រាជធានីភ្នំពេញ ៖ នៅទីបំផុតតារាសម្តែងនាង សាឡាត់ ស្រីឡាង បានសម្រេចដាក់ពាក្យបណ្តឹងប្តឹងទៅលើស្ត្រីម្នាក់ដែលបានអះអាងថា ជាភរិយាដើមរបស់លោក លៀក លីដា ចាងហ្វាងផលិតកម្ម…
រាជធានីភ្នំពេញ ៖ នៅទីបំផុតតារាសម្តែងនាង សាឡាត់ ស្រីឡាង បានសម្រេចដាក់ពាក្យបណ្តឹងប្តឹងទៅលើស្ត្រីម្នាក់ដែលបានអះអាងថា ជាភរិយាដើមរបស់លោក លៀក លីដា ចាងហ្វាងផលិតកម្ម LD ទាមទារសំណងចំនួន១០ម៉ឺនដុល្លារ បន្ទាប់ពីស្ត្រីរូបនោះបានធ្វើការបរិហារកេរ្តិ៍នាងយ៉ាងចាស់ដៃតាមបណ្តាញសង្គមហ្វេសប៊ុក។
ពាក្យបណ្តឹងនេះ ត្រូវបាន សាឡាត់ ស្រីឡាង បង្ហាញជាសាធាណៈតាមគណនេយ្យហ្វេសប៊ុករបស់ខ្លួន បន្ទាប់ពីនាងត្រូវបានស្ត្រីខាងលើនេះធ្វើការចោទប្រកាន់ថា បានដណ្តើមស្វាមីរបស់នាង ដែលបានបង្កឲ្យមានការភ្ញាក់ផ្អើលយ៉ាងខ្លាំងពីស្រទាប់មហាជន។
បើយោងតាមពាក្យបណ្តឹងតារាសម្តែងនាង សាឡាត់ ស្រីឡាង បានធ្វើការប្តឹងទៅលើស្ត្រីម្នាក់ដែលបានដាក់ឈ្មោះគណនេយ្យហ្វេសប៊ុក Panchaka June ដែលបានបង្ហោះសារ និងផ្ញើសារគំរាមកំហែងប្រើហិង្សា ជាមួយនឹងការចោទប្រកាន់នាងថា បានដណ្តើមប្តីរបស់ខ្លួន។ ក្នុងចំណុចទាំងអស់នេះ ត្រូវបានតារារូបនេះចាត់ទុកថា ជាការបំផ្លើស និងជាការទម្លាក់កំហុស មួលបង្កាច់ខុសពីការពិត ក្នុងចេតនាបំភាន់ភ្នែកសាធារណជន និងបំផ្លាញកិត្តិយសរបស់នាង ជាមួយនឹងការប៉ះពាល់ការងារសិល្បៈនាងយ៉ាងធ្ងន់ធ្ងរផងដែរ។
នៅក្នុងពាក្យបណ្តឹងនោះ សាឡាត់ ស្រីឡាង បានទាមទារឲ្យស្ត្រីខាងលើផ្តល់នូវសំណងជំងឺចិត្តចំនួន១០ម៉ឺនដុល្លារ និងឲ្យស្ត្រីរូបនេះលុបចោលនូវរាល់ការផុសទាំងឡាយណា ដែលធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូររបស់នាង ហើយបានទាមទារឲ្យមានការសុំទោសជាសាធារណៈផងដែរ។
យ៉ាងណាក៏ដោយ បើតាមសាឡាត់ ស្រីឡាង នាងអាចនឹងពិចារណាធ្វើការដកពាក្យបណ្តឹងនេះវិញ ក្នុងករណីដែលស្ត្រីខាងលើឈប់បន្តបំភ្លៃបរិហារកេរ្តិ៍នាងដោយមិនមានភស្តុតាងជាក់លាក់។
សាឡាត់ ស្រីឡាង បានសរសេរបង្ហោះតាមហ្វេសប៊ុកបញ្ជាក់បន្ថែមថា តាមពិតបើតាមចរិករបស់ខ្ញុំ គឺខ្ញុំត្រូវតបតតាំងពីដំបូងម្ល៉េះ។ តែក្រោយពីពិភាក្សាគ្នាជាមួយបងគឹមសួរ ធ្វើឲ្យខ្ញុំគិតយល់ថា ការតបតមិនមែនជាដំណោះស្រាយមួយដ៏ល្អទេ ដោយសារតែអ្នកដែលចូលរួមវិភាគ និងកាត់ក្តីទាំងនោះមិនមែនជាតុលាការដ៏សុក្រឹតនោះទេ តែវាប្រៀបដូចជាយកកេរ្តិ៍ខ្មាស់របស់ខ្លួនឯងមកដាក់តាំងបង្ហាញជាសាធារណៈ ដើម្បីឲ្យប្រជាជនបានឃើញតែប៉ុណ្ណោះ។
ដូចនេះខ្ញុំ សូមពឹងផ្អែកលើផ្នែកច្បាប់ដើម្បីជួយរកដំណោះស្រាយមួយដ៏ល្អសម្រាប់ពួកយើង។ ខ្ញុំនឹងពិចារណាដកពាក្យបណ្តឹងនេះវិញនៅពេលដែលបងឈប់បន្តបំភ្លៃបរិហារកេរ្តិ៍ខ្ញុំដោយមិនមានភស្តុតាងជាក់លាក់បែបនេះទៀត។ នេះមិនមែនជាការព្រមានទេ តែវាជាវិធីដ៏ល្អមួយដើម្បីរកផ្លូវចេញមួយដ៏សន្តិវិធី។ ភ្លើងកំពុងតែឆាបឆេះ សូមឈប់បន្តចាក់សាំងលើភ្លើងទៀតទៅ សូមឈប់បន្តរំខានជិវិតរស់នៅ និងជីវិតសិល្បៈរបស់ខ្ញុំតទៀតទៅ៕
ចែករំលែកព័តមាននេះ