រាជធានីភ្នំពេញ ៖ ប្រភពព័ត៌មានចេញពីសាលាដំបូងរាជធានីភ្នំពេញបានឲ្យដឹងថា នៅព្រឹកថ្ងៃទី១៤ ខែកុម្ភៈ នេះចៅក្រមស៊ើបសួរបានបង្គាប់ទៅអនុរក្សពន្ធនាគារព្រៃសឲ្យនាំខ្លួនជនជាប់សង្ស័យឈ្មោះ យិន ហេង ហៅ ចំប៉ីខ្មៅ ជាជនភេទទី៣ យកមកសាកសួរឡើងវិញដែលជាប់ពាក់ព័ន្ធជុំវិញសំណុំរឿងបទ«ញុះញង់ឲ្យមានការរើសអើង»នោះ ។
គួរបញ្ជាក់ថា ចំប៉ីខ្មៅ ត្រូវបានលោក ពេជ្រ វេជ្ជធរ ចៅក្រមស៊ើបសួរសាលាដំបូងសម្រេចឃុំខ្លួនដាក់ពន្ធនាគារជាបណ្តោះអាសន្ន កាលពីល្ងាចថ្ងៃទី៦ ខែកុម្ភៈ ឆ្នាំ២០១៩ បន្ទាប់ពីតំណាងអយ្យការបានចោទប្រកាន់ជាផ្លូវការរួចមក ។
ជនសង្ស័យឈ្មោះ យិន ហេង ហៅ ចំប៉ីខ្មៅ ភេទទី៣ មានអាយុ២៣ឆ្នាំ កើតនៅភូមិអណ្តូងពោធិ៍ សង្កាត់កំពង់ប្រណាក ក្រុងព្រះវិហារ ខេត្តព្រះវិហារ ដែលជាជនសង្ស័យល្បីល្បាញក្នុងបណ្តាញសង្គមហ្វេសប៊ុកពាក់ព័ន្ធរឿងជេរប្រមាថជាតិសាសន៍ខ្មែរ ។
គួរបញ្ជាក់ទៀតថា នៅថ្ងៃទី៦ ខែកុម្ភៈ ត្រូវបានលោក លី សុផាណា ព្រះរាជអាជ្ញារងអមសាលាដំបូងរាជធានីភ្នំពេញសម្រេចធ្វើការចោទប្រកាន់ពីបទ«ញុះញង់ឲ្យមានការរើសអើង» តាមមាត្រា៤៩៤ និង៤៩៦ នៃក្រមព្រហ្មទ័ណ្ឌ ដែលតាមមាត្រានេះតម្រូវឲ្យផ្តន្ទាទោសលើជនជាប់ចោទពី១ឆ្នាំទៅ៣ឆ្នាំ ។
ជនសង្ស័យត្រូវបានកម្លាំងសមត្ថកិច្ចនគរបាលចាប់ខ្លួនកាលពីល្ងាចថ្ងៃទី៥ ខែកុម្ភៈ នៅហាងកាហ្វេមួយកន្លែងក្នុងទឹកដីខណ្ឌដូនពេញ ដោយអង្គហេតុបណ្តាលឲ្យសមត្ថកិច្ចចាប់ខ្លួន ចំប៉ីខ្មៅ កាលពីវេលាម៉ោង៥និង២៥នាទីយប់ ថ្ងៃទី៤ ខែកុម្ភៈ នៅចំណុចមុខព្រះបរមរាជវាំង ចំប៉ីខ្មៅ បានបង្ហោះសារជាវីដេអូ និងអក្សរលើទំព័រហ្វេសសប៊ុកដែលឈ្មោះ ចំប៉ីខ្មៅ Chompey Khmoa ថា ជូនទៅពូជអាខ្មែរតិរិច្ឆាន៣នាក់ ដែលជិះម៉ូតូមកខោកក្បាលខ្លួនតាមផ្លូវ និងមានភ្ជាប់ឃ្លីបវីដេអូមានរយៈពេល១នាទី៥៣វិនាទី ដោយជេរទៅលើក្រុមជនបង្ក ដែលបានខោកក្បាលខ្លួន៦ក្រញ៉នោះ ។
ក្រោយពេលមានបង្ហោះសារវីដេអូខ្លីលើបណ្តាញសង្គមហ្វេសប៊ុក ដោយប្រើភាសារដៀលត្មេះពូជសាសន៍ជាតិខ្មែរធ្ងន់ៗក៏មានបណ្តាញសង្គមជាច្រើនបានប្រតិកម្មតបតវិញ ដោយមានការថ្កោលទោស និងទាមទារឲ្យសមត្ថកិច្ចស្វែងរកចាប់ខ្លួនជននេះឲ្យខាងតែបានដើម្បីនាំយកមកផ្ដន្ទាទោសតាមច្បាប់ និងឲ្យកំហុសដែលខ្លួនបានប្រព្រឹត្ត ៕
ចែករំលែកព័តមាននេះ