ខេត្តសៀមរាប ៖ រថយន្តកែច្នៃពណ៌ទឹកសមុទ្រ១គ្រឿង គ្មានផ្លាកលេខ បើកបរក្នុងល្បឿនលឿនពីត្បួងបត់ទៅលិចមកដល់ចំណុចកើតហេតុបម្រុងឆ្លងផ្លូវក៏ជ្រុលទៅបុកម៉ូតូយុវជនជិះម្នាក់ឯងតាមដងផ្លូវជាតិលេខ៦ ក្នុងទិសដៅពីលិចទៅកើត (ផ្លូវត្រង់) បណ្តាលឱ្យស្លាប់ភ្លាមៗនៅហ្នឹងកន្លែងកើតហេតុ ។
ចំណែកអ្នកបើករថយន្តកែច្នៃឃើញសភាពការមិនស្រួលក៏ទុករថយន្តចោលចុះរត់គេចខ្លួនបន្សល់ទុកវត្ថុតាងនៅហ្នឹងកន្លែង បង្កឱ្យមានការកកស្ទះចរាចរណ៍មួយសន្ទុះផងដែរ ។ ហេតុការគ្រោះថ្នាក់ចរាចរណ៍នោះបានកើតឡើងនាថ្ងៃទី១២ ខែកុម្ភៈ ឆ្នាំ២០១៩ នៅវេលាម៉ោង០៧និង១០នាទីយប់ ស្ថិតក្នុងភូមិកកោះ ឃុំគោកធ្លកក្រោម ស្រុកជីក្រែង ខេត្តសៀមរាប តាមបណ្តោយលើផ្លូវជាតិលេខ៦ ។
លោកវរសេនីយ៏ឯក សុខ សុទ្ធាវុធ អធិការនគរបាលស្រុកជីក្រែងបានឱ្យដឹងថា ករណីគ្រោះថ្នាក់ចរាចរណ៍នេះបានកើតឡើងរវាងរថយន្តកែច្នៃពណ៌ទឹកសមុទ្រអ្នកបើកបរដោយមិនស្គាល់អត្តសញ្ញាណបានរត់គេចខ្លួនបាត់ ហើយរថយន្តកែច្នៃនោះបើកបរមកពីទិសដៅពីត្បួងបត់ទៅលិចដើម្បីឆ្លងថ្នល់ដល់ចំណុចកើតហេតុក៏ជ្រុលទៅបុកម៉ូតូម៉ាកហុងដាឌ្រីម C125 ពណ៌ខ្មៅ ស៊េរីឆ្នាំ២០១៦ ពាក់ផ្លាកលេខ សៀមរាប 1W-3983 បើកបរម៉ូតូដោយឈ្មោះ ខុន ភីរិទ្ធ ភេទប្រុស អាយុ១៩ឆ្នាំ មានទីលំនៅភូមិប្រាសាទ ឃុំកំពង់ក្តី ស្រុកជីក្រែង ខេត្តសៀមរាប ក្នុងទិសដៅពីលិចទៅកើតបណ្តាលឱ្យអ្នកម៉ូតូ ស្លាប់ភ្លាមៗនៅហ្នឹងកន្លែងកើតហេតុ ហើយម្ចាស់រថយន្តកែច្នៃបានចុះរត់គេចខ្លួនបាត់មុនពេលសមត្ថកិច្ចទៅដល់បន្សល់ទុកតែវត្ថុតាងនៅកន្លែងកើតហេតុប៉ុណ្ណោះ ។
ក្រោយពេលកើតហេតុកម្លាំងជំនាញចុះដល់កន្លែងកើតហេតុធ្វើការពិនិត្យ ហើយវាស់វែងដើម្បីយកវត្ថុតាងទាំង២គ្រឿងចេញពីកន្លែងកើតហេតុកុំឱ្យកកស្ទះចរាចរណ៍ផងដែរ ។ មូលហេតុករណីគ្រោះថ្នាក់ ចរាចរណ៍នេះបង្កឡើងដោយរថយន្តកែច្នៃបើកបរឆ្លងកាត់ខ្វះការប្រយ័ត្ន។
លោកបានបញ្ជាក់ទៀតថា សពជនរងគ្រោះត្រូវបានកម្លាំងជំនាញធ្វើការប្រគល់ឱ្យទៅក្រុមគ្រួសារយកទៅធ្វើបុណ្យតាមប្រពៃណី ។ ចំណែកវត្ថុតាងរថយន្តកែច្នៃ និងម៉ូតូត្រូវកម្លាំងនគរបាលជំនាញបានយកទៅរក្សាទុកនៅអធិការដ្ឋាននគរបាលស្រុកដើម្បីបំពេញបែបបទចាត់ការទៅតាមនីតិវិធីច្បាប់បន្ត ។
រីឯអ្នកបើកបរគោយន្តកែច្នៃក្រោយពេលបុកអ្នកម៉ូតូហើយឃើញសភាពការណ៍មិនស្រួលក៏ចុះរត់គេចខ្លួនបាត់ បន្សល់ទុកតែរថយន្តកែច្នៃនៅហ្នឹងកន្លែងកើតហេតុ ។ បច្ចុប្បន្នសមត្ថកិច្ចកំពុងស្រាវជ្រាវបន្ត ដើម្បីចាប់យកមកផ្តន្ទាទោសទៅតាមផ្លូវច្បាប់ផងដែរ ៕
ចែករំលែកព័តមាននេះ