រាជធានីភ្នំពេញ ៖ កម្លាំងនគរបាលការិយាល័យប្រឆាំងបទល្មើសកម្មសិទ្ធិបញ្ហានៃនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃសហការជាមួយក្រុមមន្ត្រីកាំកុងត្រូលផែស្ងួតចុងទីក្រុងភ្នំពេញ បានបើកការចុះបង្ក្រាបសិប្បកម្មលួចលាក់ផលិតនំក្លែងក្លាយដ៏ធំមួយកន្លែងស្ថិតនៅចំណុចផ្ទះលេខ១៥៣ ផ្លូវបេតុង ភូមិដំណាក់ធំ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ កាលពីវេលាម៉ោង៩និង៣០នាទីព្រឹក ថ្ងៃទី១២ ខែកុម្ភៈ ឆ្នាំ២០១៩ ។
ប្រតិបត្តិការចុះបង្ក្រាបខាងលើធ្វើឡើង ក្រោមបញ្ជាផ្ទាល់របស់ឧត្តមសេនីយឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ និងមានការមានសម្របសម្រួលឯកភាពពីព្រះរាជអាជ្ញាររងអមសាលាដំបូងរាជធានីភ្នំពេញលោក ហ៊ឹង ប៊ុនថន ផងដែរ ។
ប្រភពមន្ត្រីនគរបាលអោយដឹងថា ការចុះបង្ក្រាបសិប្បកម្មខាងលើនេះ គឺធ្វើឡើងទៅតាមពាក្យបណ្តឹងរបស់ក្រុមហ៊ុន Srinanaporn Marketing Co.,Ltd ដែលជាម្ចាស់កម្មសិទ្ធិផ្តាច់មុខ លើផលិតផលនំកញ្ចប់មួយចំនួន ។
ជាក់ស្តែងក្នុងការចុះបង្ក្រាបកម្លាំងសមត្ថកិច្ចជំនាញរកឃើញថា ទីតាំងខាងលើពិតជាបានផលិតនំក្លែងក្លាយ និងក្លែងបន្លំពាណិជ្ជកម្មសញ្ញាម៉ាកនំ២ប្រភេទ គឺម៉ាក Lotus និង Bentoប្រាកដមែន ហើយក្នុងនោះកម្លាំងជំនាញដកហូតបាននំទាំង២ប្រភេទ សរុបចំនួន១៥បាវ ស្មើនឹង ៤៥១គីឡូក្រាម ។
សូមបញ្ជាក់ថា ទំនិញជានំទាំង២ប្រភេទខាងលើត្រូវនគរបាលសម្រេចដកហូតយកទៅរក្សាទុកនៅនាយកដ្ឋាននគរបាលប្រឆាំងបទល្មើសសេដ្ឋកិច្ចជាបណ្តោះអាសន្ន ។ ដោយឡែកម្ចាស់សិប្បកម្មឈ្មោះ ឡោ ស៊ុនធឿន ភេទប្រុស អាយុជាង៤០ឆ្នាំ ក៏ត្រូវនគរបាលនាំខ្លួនយកទៅសួរនាំបំភ្លឺបន្ថែមនៅនាយកដ្ឋានផងដែរ ហើយចំពោះវិធានការ ឬចំណាត់ការផ្លូវច្បាប់បែបណាទៀតនោះ គឺគេនៅពុំទាន់ដឹងនៅឡើយទេ ៕
ចែករំលែកព័តមាននេះ