រាជធានីភ្នំពេញ ៖ នៅសល់ពេលតែ៣ថ្ងៃទៀតប៉ុណ្ណោះកីឡាករគុនខ្មែរពីររូបគឺ ឡៅ ចិត្រា និងនៅ ស្រីពៅ នឹងត្រូវបង្ហាញខ្លួនក្នុងព្រឹត្តិការណ៍ប្រដាល់ដាក់ទ្រង់នៅសង្វៀន One Championships ប្រទេសថៃ ក្នុងនោះកីឡាករ ឡៅ ចិត្រា ត្រូវជួបប្រកួតជាមួយកីឡាករម្ចាស់ផ្ទះថៃ ស៊ុបពើរឡេក និងកីឡាការិនី នៅ ស្រីពៅ ក៏ត្រូវប្រកួតជាមួយកីឡាការិនីម្ចាស់ផ្ទះដូចគ្នាគឺនាង Rika Ishige នៅថ្ងៃទី១៦ ខែកុម្ភៈ ខាងមុខនេះ។
ជាមួយគ្នានេះ អតីតកំពូលអ្នកប្រដាល់គុនខ្មែរ កែងឆេះ ជង្គង់ហោះ អេ ភូថង ក៏បានផ្ញើសារចាក់ដោតទៅកាន់កីឡាករគុនខ្មែរទាំងពីររូបមុនចេញទៅប្រកួតនៅប្រទេសថៃថា ក្នុងនាមជាកីឡាករ កីឡាការិនីគុនខ្មែរ ដែលចេញទៅប្រកួតនៅក្រៅប្រទេស ត្រូវតែបង្កើននូវការហ្វឹកហាត់ឲ្យខ្លាំងទ្វេដង ។
នៅពេលឡើងសង្វៀនប្រកួតកុំបន្ធូរដៃឲ្យសោះ ដើម្បីឲ្យអន្តរជាតិគេដឹងថា គុនខ្មែរពិតជាខ្លាំងមែន ។ រឿងមួយទៀតគឺយើងត្រូវតាមដានគ្រប់សកម្មភាពវីដេអូសម្រាប់ការប្រកួតរបស់ដៃគូយើងកន្លងមក ដើម្បីឲ្យយើងស្គាល់គេកាន់តែច្បាស់ ។ កីឡាករ ឡៅ ចិត្រា ក៏បានសន្យាថា នឹងប្រឹងប្រែងឲ្យអស់ពីសមត្ថភាព ដើម្បីមុខមាត់ប្រទេសជាតិផងដែរ។
ស្របពេលដំណឹងកីឡាករគុនខ្មែរនឹងធ្វើការប្រកួតក្នុងទឹកដីថៃនៅថ្ងៃទី១៦ កុម្ភៈ ខាងមុខនេះដែរ មានបងប្អូនប្រជាពលរដ្ឋខ្មែរមួយចំនួនដែលកំពុងធ្វើការនៅប្រទេសថៃ បានបង្ហោះសារនៅលើបណ្ដាញសង្គមហ្វេសប៊ុកថា ពួកគាត់នឹងទៅចូលរួមគាំទ្រលើកទឹកចិត្តដល់កីឡាករ កីឡាការិនីគុនខ្មែរដល់សង្វៀនផ្ទាល់តែម្ដង៕
ចែករំលែកព័តមាននេះ