ប្រទេសអីុរ៉ង់ ៖ សមាជិកកងកម្លាំងឆ្មាំបដិវត្តន៍អីុរ៉ង់២៧នាក់ស្លាប់ កាលពីថ្ងៃទី១៣កុម្ភៈ ក្នុងការវាយប្រហារអត្តឃាតមួយ ប្រឆាំងរថយន្តបឺសរបស់ពួកគេ ពេលជិះវិលត្រឡប់មកពីល្បាតនៅតាមព្រំដែន។ នោះជាការវាយប្រហារយ៉ាងបង្ហូរឈាមប្រឆាំងកងកម្លាំងពិសេសអីុរ៉ង់។
ទីភ្នាក់ងារព័ត៌មានផ្លូវការអីុរ៉ង់IRNA បញ្ជាក់ថា ការវាយប្រហារប្រើរថយន្តផ្ទុកគ្រឿងផ្ទុះនោះ កើតមានតាមផ្លូវថ្នល់រវាងមូលដ្នានKHASH និងZAHEDAN ក្នុងខេត្តSISTAN BALOUCHISTAN ភាគអាគ្នេយ៍ប្រទេស។ ក្នុងសេចក្ដីប្រកាសមួយកងឆ្មាំបដិវត្តន៍អះអាងថា មានការវាយប្រហារអត្តឃាតមួយប្រឆាំងរថយន្តបឺស ដែលដឹកបណ្ដាសមាជិកកងកម្លាំងពិសេសមកពីព្រំដែនជាមួយប៉ាគីស្ថាន។
រថយន្តផ្ទុកគ្រឿងផ្ទុះមួយ បានផ្ទុះនៅជិតរថយន្តបឺសដែលដឹកសមាជិក កងឯកភាពជើងគោកមួយនៃកងឆ្មាំបដិវត្តន៍។ ក្នុងការវាយប្រហារភេរវកម្មនេះ យុទ្ធជនដ៏អង់អាចក្លាហានរបស់អ៊ិស្លាម២៧នាក់បានត្រូវស្លាប់ ហើយ១៣នាក់ទៀតរងរបួស។ សេចក្ដីប្រកាសបានចោទប្រកាន់ពួកភ្នាក់ងារសើុបការណ៍ របស់អ្នកក្ដោបពិភពលោកនិងពួកស្យូនីស្ត ដែលជួយទ្រទ្រង់ដល់ពួកភេរវករ។
ក្រុមជីហាដJAICH AL ADL(កងទ័ពនៃយុត្តិធម៌) ចាត់ទុកជាអង្គការភេរវកម្មដោយក្រុងតេហេរ៉ង់ បានប្រកាសទទួលខុសត្រូវចំពោះការវាយប្រហារនោះ។
នៅជាប់ព្រំដែនប៉ាគីស្ថាននិងអាហ្វហ្គានីស្ថាន ខេត្តSISTAN BALOUCHISTAN ក្លាយជាទីលាននៃការប៉ះទង្គិចបង្ហូរឈាមគ្នាជារឿយៗ រវាងកងកម្លាំងសន្តិសុខអីុរ៉ង់និងពួកបំបែកខ្លួននិយមបាលូតជីស្ថាន ឬបណ្ដាក្រុមជីហាដ។ ខេត្តនោះមានសហគមន៍អ៊ិស្លាមស៊ុននីតភាគច្រើន ក្នុងប្រទេសដែលមានពួកស៊ីអីុតភាគច្រើនបំផុត។
ក្រុងតេហេរ៉ង់ចោទប្រកាន់អាមេរិក អីុស្រាអែលព្រមទាំងអារ៉ាប៊ីសាអូឌីតថា ជួយទ្រទ្រង់ដល់បណ្ដាក្រុមបំបែកខ្លួននិយម។ អីុស្រាអែលនិងសហរដ្ឋអាមេរិក ជាសត្រូវរបស់អីុរ៉ង់ខណៈអារ៉ាប៊ីសាអូឌីត ស៊ុននីតជាគូប្រជែងសំខាន់របស់អីុរ៉ង់ស៊ីអីុតនៅមជ្ឈឹមបូព៌ា។
ការវាយប្រហារភេរវកម្មនោះកើតមានចំថ្ងៃដែល នៅទីក្រុងវ៉ាសូវីមានរៀបចំធ្វើសន្និសីទមួយ ក្រោមការជម្រុញរបស់មេរិក ដែលមានទិសដៅធ្វើការគាបសង្កត់លើអីុរ៉ង់។ សន្និសីទនោះត្រូវបានក្រុងតេហេរ៉ង់ចាត់ទុកជាល្បែងស្ពិនភ្នែកមួយ៕
ចែករំលែកព័តមាននេះ