ខេត្តកណ្ដាល ៖ ទីបំផុតអ្នកកាសែតទាំង៣នាក់ ដែលត្រូវឈ្មួញជីកដីម្នាក់ឈ្មោះ តាក់ ជីឡៅប្ដឹងឲ្យកម្លាំងនគរបាលស្រុកអង្គស្នួល ធ្វើការចាប់ខ្លួន និងទារសំណងជម្ងឺចិត្តចំនួន១០ម៉ឺនដុល្លារ ។
ដោយចោទប្រកាន់ទៅលើអ្នកទាំង៣ពីបទកំហែងយកនោះបានរួចផុតពីការចោទប្រកាន់ និងបានវិលត្រឡប់ទៅផ្ទះជួបប្រពន្ធកូនវិញហើយ កាលពីវេលាយប់ថ្ងៃទី១៣ ខែកុម្ភៈ ឆ្នាំ២០១៩ ។ ការបានរួចខ្លួនវិញនេះ បន្ទាប់ពីលោក តាក់ ជីឡៅ ដែលជាម្ចាស់រណ្ដៅដីបានសម្រេចដកពាក្យប្ដឹងរបស់ខ្លួនវិញ ដើម្បីបញ្ចប់រឿងក្រោយពីមានការសម្របសម្រួលគ្នារវាងរូបលោក និងតំណាងជនសង្ស័យទាំង៣នាក់ ។ ប៉ុន្តែខណៈនោះក៏បានតម្រូវឲ្យអ្នកកាសែតទាំង៣នាក់នេះឡាយវីដេអូរសុំទោស និងទទួលស្គាល់ពីទោសកំហុសរបស់ខ្លួនជាសាធារណៈផងដែរ នេះ គឺជាការបញ្ជាក់ឲ្យដឹងពីសំណាក់មន្ត្រីនគរបាលស្រុកអង្គស្នួល ។
ក្រុមអ្នកសារព័ត៌មានជាប់ចោទ និងជាប់អន្ទាក់ឈ្មួញរណ្ដៅដីខាងលើនោះមាន ១- ឈ្មោះ អួន មិនា ភេទប្រុស អាយុ៣៧ បម្រើការនៅអង្គភាពសារព័ត៌មាន «ខេមរអង្គរ» ២-ឈ្មោះ ទន់ ម៉ូវ ភេទប្រុស អាយុ៣៥ឆ្នាំ ជានិពន្ធនាយកអង្គភាពសារព័ត៌មាន «ខ្មែរណូត» ៣- ឈ្មោះ ធួក សំណាង ភេទប្រុស អាយុ២៥ឆ្នាំ ជាអ្នកសារព័ត៌មាន «កំពតដេលី» ។ ដោយឡែកអ្នកប្ដឹងឲ្យនគរបាលចាប់ខ្លួនអ្នកកាសែតនោះឈ្មោះ តាក់ ជីឡៅ អាយុ៣៩ឆ្នាំ មានទីលំនៅក្នុងភូមិកណ្ដាល ឃុំឆក់ឈើនាង ស្រុកអង្គស្នួល ខេត្តកណ្ដាល ជាម្ចាស់ការដ្ឋានរណ្ដៅដីនោះផង ហើយក៏ជាក្រុមការងារគណៈពង្រឹងឃុំឆក់ឈើនាងនោះផងដែរ ។
សូមរម្លឹកផងដែរថា កាលពីថ្ងៃទី១២ ខែកុម្ភៈ ឆ្នាំ២០១៩ អ្នកកាសែតទាំង៣នាក់នេះ ត្រូវបានលោកតាក់ ជីឡៅ ប្ដឹងឲ្យនគរបាលឃាត់ខ្លួនខណៈពួកគេជិះរថយន្ត១គ្រឿងចូលទៅក្នុងការដ្ឋានរណ្ដៅដីរបស់លោកនៅក្នុងភូមិកណ្តាល ឃុំឆក់ឈើនាង ស្រុកអង្គស្នួល ខេត្តកណ្តាល ។ បើតាមពាក្យបណ្តឹងលោក តាក់ ជីឡៅ បានរៀបរាប់ថា អ្នកកាសែតទាំង៣នាក់ខាងលើបានរៀបចំផែនការចូលទៅក្នុងទីតាំងការដ្ឋានអាជីវកម្មរណ្តៅដីរបស់លោក ហើយបានប្រើប្រាស់រថយន្តរបស់ពួកគេ១គ្រឿង ម៉ាកហុងដាស៊ីអរវី ពណ៌សំបកឪឡឹក ពាក់ស្លាកលេខ ភ្នំពេញ 2AM- 0457 ទៅចតរាំងផ្លូវចេញចូលមិនឱ្យរថយន្តដឹកដីរបស់លោកចេញចូលបានឡើយ ។ ជាហេតុបណ្ដាលឲ្យកកស្ទះផ្លូវ បន្ទាប់មកក្រុមអ្នកកាសែតទាំងនេះបានគំរាមគំហែង និងបង្ខិតបង្ខំឲ្យកូនចៅរបស់លោកប្រគល់ប្រាក់ចំនួន៥,០០០ដុល្លារ (ប្រាំពាន់ដុល្លារ) ទៅឱ្យពួកគេ ។
ពេលនោះដោយមានការភ័យខ្លាច និងព្រួយបារម្ភពីអំពើនោះលោកក៏សម្រេចចិត្តទូរស័ព្ទប្តឹងនគរបាលប៉ុស្តិ៍រដ្ឋបាលឃុំឆក់ឈើនាង និងអធិការដ្ឋាននគរបាលស្រុកអង្គស្នួល ដើម្បីជួយអន្តរាគមន៍ឃាត់ពួកគេតែម្ដង ។ ពេលនេះលោកសំណូមពរសុំឲ្យសមត្ថកិច្ចជួយផ្ដន្ទារទោសដល់អ្នកទាំង៣នាក់នោះឲ្យបានធ្ងន់ធ្ងរ និងសុំទាមទារសំណងជម្ងឺចិត្តចំនួន១០ម៉ឺនដុល្លារអាមេរិក ។
ចំណែកអ្នកកាសែតជាប់ចោទបាននិយាយ បដិសេធន៍ថា ពួកគាត់មិនបានយករថយន្តចតបាំងផ្លូវ និងទារលុយ៥ពាន់ដុល្លារដូចជា ការចោទប្រកាន់របស់លោក តាក់ ជីឡៅនេះឡើយ ។ តាមពិតពួកគាត់ចូលទៅ ដើម្បីថតរូបយកព័ត៌មានពីរណ្ដៅដីដែលជីកជ្រៅខុសបទដ្ឋានបច្ចេកទេសជ្រៅហួសហេតុ ដើម្បីយកមកផ្សាយប៉ុណ្ណោះ ។ ប៉ុន្តែគ្រាន់តែចូលទៅដល់ស្រាប់តែត្រូវកម្មករខាងរណ្តៅដីខាងលើដែលជាកូនចៅលោក តាក់ ជីឡៅ យកម៉ូតូមករាំងផ្លូវមិនឲ្យពួកខ្លួនចេញ រួចហើយព្រមទាំងបានប្ដឹងនគរបាលឲ្យចាប់ពួកខ្លួនថា បានចតរថយន្តរាំងផ្លូវបែបនេះទៀត ពិតជាអយុត្តិធម៌ខ្លាំងណាស់ ។
ក្រោយពីការឃាត់ខ្លួនរយៈពេល១យប់២ថ្ងៃបន្ទាប់ពីមានការសម្របសម្រួលគ្នារវាងលោក តាក់ ជីឡៅ និងអ្នកកាសែតដែលជាតំណាងជនជាប់ចោទទាំង៣នាក់ រួចមកទើបលោក តាក់ ជីឡៅ ព្រមឈប់ប្ដឹងផ្តល់ និងដកពាក្យបណ្ដឹងវិញជាការបញ្ចប់រឿង ។ ប៉ុន្តែបានតម្រូវឲ្យអ្នកទាំង៣ឡាយវីដេអូរសុំទោស និងទទួលស្គាល់កំហុសរបស់ខ្លួន រួចរាល់ទើបអ្នកកាសែតទាំង៣បានរួចខ្លួនវិលត្រឡប់ទៅផ្ទះវិញ ។
ដោយឡែកមន្ត្រីកងរាជអាវុធហត្ថស្រុកអង្គស្នួលម្នាក់ ដែលស្និទ្ធជាមួយលោក តាក់ ជីឡៅ ថៅកែរណ្ដៅដីដ៏មានឥទ្ធិពលខាងលើបាននិយាយថា អ្នកកាសែតខាងលើមិនត្រូវបានចាប់ខ្លួននោះទេ គួរកុំនិយាយថា ចាប់បើចាប់ គឺគេត្រូវវ៉ៃខ្នោះដៃ ឬធ្វើកំណត់ហេតុឃាត់ខ្លួនបាត់ហើយ ។ ប៉ុន្តែចំពោះអ្នកកាសែតខាងលើ គឺនគរបាលគ្រាន់តែហៅទៅសាកសួរតែប៉ុណ្ណោះ ពេលនោះពួកគេបានបើករថយន្តទៅដោយខ្លួនឯង និងមិនបានចូលទៅក្នុងអធិការដ្ឋានស្រុកផងទេ គឺស្ថិតនៅតាមផ្លូវជាតិលេខ៤ រហូតដល់វេលាម៉ោង១០យប់ថ្ងៃទី១២ ខែកុម្ភៈ ដដែលនោះទើបព្រមចូល ។
ម្យ៉ាងទៀតសាម៉ីខ្លួនទាំង៣នាក់នេះមិនទាំងខ្វល់ខ្វាយផង និងបានចេញទៅច្រៀងខារ៉ាអូខេថែមទៀតគ្មាននរណាឃាត់ទេ ប៉ុន្តែអ្នកកាសែតផ្សេងៗទេដែលខ្វល់ជំនួស ហើយចេះតែចុះផ្សាយថា គេឃាត់ខ្លួនអ្នកទាំង៣នាក់នោះ ។ ទោះបីបែបណាលោកក៏មិនបានដឹងពីចំណាត់ការរបស់នគរបាលបែបណាដែរ ព្រោះនគរបាលជាអ្នកធ្វើរឿងនេះ មិនមែនខាងកម្លាំងកងរាជអាវុធហត្ថលោកជាអ្នកធ្វើឡើយ ។ អ្នកមានប្រាក់ទិញយក្សប្រើក៏អាចសង្ស័យដែរ ។
ចែករំលែកព័តមាននេះ