រាជធានីភ្នំពេញ ៖ រាជរដ្ឋាភិបាលកំពុងតែពិចារណាចំពោះគម្រោងសាងសង់វារីអគ្គិសនីមួយទៀតនៅខេត្តក្រចេះ ដើម្បីលើកកម្ពស់សន្តិសុខថាមពលក្នុងស្រុកឆ្លើយតបទៅនឹងតម្រូវការប្រើប្រាស់ថាមពលអគ្គិសនីរបស់ប្រជាពលរដ្ឋ ។
លោក វ៉ិចទ័រ ហ្សូណា អ្នកនាំពាក្យក្រសួងរ៉ែ និងថាមពលបានឲ្យដឹងថា គម្រោងអភិវឌ្ឍន៍វារីអគ្គិសនីនៅស្រុកសំបូរខេត្តក្រចេះ កំពុងស្ថិតក្នុងជំហាននៃការសិក្សានៅឡើយដោយទាមទារពេលវេលាច្រើនឆ្នាំទៅមុខទៀតដោយសារវាស្ថិតនៅក្នុងទន្លេមេគង្គ ។
លោកបានបញ្ជាក់ថា គម្រោងសិក្សាវារីអគ្គិសនីសំបូរនេះមានជម្រើសជាច្រើន គឺមានជម្រើស២៦០០គីឡូវ៉ាត់ ១៧០០គីឡូវ៉ាត់ ហើយជម្រើសមួយទៀត៤៦០មេកាវ៉ាត់ ដែលសិក្សាដោយគណៈកម្មាធិការជាតិទន្លេមេគ្គង ។
ការអភិវឌ្ឍន៍វារីអគ្គិសនីមួយនេះអាចធ្វើឡើងនៅក្រោយឆ្នាំ២០២៥ ដោយត្រូវការសិក្សាលម្អិត ជាពិសេសថ្លៃសេដ្ឋកិច្ច និងផលប៉ះពាល់ទៅលើប្រជាពលរដ្ឋទាំងផ្នែកបរិស្ថានសង្គម និងបរស្ថានធម្មជាតិ។
លោក ឳម សាវាទ នាយកសម្ព័ន្ធភាពដើម្បីអភិរក្សធនធានជលផលបានបញ្ជាក់ថា ការមិន អភិវឌ្ឍន៍គម្រោងវារីអគ្គិសនីសំបូរកាត់ដងទន្លេមេគង្គនេះគឺជាជម្រើសដ៏ល្អ ដែលមិនធ្វើឲ្យប៉ះពាល់ដល់ចរន្តទឹក ធនធានមច្ឆាជាតិ និងជីវភាពរស់នៅរបស់ប្រជាពលរដ្ឋ ។
លោកបញ្ជាក់ថា ខណៈបណ្តាប្រទេសមួយចំនួនទៀតនៅទន្លេមេគង្គលើកំពុងសាងសង់វារីអគ្គិសនីបានធ្វើឲ្យគុណភាពទឹកនៅតាមដងទន្លេមេគង្គក្រោមត្រូវបានបំពុល ហើយរបបទឹកទន្លេមានភាពផ្លាស់ប្តូរ ប៉ះពាល់ដល់ការរស់នៅរបស់ប្រជាពលរដ្ឋ និងមច្ឆាជាតិ ។
គម្រោងសាងសង់ទំនប់វារីអគ្គិសនីសំបូរកាត់ទន្លេមេគង្គត្រង់ខេត្តក្រចេះនេះអាចទាញយកប្រភពថាមពលអគ្គិសនីរហូតដល់២៦០០មេហ្គាវ៉ាត់ និងបង្កើតជាអាងស្តុកទឹក មានប្រវែងរហូតដល់ជាង៨០គីឡូម៉ែត្រទៅដល់ខេត្តស្ទឹងត្រែង ។
សូមបញ្ចាក់ថា កម្ពុជាមានវារីអគ្គសនីចំនួន៧កន្លែងហើយដោយ៦កន្លែង ស្ថិតនៅភាគខាងត្បូងឈៀងខាងលិចនៃប្រទេសកម្ពុជាមានដូចជា វារីអគ្គិសនីអាតៃ ឬស្សីជ្រុំកំចាយ គីរីរម្យ១ គីរីរម្យ៣ និងវារីអគ្គិសនីតាតៃ និងមួយកន្លែងទៀតគឺវារីអគ្គិសនីសេសានក្រោម២ស្ថិតនៅខេត្តស្ទឹងត្រែងភាគឥសាននៃប្រទេសកម្ពុជា ៕
ចែករំលែកព័តមាននេះ