ខេត្តពោធិ៍សាត់ ៖ ប្តីប្រពន្ឋ២នាក់បានស្លាប់ភ្លាមៗ ដោយសារគ្រោះថ្នាក់ចរាចរណ៍កាលពីថៃ្ងទី៨ មីនា ឆ្នាំ២០១១ ។ ហេតុការណ៍គ្រោះថ្នាក់ចរាចរណ៍ខាងលើនេះ កើតឡើងនៅវេលាម៉ោង៣និង១៥នាទីរសៀល ថ្ងៃទី៨ មីនា លើផ្លូវជាតិលេខ៥ ត្រង់ចំណុចភូមិទទឹង ឃុំអន្លង់ត្នោត ស្រុកក្រគរ ខេត្តពោធិ៍សាត់។
តាមប្រភពពីលោកវរសេនីយ៍ត្រី ឡែន សុង អធិការស្រុកក្រគរ បានឱ្យដឹងថា ជនរងគ្រោះក្នុងឧប្បត្តិហេតុគ្រោះថ្នាក់ចរាចរណ៍នេះឈ្មោះសេង លី អាយុ៥៤ឆ្នាំ ជាប្តី ហើយឈ្មោះម៉ោល សុភាព អាយុ៤៨ឆ្នាំ ជាប្រពន្ធ បានបើកម៉ូតូធុនកូរ៉េ C100 គ្មានស្លាកលេខពណ៌ក្រហម ក្នុងទិសដៅពីកើតទៅលិច លុះមកដល់ចំណុចកើតហេតុ ស្រាប់តែមានរថយន្តប៉ាហ្សេរ៉ូ១គ្រឿងពណ៌ស ពាក់ស្លាកលេខភ្នំពេញ 2F-4736 ក្នុងទិសដៅច្រាសគ្នាបានរេចង្កូតទៅបុកម៉ូតូនៅខាងឆ្វេងដៃ ជាចំណែករបស់ម៉ូតូ បណ្តាលឲ្យអ្នកបើកបរម៉ូតូ និងអ្នកជិះពីក្រោយម្នាក់ស្លាប់ភ្លាមៗនៅនឹងកន្លែងកើតហេតុ ។
លោកអធិការនគរបាលស្រុកក្រគរ បន្តថា ក្រោយពេលកើតហេតុអ្នកបើកបររថយន្តបង្កបានព្យាយាមបើករត់រហូតដល់ខេត្តកំពង់ឆ្នាំង ទើបសមត្ថកិច្ចចាប់ឃាត់បាន ចំណែកឯម្ចាស់រត់គេចខ្លួន។ រថយន្ត និងម៉ូតត្រូវបានយកមកកាន់ការិយាល័យនគរបាលចរាចរណ៍នៃស្នងការដ្ឋាននគរបាល ដើម្បីបំពេញបែបបទតាមនីតិវិធី។ ចំណែកឯសពប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ