ទីក្រុងប៊ែរឡាំង ៖ ការសិក្សាមួយបានរកឃើញថា ការងារប្រមាណ៦០ម៉ឺនកន្លែងជុំវិញពិភពលោកនឹងអាចត្រូវបានបាត់បង់ ប្រសិនបើប្រទេសអង់គ្លេសចាកចាញពីសហភាពអឺរ៉ុប (EU) ដោយមិនមានកិច្ចព្រមព្រៀងច្បាស់លាស់ ។ ក្នុងនោះ ប្រទេសអាល្លឺម៉ង់ នឹងទទួលរងការប៉ះពាល់ខ្លាំងជាងគេ ។
យោងតាមទីភ្នាក់ងារសារព័ត៌មាន Reuters បានឲ្យដឹងកាលពីថ្ងៃទី១២ កុម្ភៈ កន្លងមក បានឲ្យដឹងថា អ្នកស្រាវជ្រាវនៅវិទ្យាស្ថាន IWH នៅប៉ែកខាងកើតនៃប្រទេសអាល្លឺម៉ង់ បានលើកឡើងថាប្រសិនបើការនាំចេញរបស់ EU ទៅកាន់អង់គ្លេសធ្លាក់ចុះ២៥% បន្ទាប់ពីBrexit នៅការងារប្រមាណ១០,៣ម៉ឺនកន្លែង នឹងជួបហានិភ័យក្នុងប្រទេសអាល្លឺម៉ង់ និង៥ម៉ឺនកន្លែងទៀតនៅក្នុងប្រទេសបារាំង ។
សេដ្ឋវិទូបានបន្ថែមទៀតថា ផលប៉ះពាល់ពី Brexit នេះមិនមែនមានតែការបាត់បង់ការងារទេ ។ ពួកគេបានបន្តថា ៖« ព្រោះតែមានកង្វះពលករមានជំនាញជាច្រើនក្នុងប្រទេសអភិវឌ្ឍន៍ សហគ្រាសអាចនឹងព្យាយាមរក្សាបុគ្គលិកដោយកាត់បន្ថយម៉ោងធ្វើការ ឬបង្កើតទីផ្សារថ្មីៗជាដើម »។
គួរបញ្ជាក់ថា វានៅមិនទាន់ប្រាកដប្រជានៅឡើយថាតើប្រទេសអង់គ្លេសអាចសម្រេចបានកិច្ចព្រមព្រៀងមួយជាមួយនឹងEU មុនពេលការចាកចេញជាផ្លូវការនៅថ្ងៃទី២៩ ខែមីនាឬយ៉ាងណា បន្ទាប់ពីតំណាងរាស្ត្រភាគច្រើនកាលពីខែមុន បានប្រឆាំងនឹងកិច្ចព្រមព្រៀងរបស់លោកស្រីនាយករដ្ឋមន្ត្រី Theresa May ។
សេដ្ឋវិទូបានកត់សម្គាល់ទៀតថា ៖« ព្រោះតែទីផ្សារមានភាពតភ្ជាប់ជុំវុញពិភពលោក អ្នកផ្គត់ផ្គង់ក្រៅសហភាពអឺរ៉ុបក៏អាចទទួលរងការប៉ះពាល់ដែរ »។ ក្នុងប្រទេសទាំង២៧នៅEU មានការងារប្រមាណជិត១៨ម៉ឺនកន្លែងក្នុងក្រុមហ៊ុនដែលនាំចេញទៅកាន់ចក្រភពអង់គ្លេសដែលអាចជួបនឹងហានិភ័យ ។ ប៉ុន្តែពលករប្រមាណ៤៣,៣ម៉ឺននាក់បន្ថែមនៅEU និងជុំវិញពិភពលោក នឹងទទួលរងការប៉ះពាល់ ព្រោះក្រុមហ៊ុនរបស់ពួកគេលក់ទៅឲ្យក្រុមហ៊ុនដែលនាំចេញទៅកាន់ប្រទេសអង់គ្លេស។
វិស័យរថយន្តរបស់ប្រទេសអាល្លឺម៉ង់ នឹងទទួលរងការប៉ះពាល់ខ្លាំងជាងគេដែលអាចបង្កហានិភ័យដល់ការងារប្រមាណ១,៥ម៉ឺនកន្លែងដែលភាគច្រើនក្នុងក្រុមហ៊ុន Volkswagen និង BMW ជាដើម ៕
ចែករំលែកព័តមាននេះ