ខេត្តកំពង់ធំ ៖ បើតាមសេចក្តីរាយការណ៍បឋមបានឱ្យដឹងថា ក្មេងស្រីម្នាក់បានបាត់ ក្រោយម្តាយក្មេងរងគ្រោះបាននាំគ្នាដើររកតែមិនឃើញ លុះប្រទះឃើញ ស្រាប់តែឃើញកូនឆេះរលាកស្លាប់យ៉ាងអាណោចអាធ័មគួរឲ្យសង្វេគទៅហើយ បង្កឱ្យមានការភ្ញាក់ផ្អើលកាលពីរសៀលថ្ងៃទី១៣ ខែកុម្ភៈ ឆ្នាំ២០១៩ នៅចំណុចត្រពាំងគរខាងកើត ភូមិស្ពានគ្រង ឃុំចំណាក្រោម ស្រុកស្ទោង ខេត្តកំពង់ធំ ចម្ងាយប្រហែលមួយគីឡូម៉ែត្រ ។
បើតាមសមត្ថកិច្ចជំនាញស្រុកស្ទោងសហការជាមួយអាជ្ញាធរមូលដ្ឋានភូមិ-ឃុំចុះដល់កន្លែងកើតហេតុដើម្បីពិនិត្យសពឃើញថា សពជនរងគ្រោះខាងលើឈ្មោះ មាន ទីន ភេទស្រី អាយុ២៧ឆ្នាំ រស់នៅភូមិសណ្តាន់ ឃុំចំណាក្រោម ស្រុកស្ទោង ខេត្តកំពង់ធំ ។
បើការបំភ្លឺពីឈ្មោះ ឡឹង តុ អាយុ៥០ឆ្នាំ ត្រូវជាម្តាយក្មេងស្រីរងគ្រោះបានប្រាប់ថា កូនគាត់មានជំងឺវិកលចរិកតាំងពីក្មេងមកម្ល៉េះ រហូតដល់បច្ចុប្បន្នវាចេះតែដើរចូលទៅដេកក្នុងព្រៃគ្មានទិសដៅពិតប្រាកដទេ ជួនកាលចេញពីផ្ទះពីព្រឹករហូតដល់ល្ងាច ឬយប់ ទើបត្រលប់មកផ្ទះវិញដោយខ្លួនឯង ហើយពេលខ្លះទៀតគាត់និងប្តីដើរតាមរកឃើញក៏នាំមកផ្ទះវិញ លុះនៅព្រឹកថ្ងៃទី១២ កុម្ភៈ កូនគាត់ចេញពីផ្ទះដូចសព្វដង ហើយគាត់តាមរកគ្រប់កន្លែងដែលកូនធ្លាប់ទៅតែរកមិនឃើញ បាត់មួយយប់ ។
ស្ត្រីជាម្តាយបន្តទៀតថា រហូតដល់ថ្ងៃកើតហេតុ គាត់ទៅរកកូនគាត់ម្តងទៀត ស្រាប់តែប្រទះឃើញកូនស្រីគាត់ដេកស្លាប់ក្បែរព្រៃមានដំបូក មានដើមស្តៅ ហើយមានស្នាមភ្លើងឆេះពេញខ្លួន បន្ទាប់មកក៏រាយការណ៍ជូនសម្ថកិច្ចតែម្តងទៅ ។
សូមបញ្ជាក់ថា បើតាមការពិនិត្យសពក្មេងស្រីរងគ្រោះឃើញដេកផ្ងារពោះក្បែរព្រៃ និងត្រូវភ្លើងឆេះខោអាវអស់ និងឆេះរោលខ្លោចពេញខ្លួន ។ ក្រៅពីស្នាមភ្លើងឆេះ ពុំមានស្នាមរបួសអ្វីផ្សេងទៀតឡើយ ហើយនៅជុំវិញកន្លែងកើតហេតុជាកន្លែងដែលភ្លើងឆេះកញ្ជ្រាំង និងឆេះព្រៃ ។
ក្រោយមកសសមត្ថកិច្ចសន្និដ្ឋានថា ជនរងគ្រោះចេះតែដើរគ្មានគោលដៅហេវហត់ អត់បាយអត់ទឹក កើតខ្យល់គរ បណ្តាលឱ្យគាំងបេះដូងស្លាប់នៅក្បែព្រៃ ហើយក៏ត្រូវភ្លើងឆេះតែម្តង ។ ក្រោយពីពិនិត្យរួច ក៏ប្រគល់សពក្មេងស្រីរងគ្រោះជូនម្តាយយកទៅធ្វើបុណ្យតាមប្រពៃណី៕
ចែករំលែកព័តមាននេះ