រាជធានីភ្នំពេញ ៖ នៅលើសង្វៀនស៊ីអិនស៊ីថ្ងៃសុក្រ ទី១៥ កុម្ភៈខាងមុខនេះ មានការណាត់ជួបប្រកួតគ្នារវាងកីឡាករកម្ពុជា និងកីឡាករបរទេសចំនួន៣គូ។ ក្នុងនោះមាន២គូជួបប្រកួតកម្ពុជា-ថៃ និង១គូទៀត គឺជាការជួបប្រកួតគ្នាជាមួយអ្នកប្រដាល់ជើងខ្លាំងមកពីអង់គ្លេស។…
រាជធានីភ្នំពេញ ៖ នៅលើសង្វៀនស៊ីអិនស៊ីថ្ងៃសុក្រ ទី១៥ កុម្ភៈខាងមុខនេះ មានការណាត់ជួបប្រកួតគ្នារវាងកីឡាករកម្ពុជា និងកីឡាករបរទេសចំនួន៣គូ។ ក្នុងនោះមាន២គូជួបប្រកួតកម្ពុជា-ថៃ និង១គូទៀត គឺជាការជួបប្រកួតគ្នាជាមួយអ្នកប្រដាល់ជើងខ្លាំងមកពីអង់គ្លេស។
កីឡាករ ទេស សំខាន់ មកពីក្លិបកងពលតូចលេខ៧០ ដែលបានបាត់មុខពីលើសង្វៀនអស់ជាច្រើនខែរួចមកហើយនោះត្រូវបានគេរៀបចំឱ្យជួបប្រកួតជាមួយកីឡាករជើងខ្លាំងមកពីអង់គ្លេស Peter Trueman ក្នុងប្រភេទទម្ងន់៧១គីឡូក្រាម។ តាមពិតកីឡាករ ទេស សំខាន់ គឺជាអ្នកប្រដាល់ជើងចាស់មួយរូបដែលធ្លាប់មានបទពិសោធន៍នៅលើសង្វៀនជាយូឆ្នាំមកហើយ។
តែជាមួយនឹងការបាត់មុខពីលើសង្វៀនយូយ៉ាងនេះ មិនដឹងថា គេនៅមានកម្លាំងអាចទប់ទល់ប្រកួតជាមួយកីឡាករអង់គ្លេសម្នាក់នេះបានឬអត់នោះទេ? ម្យ៉ាងវិញទៀតទោះបីពីមុនមកត្រូវបានគេទទួលស្គាល់ថា ជាអ្នកប្រដាល់ដែលមានជំនាញខាងប្រើកែង និងជង្គង់យ៉ាងណាក៏ដោយ បើពុំមានការហ្វឹកហាត់ដិតដល់ទេនោះ គឺពិបាកសង្ឃឹមខ្លាំងណាស់។ កីឡាករជនជាតិអង់គ្លេសម្នាក់នេះ មិនធ្លាប់មកប្រកួតនៅស្រុកខ្មែរពីមុនមកនោះទេ។ តែអ្វីដែលធ្វើឱ្យ ទេស សំខាន់ ត្រូវបារម្ភនោះ គឺផ្នែកកម្លាំងតែម្ដង ទោះបីមានល្បិចប្រយុទ្ធល្អយ៉ាងណាក៏ដោយ តែកាលចាញ់កម្លាំងក៏ពិបាកដែរ។
កីឡាករ ពុទ្ធ ភារិន្ទ មកពីក្លិបពុទ្ធសេរីវង្សកីឡាពោធិ៍សែនជ័យ ជួបប្រកួតជាមួយកីឡាករថៃឈ្មោះ អក្ខរៈដេត ស.ផនឆៃ គូនេះប្រកួតគ្នាក្នុងប្រភេទទម្ងន់៥៧គីឡូក្រាម។ កីឡាករថៃម្នាក់នេះធ្លាប់មកប្រកួតនៅស្រុកខ្មែរពីរទៅបីរួចមកហើយ។ ហើយតាមតែធ្លាប់ដឹងថ្វីដៃប្រកួតរបស់គេមិនជាអន់ប៉ុន្មានឡើយ។ តែចំពោះ ពុទ្ធ ភារិន្ទវិញនោះ គ្រាន់តែជាអ្នកប្រដាល់ជើងថ្មីម្នាក់ប៉ុណ្ណោះ បទពិសោធន៍ប្រកួតក៏នៅខ្ចី ចិត្តក៏មិនសូវហ៊ានទៀត ដូច្នេះមិនដឹងថាគេអាចស៊ូប្រកួតជាមួយកីឡាករថៃម្នាក់បានដល់ទឹកទី៥ឬអត់នោះទេ?
ចំណែកកីឡាករ ម៉ឺន មេឃា មកពីសមាគមកីឡាប្រដាល់ក្រសួងការពារជាតិត្រូវជួបប្រកួតជាមួយកីឡាករថៃ យ៉តសុវីត វ៉.សុង នឹងក្នុងប្រភេទទម្ងន់៦០គីឡូក្រាម។ គូនេះប្រហែលជាមិនធ្វើឱ្យអ្នកទស្សនាខកបំណងឡើយ។ ម៉ឺន មេឃា ជាអ្នកប្រដាល់ចាស់វស្សាមួយរូប មានបទពិសោធន៍ប្រកួតពេញខ្លួន ផ្លែកែងនិងជង្គង់ អាចប្រើការបានយ៉ាស្ទាត់ជំនាញ ហើយមានកម្លាំងថែមទាំងមានចិត្តសឿងទៀតផង។
តែក៏មិនអាចមើលស្រាលលើកីឡាករថៃម្នាក់នេះបានដែរ ព្រោះ យ៉តសុវីត បើតាមតែគេធ្លាប់ដឹងជាអ្នកប្រដាល់ជើងខ្លាំងមួយរូបនៅស្រុកថៃ ដែលមិនងាយរកគូប្រកួតបានឡើយ។ ទោះជាយ៉ាងណាលោក ធន់ សុភា ដែលជាគ្រូបង្វឹកនោះអះអាងថា គូនេះ អាចស៊ីសងជាមួយគ្នាបាន។ ចំណែកសិស្សរបស់លោកមួយរយៈមកនេះ ក៏មានការខិតខំប្រឹងប្រែងហ្វឹកហាត់ណាស់ដែរ។
ចំណែកគូប្រកួតមិត្តភាពធម្មតាវិញនោះ នួន សុវណ្ណា រាជមកពីក្លិបតាឡីដំរីមានរិទ្ធប្រកួតជាមួយឡុង ហាក់ មកពីសមាគមកីឡាប្រដាល់ក្រសួងការពារជាតិ ខណៈមួយគូទៀត គឿប សុវណ្ណនឿត មកពីក្លិបអង្គរមានជ័យខេត្តសៀមរាបប្រកួតជាមួយ ឡុង ខេត្ត មកពីក្លិបខ្លារខិនមានរិទ្ធ៕
ចែករំលែកព័តមាននេះ