ខេត្តប៉ៃលិន ៖ បុរសម្នាក់រងរបួសជើងឆ្វេងធ្ងន់ធ្ងរត្រូវបានសាច់ញាតិបញ្ជូនទៅសង្គ្រោះនៅមន្ទីរពេទ្យបង្អែកខេត្ត ខណៈបើកបរម៉ូតូសុខៗស្រាប់តែមានរថយន្តបាឡែន១គ្រឿង បើកបញ្ច្រាសទិសគ្នាជ្រុលចង្កូតបុកពេញទំហឹងរងរបួសតែម្តង ដែលហេតុការណ៍នេះបានកើតឡើងកាលពីវេលាម៉ោង១១និង៣០នាទីព្រឹក ថ្ងៃទី១៤ ខែកុម្ភៈ ឆ្នាំ២០១៩ នៅចំណុចអូរកម្មករ ស្ថិតក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីលោក រី តារា អធិការនគរបាលស្រុកសាលាក្រៅបានឱ្យដឹងថា ជនរងគ្រោះមានឈ្មោះ សៅ សារិម អាយុ៣៥ឆ្នាំ មានទីលំនៅក្នុងភូមិអូរតាពុកក្រោម សង្កាត់ទទួលល្វា ក្រុងប៉ៃលិន ដោយបើកបរម៉ូតូម៉ាកហុងដាឌ្រីម (Honda Dream C125) ស៊េរីឆ្នាំ២០១៤ ពណ៌ខ្មៅ ពាក់ស្លាកលេខបាត់ដំបង 1O – 4225 រងរបួសជើងឆ្វេងធ្ងន់ធ្ងរ ។
ចំណែកជនបង្កឈ្មោះ ហួរ ណារុង ភេទប្រុស អាយុ២៨ឆ្នាំ មានទីលំនៅក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ដោយបើករថយន្តម៉ាកកាមរីបាឡែន (Camry) ពណ៌ត្រីឆ្លូញ ពាក់ស្លាកលេខ ភ្នំពេញ 2U-3165 គ្មានរបួស ។ ប្រភពបញ្ជាក់ថា មូលហេតុដែលបណ្ដាលឱ្យមានករណីគ្រោះថ្នាក់ចរាចរណ៍នេះមកពីកត្តាមនុស្សបើកបររថយន្តក្នុងស្ថានភាពហួសល្បឿនកំណត់ និងប្រើប្រាស់ទូរស័ព្ទដៃពេលកំពុងបើកបររថយន្ត ។
ពាក់ព័ន្ធនឹងបញ្ហានេះបច្ចុប្បន្នជនរងគ្រោះត្រូវបានសាច់ញាតិដឹកបញ្ជូនទៅមន្ទីរសង្គ្រោះនៅពេទ្យបង្អែកខេត្ត រីឯវត្ថុតាងត្រូវបាននគរបាលយកទៅរក្សារទុកនៅអធិការដ្ឋាននគរស្រុកសាលាក្រៅ ដើម្បីរង់ចាំធ្វើការដោះស្រាយតាមផ្លូវច្បាប់ ៕
ចែករំលែកព័តមាននេះ