ត្រៀមស្តុកទឹកទុកប្រើឱ្យហើយ ខេត្តប៉ៃលិនចាប់ផ្តើមខ្វះទឹកប្រើជាបណ្តើរៗហើយ
- ប៉ៃលិន
ខេត្តប៉ៃលិន ៖ កាលពីរសៀលថ្ងៃទី១៣ ខែកុម្ភៈ ឆ្នាំ២០១៩ លោក ង៉ា លីហុង ប្រធានមន្ទីរធនធានទឹក និងឧត្តុនិយមខេត្តប៉ៃលិនបានលើកឡើងថា…
ខេត្តប៉ៃលិន ៖ កាលពីរសៀលថ្ងៃទី១៣ ខែកុម្ភៈ ឆ្នាំ២០១៩ លោក ង៉ា លីហុង ប្រធានមន្ទីរធនធានទឹក និងឧត្តុនិយមខេត្តប៉ៃលិនបានលើកឡើងថា…
ខេត្តប៉ៃលិន ៖ កាលពីរសៀលថ្ងៃទី១៣ ខែកុម្ភៈ ឆ្នាំ២០១៩ លោក ង៉ា លីហុង ប្រធានមន្ទីរធនធានទឹក និងឧត្តុនិយមខេត្តប៉ៃលិនបានលើកឡើងថា ចាប់ពីពេលនេះតទៅតំបន់មួយចំនួនក្នុងខេត្តប៉ៃលិនចាប់ផ្តើមខ្វះខាតទឹកប្រើប្រាស់ជាបណ្តើរៗ និងអាចប្រឈមច្រើនជាងនេះ ។ ប៉ុន្តែរយៈពេលប៉ុន្មានថ្ងៃនេះ ឯកឧត្តមរដ្ឋមន្ត្រី និងលោកអភិបាលខេត្តបានបញ្ជាឲ្យមន្ទីរជំនាញ ចុះមើលជាប្រចាំលើបញ្ហានេះផងដែរ ។
លោក ង៉ា លីហុង ប្រធានមន្ទីរធនធានទឹក និងឧត្តុនិយមខេត្តបន្តថា មកដល់ពេលនេះភូមិមួយចំនួនចាប់ផ្តើមអស់ទឹកជាបណ្តើរៗហើយ ប៉ុន្តែយើងបានត្រៀមផែនការជាច្រើនដើម្បីចុះជួយសង្គ្រោះដល់ប្រជាពលរដ្ឋទាំងនោះ ដូច្នេះសរុបទៅនៅក្នុងឆ្នាំ២០១៩នេះខេត្តប៉ៃលិន អាចប្រឈមនឹងការខ្វះខាតទឹកប្រើប្រាស់ ហើយយ៉ាងយូរបំផុតគឺចាប់ពីមួយឬពីរសប្តាហ៍ទៅមុខទៀតនេះ ។
ប៉ុន្តែនៅពេលនេះតំបន់មួយចំនួននៅតាមជើងភ្នំកំពុងខ្វះខាតហើយដោយពួកគាត់មិនទាន់ចោទជាបញ្ហានៅឡើយទេ ព្រោះកន្លងមកនៅទីនោះក៏ធ្លាប់ជួបបញ្ហាបែបនេះដែរ តែខាងមន្ទីរអាចជួយដោះស្រាយបានទាន់ពេល ។
លោកប្រធានបានបញ្ជាក់ថា អាជ្ញាធរពាក់ព័ន្ធត្រៀមនឹងចុះជួយប្រជាពលរដ្ឋជាបណ្តើរៗក្នុងនោះខាងមន្ទីរបានចុះពិនិត្យទឹកក្នុងប្រព័ន្ធធារាសាស្ត្រទាំង២កន្លែងរបស់ខេត្ត គឺប្រព័ន្ធធារាសាស្ត្រថ្នល់បត់ និងប្រព័ន្ធធារាសាស្ត្រអូរដូនតា ដោយចុះពិនិត្យទីតាំងដើម្បីត្រៀមផ្តល់នូវសំបកបាវជូនដល់ប្រជាកសិករ ក្នុងការទប់ទឹកតាមដងស្ទឹង និងអូរដើម្បីរក្សាទុកប្រើប្រាស់ជាបណ្តោះអាសន្ន ហើយបានចុះពិនិត្យទីតាំងមួយចំនួនសម្រាប់ត្រៀមគ្រឿងចក្រចុះជីកតាមជ្រលងដងអូរដែលអាចមានប្រភពទឹកជ្រាបចេញដើម្បីយកទឹកជូនបងប្អូនប្រជាពលរដ្ឋប្រើប្រាស់ និងចុះពិនិត្យទីតាំងត្រៀមដាក់ម៉ាស៊ីនបូមទឹកដើម្បីអន្តរាគមន៍បូមទឹកជូនប្រជាកសិករផងដែរ ។
សូមបញ្ជាក់ផងដែរថា តាមសារាចរណែនាំរបស់រាជរដ្ឋាភិបាល និងតាមការព្យាករណ៍របស់ក្រសួងធនធានទឹក និងឧត្តុនិយមក្នុងរដូវប្រាំងនាឆ្នាំ២០១៩នេះប្រទេសកម្ពុជាយើងនឹងទទួលរងគ្រោះដោយប្រយោលពីឥទ្ធិពលបាតុភូត El Nino ដែលធ្វើឲ្យខេត្តមួយចំនួនប្រឈមនឹងការខ្វះខាតទឹកប្រើប្រាស់ក្នុងនោះខេត្តប៉ៃលិនក៏អាចជួបនូវបញ្ហាទាំងនេះផងដែរ ៕
ចែករំលែកព័តមាននេះ