សហរដ្ឋអាមេរិក ៖ ក្រសួងរតនាគារអាមេរិក រាយការណ៍កាលពីថ្ងៃទី១២កុម្ភៈថា បំណុលសាធារណៈរបស់សហរដ្ឋអាមេរិក ទើបនឹងឆ្លងកាត់ហួសពី២២.០០០ពាន់លានដុល្លារ ដែលនោះជាបំណុលខ្ពស់បំផុតជាឯតទគ្គកម្ម។
យោងតាមក្រសួងនោះថា គ្រាន់តែរយៈពេល១២ថ្ងៃចុងក្រោយនេះ គឺចាប់ពីដើមខែនេះមក បំណុលបានកើនជាង៩០ពាន់លានដុល្លារ។ រួចរយៈពេល១១ខែចុងក្រោយនេះ បំណុលកើនដល់ជាង១០០០ពាន់លានដុល្លារ។
តាមកាសែតUSA TODAY ថា សង្វាក់នៃការកើនបំណុលយ៉ាងច្រើន ក្រោមការកាន់អំណាចរបស់លោកដូណាល់ត្រាំ បណ្ដាលមកជាពិសេស ការកែទម្រង់ពន្ធដាកាលពីឆ្នាំទៅមិញ ដែលបណ្ដាលឲ្យបាត់បង់ថវិកា ជិត១.៥០០ពាន់លានដុល្លារ។
កត្តាឯទៀតគឺការកើនខ្ពស់នៃការចំណាយសម្រាប់កិច្ចការពារ។ ក្នុងឆ្នាំសារពើពន្ធ២០១៨តែមួយ ឱនភាពថវិកាអាមេរិកមានការកើនឡើង១៧% ឡើងដល់កំពូល៧៧៩ពាន់លានដុល្លារ។ តាមការវាយតម្លៃនានាថា រហូតដល់ឆ្នាំ២០២០តួលេខនោះនឹងមានលើសពី១០០០ពាន់លានដុល្លារ ហើយបន្តកើនក្នុងសង្វាក់យ៉ាងលឿន មកពីការចំណាយនានារបស់រដ្ឋាភិបាល ដែលពុំមានការត្រួតពិនិត្យ៕
ចែករំលែកព័តមាននេះ