ខេត្តស្វាយរៀង ៖ តាមសេចក្តីរាយការណ៍បឋមបានឱ្យដឹងថា ចំការអំពៅស្ករចំនួន៨៣ហិកតាត្រូវបានអគ្គីភ័យលេបត្របាក់ស្ទើរសល់តែផេះ បង្កឱ្យមានការភ្ញាក់ផ្អើលវេលាម៉ោង១១និង១០នាទីព្រឹកនៅថ្ងៃទី១២ ខែកុម្ភៈ ឆ្នាំ២០១៩ស្ថិតនៅក្នុងឃុំគគីរសោម ស្រុកស្វាយទាប ខេត្តស្វាយរៀង។
ចំការអំពៅស្ករខាងលើជារបស់លោកកុយ សារ៉ន ត្រូវអគ្គិភ័យឆាបឆេះអស់ចំនួន៥៧ហិកតានិងជារបស់ក្រុមហ៊ុន សុផាត សំណាង ត្រូវអគ្គិភ័យឆាបឆេះអស់ចំនួន២៦ហិកតាផងដែរ។
បើតាមលោកកុយ សារ៉េន ជាម្ចាស់ចំការអំពៅស្ករបានឲ្យដឹងថា មុនពេលកើតហេតុ គេឃើញ កម្មករកំពុងកាប់អំពៅ និងមានម៉ាស៊ីនច្រូតក៏កំពុងតែច្រូតផងដែរ ស្រាប់តែសុខៗមានលេចជាអណ្តាតភ្លើងឆាបឆេះចម្ការអំពៅស្ករយ៉ាងសន្ធោសន្ធៅ ធ្វើឱ្យស្លឹកអំពៅហោះរាយប៉ាយពិបាកគ្រប់គ្រងស្ថានការណ៍ខ្លាំងណាស់។
លោកបានបន្តទៀតថា ខណៈភ្លើងកំពុងឆាបឆេះនោះ ក្រុមកម្មករនាំគ្នារត់មកការដ្ឋានដើម្បីមកយកត្រាក់ទ័រភ្ជួរកាត់ចំការអំពៅ និងបាញ់ទឹកពន្លត់ដែរ ប៉ុន្តែមិនបានជោគជ័យនោះទេ ដោយសារមានខ្យល់បក់កួចហើរស្លឹកអំពៅដែលឆេះមកកាត់ពីមុខត្រាក់ទ័រ ហើយការឆាបឆេះនោះគឺលឿនពេក ធ្វើឱ្យកម្មកររត់ស្ទើរពុំរួចផង។
ចំពោះមូលហេតុនៃការឆាបឆេះនេះគេនៅមិនទាន់ដឹងនៅឡើយទេ ។
នេះជាគ្រោះអគ្គីភ័យដំបូងនៅដើមឆ្នាំ២០១៩នេះ ខណៈកំពុងប្រមូលផលអំពៅស្ករ ក៏ត្រូវអគ្គិភ័យឆាបឆេះបណ្តាលឱ្យខូចខាតអស់ទាំងស្រុងតែម្តង ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ