អ្នកនិពន្ធ៖ ប្រេ វីន សហភាពអឺរ៉ុបបានចាប់ផ្តើមដំណើរការពិនិត្យលើការផ្អាកការលើកលែងពន្ធ សម្រាប់ទំនិញនាំចូលពីប្រទេសកម្ពុជា តាមគម្រោងអ្វីៗទាំងអស់ លើកលែងតែអាវុធដែលភាសាអង់គ្លេសហៅថា EBA(Everything But Arms)…
អ្នកនិពន្ធ៖ ប្រេ វីន
សហភាពអឺរ៉ុបបានចាប់ផ្តើមដំណើរការពិនិត្យលើការផ្អាកការលើកលែងពន្ធ សម្រាប់ទំនិញនាំចូល
ពីប្រទេសកម្ពុជា តាមគម្រោងអ្វីៗទាំងអស់ លើកលែងតែអាវុធដែលភាសាអង់គ្លេសហៅថា EBA(Everything But Arms) ។ ចំណែកសម្តេចតេជោ ហ៊ុន សែន បានប្រកាន់ជំហរ ហាក់ដូចជារឹង
មាំប្រឆាំងនឹងការគាបសង្កត់ណាមួយពីបរទេស ។
ក្រសួងការបរទេសកម្ពុជា កាលពីថ្ងៃទី១៣ កុម្ភៈ ក៏បានបញ្ចេញប្រតិកម្មយ៉ាងខ្លាំងទៅនឹងការបើកដំណើរការរបស់សហភាពអឺរ៉ុប កាលពីពីរថ្ងៃមុននោះដោយនិយាយថា ការសម្រេចចិត្តរបស់សហភាពអឺរ៉ុបនឹងធ្វើអោយប៉ះពាល់ដល់កម្មករជិត១លាននាក់ ។
ដោយពិចារណាទៅលើដំណើរការទាំងពីរនេះ វាហាក់ដូចជាមិនទាន់មានច្រកចេញនៅឡើយថា កម្ពុជាអាចនឹងរកដំណោះស្រាយបានជាមួយសហភាពអឺរ៉ុប ដើម្បីអោយបន្តការលើកលែងពន្ធ សម្រាប់ទំនិញនាំចូលពីប្រទេសកម្ពុជា ។ អ្នកជំនាញនៅក្នុងវិស័យកាត់ដេរបានសម្លឹងឃើញលទ្ធភាពតិចតួច ដែលសហភាពអឺរ៉ុប និងរដ្ឋាភិបាលកម្ពុជា អាចធ្វើការសម្របសម្រួលគ្នាដោយលើកឡើងថា បញ្ហានេះមានចរិតនយោបាយជាជាងសេដ្ឋកិច្ច ។
សហភាពអឺរ៉ុប ជាទីផ្សារធំជាងគេបំផុតសម្រាប់ការនាំចេញសម្លៀកបំពាក់ និងស្បែកជើងពីប្រទេស
កម្ពុជា ។ យោងតាមរបាយការណ៍របស់សហភាពអឺរ៉ុបបានបង្ហាញថា ការនាំចេញរបស់កម្ពុជាទៅកាន់សហភាពអឺរ៉ុប បានមានកំណើតជាប់រហូតពីមួយឆ្នាំទៅមួយឆ្នាំ ក្នុងរយ:ពេល១០ឆ្នាំចុងក្រោយ ចាប់តាំងពីឆ្នាំ២០០៧មក ។
ខណ:ដែលឆ្នាំ២០០៧ កម្ពុជាបាននាំចូលទៅសហភាពអឺរ៉ុបមានតម្លៃត្រឹមតែប្រមាន១ពាន់លានដុល្លារប៉ុណ្ណោះនោះ ការនាំចេញរបស់កម្ពុជា ទៅទីផ្សារអឺរ៉ុបមានតម្លៃរហូតដល់ជាង៥,៦ពាន់លានដុល្លារនៅឆ្នាំ២០១៧ ។ តួលេខនេះ បានបញ្ជាក់អំពីសារសំខាន់ដ៏ខ្លាំងបំផុតនៃទីផ្សារអឺរ៉ុប សម្រាប់ការនាំចេញរបស់កម្ពុជា ពិសេសវិស័យកាត់ដេរសម្លៀកបំពាក់។
ទំនិញកម្ពុជាអាចចូលទីផ្សារអឺរ៉ុបបានច្រើន ដោយសារតែការលើកលែងពន្ធ ដែលធ្វើអោយទំនិញពីកម្ពុជាមានភាពប្រកួតប្រជែងខ្លាំងជាងទំនិញពីប្រទេសផ្សេងទៀតដូចជា វៀតណាម បង់ក្លាដេស ឬភូមា ជាដើម។ ប៉ុន្តែមានការព្រួយបារម្ភថា នៅពេលដែលគ្មានការលើកលែងពន្ធនោះ សម្លៀកបំពាក់និងស្បែកជើងរបស់កម្ពុជានឹងបាត់ភាពប្រកួតប្រជែងនៅក្នុងទីផ្សារអឺរ៉ុប ហើយការនាំចេញពីប្រទេសកម្ពុជានឹងធ្លាក់ចុះដោយដាក់សម្ពាធដល់រោងចក្រកាត់ដេរនៅកម្ពុជាអោយពិបាកដកដង្ហើម។
ការបិទទ្វាររោងចក្រកាត់ដេរនៅកម្ពុជានឹងមានន័យថា នឹងធ្វើអោយប្រជាជនកម្ពុជាជាច្រើននឹងបាត់
បង់ការងារធ្វើ ។ វិស័យកាត់ដេរនៅកម្ពុជា បានផ្តល់ការងារធ្វើដល់មនុស្សជិតមួយលាននាក់និងផ្តល់ប្រយោជន៍ដល់មនុស្សផ្សេងទៀតប្រមាណជាបីលាននាក់ ។ វាសនារបស់មនុស្សទាំងនេះ អាចនឹងត្រូវប៉ះពាល់ នៅពេលដែលវិស័យកាត់ដេររបស់កម្ពុជាមានការធ្លាក់ចុះ។
នឹងត្រូវការពេលយ៉ាងតិច១៨ខែ ចាប់ពីថ្ងៃ ទី១២ខែកុម្ភះឆ្នាំ២០១៩ មុនពេលដែលវាអាចមានការសម្រេចចិត្តនិងចូលជាធរមាន វាទាមទារអោយមានការគិតគូរជាមុន ដើម្បីកាត់បន្ថយជាអតិប្បរិមាផលប៉ះពាល់នៃការផ្អាកពន្ធទៅដល់វិស័យកាត់ដេរកម្ពុជា និងជីវិតកម្មករនិងក្រុមគ្រួសាររបស់ពួកគេនឹងទាមទារ។
ការរក្សាបានស្ថេរភាពនៃវិស័យកាត់ដេរនឹិងធានាបានថាកម្មករកាត់ដេរនឹងមិនបាត់បង់ការងារធ្វើ។ ចំណែកបញ្ហាសង្គមនានាក៏មិនអាចកើតមានចេញពីវិបត្តិការងារនោះ។
អ្នកឯកទេសនៅក្នុងវិស័យកាត់ដេរបានអោយដឹងថា វិស័យកាត់ដេរនៅកម្ពុជានឹង មិនស្លាប់ ដោយសារតែការផ្អាកការលើកលែងពន្ឋនោះឡើយ ប៉ុន្តែអ្នកជំនាញរូបនោះ នៅតែព្រួយ បារម្ភ ថាវានឹងអាចមានផលប៉ះពាល់ច្រើន។ សមាគមរោងច្រកកាត់ដេរបាន ព្យាយាមពន្យល់ ដល់សហភាពអឺរ៉ុបអំពីផលប៉ះពាល់នៃការសម្រេចចិត្តរបស់អឺរ៉ុបចំពោះឧស្សាហកម្មកាត់ដេរទាំងមូលប៉ុន្តែការពន្យល់ទាំងនោះមិនបានផលឡើយរហូតមកទល់ពេលនេះ។
នៅពេលមានបញ្ហាពីខាងក្រៅដែលកម្ពុជាមិនអាចគ្រប់គ្រងបាន កម្ពុជាខ្លួនឯងត្រូវរកវិធីមួយ ចំនួនដើម្បីបំពេញនឹងការខាតបង់ដែលបណ្តាលមកពីការផ្អាកពន្ឋនោះ។ អ្នកទិញមានការយក ចិត្តទុកដាក់ទៅលើបញ្ហានៃតម្លៃ។ ដូច្នេះ កម្ពុជាអាចគិតចេញពីខាងក្នុងប្រទេសវិញ ដើម្បីធ្វើ យ៉ាង ណា អោយតម្លៃសម្លៀកបំពាក់និងស្បែកជើងនៅតែមានតម្លៃថោក អាចប្រកួតប្រជែងបាននឹងតម្លៃរបស់ប្រទេសវៀតណាមនិងប្រទេសផ្សេងទៀត ។
ការកាត់បន្ថយការចំណាយក្រៅផ្លូវការ ដែល មិនចាំបាច់ ការកាត់បន្ថយតម្លៃអគ្គីសនីនិងការផ្តល់ការអនុគ្រោះមួយចំនួនដែល រដ្ឋាភិបាលកម្ពុជាអាចនឹងធ្វើបាននឹងជួយកាត់បន្ថយការចំណាយ ទៅលើការផលិត សម្លៀកបំពាក់និងស្បែកជើងកម្ពុជា។ នេះជាអ្វីដែលវិស័យកាត់ដេរនៅកម្ពុជា នឹងចង់អោយ រដ្ឋាភិបាល ពិចារណា និងជួយដោះស្រាយ។ ទន្ទឹមគ្នានោះ ការពង្រីកទីផ្សារទៅកាន់ប្រទេស ផ្សេងទៀត ដូចជា ទៅកាន់ប្រទេសជប៉ុននិងចិនជាដើមក៏នឹងមានប្រយោជន៍ សម្រាប់ការនាំ ចេញសម្លៀកបំពាក់និងស្បែកជើងកម្ពុជា។
ចំណែកកម្មករវិញក៏ត្រូវចេះជួយខ្លួនឯងនៅក្នុងគ្រាលំបាកណាមួយដែលអាចនឹងកើតមាន។ នោះគឺការបង្កើតផលិតភាពការងារ។ តាមការស្រាវជ្រាងកម្មករកម្ពុជាមានប្រសិទ្ឋភាព ការងារ ទាបជាងប្រសិទ្ឋភាពការងារកម្មករវៀតណាម។ ដូច្នេះ វាចាំបាច់ដែលកម្មករត្រូវខិតខំ ធ្វើការដើម្បី បង្កើនផលិតភាពការងារដែលនឹងធ្វើអោយតម្លៃ ផលិតសម្លៀកបំពាក់ និងស្បែកជើងកម្ពុជានឹងបន្តមានភាពប្រកួតប្រជែង។
ទាំងរដ្ឋាភិបាល ទាំងរោងចក្រកាត់ដេរ ទាំងកម្មករកាត់ដេរខ្លួន ឯងត្រូវត្រៀម សម្រាប់ ស្ថានភាព ដ៏លំបាកដែលអាចនឹងកើតមានដោយសារការសម្រេចចិត្តជាផ្លូវការរបស់សហភាពអឺរ៉ុបដើម្បីផ្អាកការលើកលែងពន្ឋសម្រាប់ប្រទេសកម្ពុជា។
ការត្រៀមជាមុនបានល្អនឹងអាចជួយកម្ពុជាកាត់បន្ថយជាអតិប្បរិមានូវផលប៉ះពាល់ ដែលអាចនឹងកើតមានដោយសារតែការសម្រេចចិត្តណាមួយរបស់សហភាពអឺរ៉ុបដែលឈានដល់ការផ្អាកការលើកលែង
ពន្ធសម្រាប់កម្ពុជា ៕
ចែករំលែកព័តមាននេះ