រាជធានីភ្នំពេញ ៖ យុវជនពីរនាក់ភ័យស្លន់ស្លោជិះម៉ូតូបញ្ច្រាសទិសដៅចរាចរណ៍រត់គេចពីយុវជនមួយក្រុមទៀត ដែលជិះដេញតាមវ៉ៃបណ្តាលឲ្យជ្រុលទៅបុកម៉ូតូកង់បីឥណ្ឌាចំពីមុខពេញទំហឹង រងរបួសធ្ងន់ស្រាល៣នាក់ កាលពីវេលាម៉ោង១រំលងអធ្រាត្រឈានចូលថ្ងៃទី១៤ ខែកុម្ភៈ ឆ្នាំ២០១៩ ត្រង់ចំណុចផ្លូវក្រោមដីស្ពានអាកាស៥មករា ស្ថិតក្នុងសង្កាត់ផ្សារដេប៉ូទី៣ ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសបើកម៉ូតូកង់បីឥណ្ឌាមួយគ្រឿងម៉ាកបាចា ពណ៌លឿង ពាក់ស្លាកលេខ ភ្នំពេញ 1HG-3673 ធ្វើដំណើរតាមបណ្ដោយផ្លូវ២៨៩ ក្នុងទិសដៅពីជើងទៅត្បូងរួចក៏បានបត់ចូលទៅផ្លូវក្រាមដី ដែលជាផ្លូវឯកទិសបំណងបត់ឆ្វេងទៅមហាវិថីសហព័ន្ធរុស្ស៊ី ។ លុះមកដល់ចំណុចកើតហេតុ ក៏ស្រាប់តែម៉ូតូមួយគ្រឿងទៀតម៉ាកសងប៉ិច ពណ៌ខ្មៅ ពាក់ស្លាកលេខកំពង់ចាម 1M-0796 បើកបរដោយយុវជនពីរនាក់ តាមបណ្តោយផ្លូវក្រោមដីក្នុងទិសដៅបញ្ច្រាសទិសចរាចរណ៍ និងក្នុងល្បឿយ៉ាងលឿនដូចហោះ ។ រួចក៏ជ្រុលទៅបុកម៉ូតូកង់បីឥណ្ឌាចំពីមុខពេញទំហឹង បណ្តាលឲ្យម៉ូតូកង់បីរងការខូចខាតក្រពឹត និងបែកកញ្ចក់ខាងមុខ រីឯអ្នកបើកបររងរបួសបែកក្បាល ។
ចំណែកឯម៉ូតូរងការខូចខាតវៀចផ្នែកខាងមុខយ៉ាងដំណំ រីឯអ្នកបើកបររងរបួសបាក់ដៃខាងឆ្វេង និងអ្នកអង្គុយខាងក្រោយរងរបួសបែកក្បាល។
បើតាមសម្តីពីយុវជនដែលជាអ្នកបើកបរម៉ូតូបានរៀបរាប់ប្រាប់ឲ្យដឹងថា នៅមុនពេលកើតហេតុ ពួកគេបានជិះមកពីផ្ទះនៅឯពោធិ៍ចិនតុងបំណងទៅហូបអីនៅឯកោះពេជ្រ ។ ខណៈពេលដែលជិះទៅដល់ស្តុបសន្ធរម៉ុកក៏ស្រាប់តែបានជួប និងយុវជនមួយក្រុមទៀតមានគ្នា៨ទៅ៩នាក់ជិះម៉ូតូបួនគ្រឿងមិនចាំម៉ាកដែលកំពុងធ្វើដំណើរតាមផ្លូវដូចគ្នា ។
យុវជនទាំងនោះក៏បានសំឡឹងមើលមុខពួកគេទាំងពីរនាក់ហាក់ដូចជា មានមនុស្សមានគំនុំនិងគ្នា ។ បន្ទាប់មកដោយភ័យខ្លាចមានរឿងរ៉ាវមិនល្អដល់ខ្លួនពួកគេក៏បានជិះម៉ូតូបន្តដំណើរទៅមុខទៀត ពេលនោះស្រាប់តែយុវជនមួយក្រុមនោះបានជិះដេញតាមពីក្រោយពួកគេរហូត ទោះបីជាពួកគេព្យាយាមបើកបត់ទៅផ្លូវណាក៏ដោយ ។ ដោយសារពួកគេភ័យស្លន់ស្លោខ្លាចក្រុមយុវជនខាងលើដេញវ៉ៃខ្លាំងពេក ក៏សម្រេចចិត្តជិះបញ្ច្រាសទិសដៅចូលទៅផ្លូវក្រោមដី បណ្ដាលឲ្យទៅបុក និងម៉ូតូកង់បីខាងលើតែម្តង ចំណែកឯយុវជនដែលជិះដេញតាមវ៉ៃពួកគេ ក៏នាំគ្នាគេចខ្លួនបាត់អស់ទៅ ។
ក្រោយពេលកើតហេតុអ្នកបើកបរម៉ូតូកង់បីឥណ្ឌាត្រូវបានរថយន្តសង្គ្រោះបន្ទាន់ដឹកយកទៅសង្គ្រោះភ្លាមៗដោយឡែកម៉ូតូ និងម៉ូតូកង់បីត្រូវបានសមត្ថកិច្ចមូលដ្ឋានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌទួលគោកដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយ ៕
ចែករំលែកព័តមាននេះ