ខេត្តបាត់ដំបង ៖ ក្រុមក្មេងពាលស្រវឹងជោកចំនួន៤នាក់ បានត្រូវកម្លាំងនគរបាលព្រហ្មទណ្ឌផ្នែកបង្ក្រាបបទល្មើសជិះម៉ូតូប្រដេញតាមក្របួចជាប់យកមកព្រមានយ៉ាងចាស់ដៃក្រោយពីក្រុមនេះព្យាយាមជិះម៉ូតូគេចផុតពីគោលដៅត្រួតពិនិត្យអាវុធជាតិផ្ទុះនាពេលយប់រួចលើកដៃបាយៗបែបចំអកយ៉ាងព្រហើនដាក់សមត្ថកិច្ច កាលពីវេលាម៉ោង៨និង២០នាទីយប់ ថ្ងៃទី១ មីនា នៅចំណុចផ្លូវភ្លោះខាងកើតរង្វង់មូលលោកតាដំបូងគ្រញូង ក្នុងក្រុងបាត់ដំបង។
លោកអនុសេនីយ៍ឯក គឹម ពន្លក ដែលបានដេញតាមក្របួចក្រុមក្មេងទំនើងទាំង៤នាក់នេះ មានប្រសាសន៍ថា សមត្ថកិច្ចរបស់លោកគ្រាន់តែផ្លុំកញ្ចែបញ្ឈប់ម៉ូតូពួកគេក្នុងគោលបំណងពិនិត្យ ឆែកឆេររកអាវុធជាតិផ្ទុះ ឬសំភារបទល្មើស ស្រាប់តែពួកគេជិះត្រឡប់ក្រោយយ៉ាងលឿន រួចលើកដៃបាយៗជាសញ្ញាបែបចំអកឱ្យសមត្ថកិច្ចទៀត ។ ក្រុមក្មេងពាលនេះបានបង្ហាញពីចរិតព្រហើនបំផុត ធ្វើឱ្យសមត្ថកិច្ចក្តៅក្រហាយ ទើបលោកជិះម៉ូតូតាមក្របួចបានមកវិញ ដើម្បីព្រមាន ។
ក្រុមនេះជិះម៉ូតូ១គ្រឿង៤នាក់ ហើយស្រវឹងជោករៀងៗខ្លួនទៅហើយ ។ ពួកគេមាន ១-ឈ្មោះរិ ទូ អាយុ២៥ឆ្នាំ ២-ឈ្មោះភូ មិន អាយុ១៨ឆ្នាំ ៣-ឈ្មោះហេ ម៉ាន់ អាយុ១៩ឆ្នាំ និង៤-ឈ្មោះណុច លើម អាយុ១៦ឆ្នាំ ទាំង៤នាក់រស់នៅភូមិអូរដំបង២ ឃុំអូរដំបង២ ស្រុកសង្កែ ។ នៅពេលធ្វើការសាកសួរពីរឿងជិះម៉ូតូរត់ ពួកគេឆ្លើយថា ព្រោះខ្លាចសមត្ថកិច្ចចាប់ផាកពិន័យមួកសុវត្ថិភាព ។ ដោយឡែករឿងលើកដៃបាយៗដាក់សមត្ថកិច្ចពួកគេនិយាយថា «បាយៗលេង»។
លោកជេត វណ្ណនី ស្នងការរងនគរបាលខេត្តដែលបានដឹកនាំកិច្ចប្រតិបត្តិការដោយផ្ទាល់នាយប់នោះ ថ្លែងថា នេះជាគោលការណ៍របស់លោកស្នងការខេត្ត ដែលបញ្ជាឱ្យលោកចុះតាមគោលដៅដើម្បីត្រួតពិនិត្យអាវុធជាតិផ្ទុះ ឬឆែកឆេររកសំភារល្មើសច្បាប់ ប៉ុន្តែសមត្ថកិច្ចរបស់លោកតែងជួបប្រទះមិនឈប់ឈរនូវពួកក្មេងទំនើងដែលមិនបង្កការងាយស្រួលដល់កម្លាំងសមត្ថកិច្ចត្រួតពិនិត្យ ហើយយើងគ្រាន់តែធ្វើការអប់រំដល់ពួកគេប៉ុណ្ណោះ មិនដាក់ទោសទណ្ឌលើពួកគេទេ ។ លោកបានបញ្ជាក់ថា យើងត្រូវតែបន្តធ្វើដើម្បីភូមិ-ឃុំមានសុវត្ថិភាព៕
ចែករំលែកព័តមាននេះ