ខេត្តបន្ទាយមានជ័យ ៖ បុរសកំសត់រស់នៅគ្មានញាតិក្រោមខ្ទមតូចមួយយកកន្ទេលធ្វើដំបូលលើដីចំណីផ្លូវ ក្នុងភូមិប្រាសាទត្បែង ឃុំបន្ទាយឆ្មារ ស្រុកថ្មពួក ពេលនេះបានទទួលថវិកាពីគ្រួសារសប្បុរសមួយ នៅក្រុងភ្នំពេញ តាមរយៈភ្នាក់ងារកោះសន្តិភាពប្រចាំខេត្តបន្ទាយមានជ័យ នៅរសៀលថ្ងៃទី១២ កុម្ភៈ នេះ ។ ថវិកាជូនបុរសកំសត់ខាងលើមានចំនួន១០ម៉ឺនរៀល ។
បុរសខាងលើឈ្មោះ ស៊ាង នឿន អាយុ៣៩ឆ្នាំ ពិការជើងស្តាំ គ្មានញាតិ ដោយអះអាងថា ឪពុកត្រូវគេបាញ់ស្លាប់ កាលពីសម័យសង្គ្រាម ឯម្តាយយកប្តីចុង រស់នៅក្នុងស្រុកសំពៅលូន ខេត្តបាត់ដំបង ហើយថា ធ្លាក់ខ្លួនពិការដោយសារដួលលើទូកនេសាទ ក្នងខេត្តរ៉ាក់យ៉ងប្រទេសថៃ កាលពីជាង៥ឆ្នាំមុន ។
ក្រៅពីគ្រួសារសប្បុរសខាងលើអាជ្ញាធរ និងជំនាញពាក់ព័ន្ធក្នុងស្រុកថ្មពួកមិនព្រងើយកន្តើយទេ ក៏បានជួយឧបត្ថម្ភថវិកាជាបន្តបន្ទាប់ផងដែរ ។ ហើយមួយរយៈចុងក្រោយនេះ ដោយមើលឃើញពីការលំបាកក្នុងការរស់នៅរបស់បុរសខាងលើ ថ្នាក់ដឹកនាំមន្ទីរពិសេសអាជ្ញាធរខេត្តបានយកបុរសខាងលើទៅឲ្យរស់នៅក្នុងមណ្ឌលមួយ ក្នុងក្រុងសិរីសោភ័ណ ដោយសុវត្ថិភាពហើយ ៕
ចែករំលែកព័តមាននេះ