ខេត្តកំពង់ឆ្នាំង ៖ ថ្លែងទៅកាន់សិស្សនាយ នាយនគរបាលរងក្របខណ្ឌថ្មី លោកវរសេនីយ៍ឯក តុង អាន នាយកសាលានគរបាលជាតិភូមិភាគ៦បានលើកឡើងថា មកទីនេះគឺមក«រៀនឱ្យចេះ មិនមែនរៀនឱ្យតែចប់នោះទេ» ។ ម្យ៉ាងទៀត ដើម្បីគុណភាពរបស់កងកម្លាំងនគរបាលជាតិ គឺ«គ្មានការសម្របសម្រួលនោះឡើយ» ។ មានប្រសាសន៍បែបនេះ ក្នុងពិធីបើកវគ្គបណ្ដុះបណ្ដាលកម្រិតបឋមសិក្សាវិជ្ជាជីវៈ សម្រាប់សិស្សនាយ នាយនគរបាលរង លើកទី១៣ នៅសាលានគរបាលជាតិភូមិភាគ ៦ នាព្រឹកថ្ងៃទី១២ ខែកុម្ភៈឆ្នាំ ២០១៩ ។
លោកនាយកសាលានគរបាលជាតិភូមិភាគ៦ បានមានប្រសាសន៍ថា ដើម្បីគុណភាពក្នុងការបំពេញភារកិច្ចជាកងកម្លាំងនគរបាលជាតិ សិស្សដែលមកសិក្សានៅទីនេះ ត្រូវយកចិត្តទុកដាក់រៀនសូត្រហ្វឹកហាត់ដោយស្វ័យសិក្សា ទាំងទ្រឹស្តី និងទាំងការអនុវត្តជាក់ស្តែង ។
ត្រូវមានវត្តមានគ្រប់ពេលវេលាពេលប្រជុំជួរ និងគោរពវិន័យឲ្យបានខ្ជាប់ខ្ជួន ហាមដាច់ខាតចំពោះការប្រព្រឹត្តនូវសកម្មភាពខុសច្បាប់នានាពីព្រោះបណ្ឌិតសភាមិនមានការយោគយល់ ឬលើកលែងចំពោះសិស្សដែលមិនគោរពវិន័យ និង មិនបានបំពេញក្របខណ្ឌនានាតាមកម្មវិធីអប់រំនោះឡើយ ។ ត្រូវគោរពដាច់ខាតនូវខ្លឹមសារដែលបានចែងនៅក្នុងបទបញ្ជាផ្ទៃក្នុង បទបញ្ញត្តិ សេចក្តីសម្រេចនានា របស់បណ្ឌិត្យសភានគរបាលជាតិ។ ដើម្បីឲ្យបាន តាំងស៊ុប ក្នុងក្របខណ្ឌនគរបាលជាតិ លុះត្រាតែប្អូនប្អូនដែលជាកម្មសិក្សា ត្រូវប្រឹងប្រែងរៀនសូត្រឲ្យបានពិន្ទុល្អ និទ្ទេសល្អ ទើបឈានដល់ការប្រលងចូលក្របខណ្ឌនគរបាលជាតិបាន ។
ជាពិសេសការពង្រឹងវិន័យក្រមសីលធម៌ ការយកចិត្តទុកដាក់រៀនសូត្រ ដើម្បីកែប្រែអត្តចរិតឲ្យសមស្របជាកម្លាំងនគរបាលជាតិ ។ នៅទីនេះ គឺជាកន្លែង ដែលកែប្រែប្អូនៗ ពីជនស៊ីវិល មកជាកងកម្លាំងសមត្ថកិច្ច ដែលភាពរឹងមាំ ក្លាហាន សាកសមជាជាកម្លាំង ប្រដាប់អាវុធ នៅពេលត្រឡប់ទៅបំពេញភារកិច្ចក្នុងអង្គភាពដើមវិញ ទទួលការពេញចិត្ត និងកោតសរសើរ ពីថ្នាក់ដឹកនាំរបស់អង្គភាពរៀងៗខ្លួន។ ត្រូវចាំថាៈ សំរាប់សិស្សដែលបានទទួលពិន្ទុក្រោម ៦០ភាគរយ គឺមិនបានជាប់ក្នុងការប្រលងចូលក្របខណ្ឌនគរបាលជាតិនោះទេ ។
ចែករំលែកព័តមាននេះ