបន្ថែមការរាំងខ្ទប់សេដ្ឋកិច្ចប្រឆាំងរដ្ឋាភិបាលលោកម៉ាឌូរ៉ូ។
ម្យ៉ាងទៀតចាប់ពីថ្ងៃទី២៨មេសាទៅ សហរដ្ឋអាមេរិកបង្កើនការគាបសង្កត់ថែមទៀតលើការនាំចេញប្រេងកាត វេណេស៊ុយអេឡាទៅកាន់ទីផ្សារអាមេរិក។ ក្រុងការ៉ាកាស់វាយតម្លៃថាការខូចខាតខាងសេដ្ឋកិច្ច បណ្ដាលមកពីការហ៊ុមព័ទ្ធរបស់អាមេរិក មានដល់៣០ពាន់លានដុល្លារ។
អាមេរិកពេលនេះបានផ្ដល់ជំនួយមនុស្សធម៌ដល់វេណេស៊ុយអេឡា តែជំនួយនោះជាប់គាំងនៅព្រំដែនជាមួយកូឡុំប៊ី ដោយកងយោធាវេណេស៊ុយអេឡារាំងខ្ទប់ផ្លូវ។ លោកម៉ាឌូរ៉ូហៅជំនួយទាំងនេះថា ជាការចាប់ផ្ដើមអន្តរាគមន៍យោធាអាមេរិក៕
ចែករំលែកព័តមាននេះ