ប្រទេសថៃ ៖ ជំហានដំបូងត្រូវបានឆ្លងកាត់ កាលពីថ្ងៃទី១៣កុម្ភៈនៅប្រទេសថៃឆ្ពោះទៅរំលាយគណបក្ស ដែលមុននេះប្រកាសពីការឈរឈ្មោះរបស់ព្រះរៀមស្ដេចថៃ ជាបេក្ខជននាយករដ្ឋមន្ត្រី។ នោះជាដំណឹងអាក្រក់សម្រាប់គណបក្សស្និទ្ធអតីតនាយករដ្ឋមន្ត្រី លោកថាក់ស៊ីនស៊ីណាវ៉ាត្រា ខណៈការបោះឆ្នោតសភាជិតមកដល់គឺខែមីនាខាងមុខនេះ។ ក្នុងសេចក្ដីប្រកាសមួយ…
ប្រទេសថៃ ៖ ជំហានដំបូងត្រូវបានឆ្លងកាត់ កាលពីថ្ងៃទី១៣កុម្ភៈនៅប្រទេសថៃឆ្ពោះទៅរំលាយគណបក្ស ដែលមុននេះប្រកាសពីការឈរឈ្មោះរបស់ព្រះរៀមស្ដេចថៃ ជាបេក្ខជននាយករដ្ឋមន្ត្រី។ នោះជាដំណឹងអាក្រក់សម្រាប់គណបក្សស្និទ្ធអតីតនាយករដ្ឋមន្ត្រី លោកថាក់ស៊ីនស៊ីណាវ៉ាត្រា ខណៈការបោះឆ្នោតសភាជិតមកដល់គឺខែមីនាខាងមុខនេះ។
ក្នុងសេចក្ដីប្រកាសមួយ គណៈកម្មាធិការបោះឆ្នោតគូសបញ្ជាក់ថា ប្រការដែលស្នើម្ចាស់ក្សត្រីអ៊ូបុលរតនាជាបេក្ខជន ត្រូវបានចាត់ទុកថាជាការប្រទូស្តរ៉ាយនឹងរបបរាជានិយមអាស្រ័យរដ្ឋធម្មនុញ្ញ។ ដូច្នេះគណៈកម្មាធិការបោះឆ្នោតស្នើដល់តុលាការធម្មនុញ្ញ ឲ្យរំលាយចោលគណបក្សថៃរក្សាជាតិ។
តាមINSTAGRAMម្ចាស់ក្សត្រីអ៊ូបុលរតនា ថ្លែងកាលពីយប់ថ្ងៃទី១២កុម្ភៈថា ខ្ញុំមានការសោកស្ដាយដែលចេតនារបស់ខ្ញុំ ចង់ជួយប្រទេសជាតិនិងជនរួមជាតិថៃរបស់ខ្ញុំ បែរជានាំឲ្យមានបញ្ហាមួយ។ បែបនោះពុំសមកើតមានសោះសម្រាប់សម័យកាលយើងនេះ។
ប្រភពមួយជិតដិតនឹងសំណុំរឿងនោះ គូសបញ្ជាក់ប្រាប់AFPថា ការរំលាយគណបក្សថៃរក្សាជាតិអាចមាន មុនច្រើនសប្ដាហ៍ទៀត។ ប៉ុន្តែរឿងបែបនេះនឹងជាអន្លូងមួយធ្ងន់ សម្រាប់លោកថាក់ស៊ីនស៊ីណាវ៉ាត្រា ដែលសង្ឃឹមវិលមករកឆាកនយោបាយវិញ ក្នុងការបោះឆ្នោតសភានាថ្ងៃទី២៤មីនា។
ការប្រកាសរបស់គណៈកម្មាធិការបោះឆ្នោតនេះ កើតមានខណៈភាពតានតឹងកំពុងមានខ្ពស់ រវាងពួកយោធា ដែលកាន់អំណាចចាប់តាំងពីរដ្ឋប្រហារខែឧសភាឆ្នាំ២០១៤មក និងពួកអ្នកគាំទ្រលោកថាក់ស៊ីនដែលនៅមានច្រើន។
ប្រសិនបើគណបក្សថៃរក្សាជាតិត្រូវរំលាយ នោះបណ្ដាមេដឹកនាំរបស់គណបក្សនេះ នឹងអាចហាមឃាត់មិនឲ្យធ្វើសកម្មភាពនយោបាយដល់ទៅ១០ឆ្នាំ។ លោកPREECHAPOL PONGPANICH មេដឹកនាំគណបក្សនេះអះអាងកាលពីថ្ងៃទី១២កុម្ភៈថា យើងធ្វើសកម្មភាពដោយស្មោះសរ ជាមួយបំណងចង់ឃើញប្រទេសយើងដើរឆ្ពោះទៅរកអនាគតដ៏ល្អផូរផង់មួយ៕
ចែករំលែកព័តមាននេះ