ខេត្តកំពង់ស្ពឺ ៖ ស្ត្រីជាកម្មការិនីម្នាក់ដែលទៅចូលរួមមង្គលការកូនអ្នកភូមិត្រូវបុរសចំណាស់ម្នាក់ដែលគេស្គាល់ថាជាគ្រូបង្រៀនចាប់ឱបថើបកណ្តាលចំណោមមនុស្សយ៉ាងច្រើន រហូតស្ត្រីរងគ្រោះស្រែកយំទើបប្តីរបស់ខ្លួនដឹង ហើយដាក់ពាក្យបណ្តឹងឲ្យនគរបាលប៉ុស្តិ៍ឃុំទឹកល្អក់ ឃាត់ខ្លួនពីបទបៀតបៀនកេរ្តិ៍ខ្មាស់។
បើតាមមន្ត្រីនគរបាលស្រុកគងពិសីបានអោយដឹងថា ករណីគ្រូបង្រៀនផឹកស្រាស្រវឹងចាប់ឱបថើបប្រពន្ធគេ ផ្អើលពេញរោងការនេះ បង្កភ្ញាក់ផ្អើលឡើងកាលពីវេលាម៉ោង៨និង៤០នាទីយប់ ថ្ងៃទី១០ ខែកុម្ភៈ ២០១៩ កន្លងទៅ នៅក្នុងភូមិបឹងងោង ឃុំទឹកល្អក់ ស្រុកគងពិសី ខេត្តកំពង់ស្ពឺ ហើយត្រូវបានបញ្ចប់រឿងដោយសំណងនៅស្នងការនគរបាលខេត្តនៅល្ងាចថ្ងៃទី១៣ កុម្ភៈ២០១៩។
ប្រភពពីសមត្ថកិច្ចបាននិយាយឲ្យដឹងថា ស្ត្រីរងគ្រោះមានប្តីនិងកូនហើយ រស់នៅក្នុងភូមិ ឃុំខាងលើ អាយុជាង៣០ឆ្នាំ មុខរបរកម្មការិនីរោងចក្រ (មកនៅខាងប្តី) មានស្រុកកំណើតនៅ ស្រុកស្អាង ខេត្តកណ្តាល ។ ចំណែកជនសង្ស័យបៀតបៀនកេរ្តិ៍ខ្មាស់ ដែលនគរបាលឃាត់មាន ឈ្មោះសឿន សារ៉ាត់ អាយុ៥១ឆ្នាំ ជាគ្រូបង្រៀននៅវិទ្យាល័យបិតាឯករាជ្យ មានប្រពន្ធកូនរួចទៅហើយ រស់នៅក្នុងភូមិបឹងងោង ឃុំទឹកល្អក់ ស្រុកគងពិសី ខេត្តកំពង់ស្ពឺ ។
តាមរបាយការណ៍មន្ត្រីនគរបាលប៉ុស្តិ៍បញ្ជាក់ថា នៅមុនពេលកើតហេតុគឺមានកម្មវិធី ការកូនអ្នកភូមិឈ្មោះ សៅ អាយុជាង៥០ឆ្នាំ នៅក្នុងភូមិជាមួយគ្នា ពេលនោះលោកគ្រូបានចូលរួមកម្មវិធីនោះដែរ ហើយស្ត្រីខាងលើក៏បានចូលរួមផងដែរ ។ លោកគ្រូបង្រៀនខាងលើផឹកស្រាស្រវឹងស្រាប់តែមកចាប់ស្ត្រីខាងលើឱបថើបញក់ញី ធ្វើឲ្យភ្ញៀវមានការភ្ញាក់ផ្អើលពេញរោងការតែម្តង ។
ពេលនោះប្តីរបស់ស្ត្រីរងគ្រោះក៏នៅក្នុងកម្មវិធីនោះដែរ ពេលឮប្រពន្ធរៀបរាប់ពីដំណើររឿងនោះរួចហើយក៏យល់ថាជាអ្នកជិតខាងបានទៅសួរនាំ ស្រាប់តែលោកគ្រូបង្រៀននោះនិយាយថា ប្តឹងដល់ណាប្តឹងទៅ គេមិនខ្លាចញញើតឡើយ បើទោះបីយ៉ាងណាក៏ដោយ ហើយបន្ទាប់ពីកើតហេតុភ្លាមៗសាច់ញាតិ និងប្តីស្ត្រីរងគ្រោះបានដាក់ពាក្យប្តឹងទាមទារជំងឺចិត្តដែលលោកគ្រូបង្រៀនធ្លាប់តែអប់រំគេបែរជាធ្វើទង្វើមិនគប្បីដាក់ស្ត្រីភេទបែបនេះនោះ ទើបនគរបាលកសាងសំណុំរឿងបញ្ជូនមកកាន់ស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្ត ។
ក្រោយឃាត់ខ្លួនមក លោកគ្រូនិយាយថា ស្រវឹងឃើញជនរងគ្រោះស្លៀកពាក់ខ្លីអត់ថើបស្តាយ ក៏ចាប់ថើប ថើបអស់ប៉ុន្មាន? ស្រាប់តែនៅព្រឹកថ្ងៃទី១៣ ខែកុម្ភៈ ឆ្នាំ២០១៩ គេបានឃើញប្រពន្ធរបស់លោកគ្រូបង្រៀន និងប្អូនស្រីសាច់ញាតិជាច្រើនរត់ខ្វែងដៃខ្វែងជើងដើម្បីរត់ការសម្របសម្រួលជាមួយម្តាយក្មេកស្ត្រីរងគ្រោះដកពាក្យបណ្តឹង សងជំងឺចិត្ត៤លានរៀល និងនិយាយជាមួយនគរបាលជំនាញការិយាល័យជួញដូរមនុស្ស និងការពារអនិតិជននៃស្នងការដ្ឋាននគរបាលខេត្តកំពង់ស្ពឺ ដោះលែងលោកគ្រូខាងលើឲ្យមានសេរីភាពវិញ ក្រៅប្រពន្ធ័តុលាការមិនដឹងថា អស់លុយប៉ុន្មាននោះទេ ៕
ចែករំលែកព័តមាននេះ