ប្រទេសឥណ្ឌា ៖ ក្រុមអ្នកពន្លត់ភ្លើងនៃរដ្ឋធានីឥណ្ឌា បានរាយការណ៍ថា មនុស្សយ៉ាងតិច១៧នាក់ស្លាប់កាលពីថ្ងៃទី១២ ខែកុម្ភៈ មុនពេលព្រឹកព្រហាម ដោយសារភ្លើងឆេះសណ្ឋាគារមួយ នាភាគកណ្ដាលក្រុងញូវដែល្លី។
ភ្លើងបានឆាបឆេះសណ្ឋាគារ HOTEL ARPIT PALACE ស្ថិតនៅក្នុងសង្កាត់មានមនុស្សច្រើនកុះករនាកណ្ដាលរដ្ឋធានី ហើយបំផ្លាញជាន់ខាងលើបង្អស់។
លោក SUNIL CHOUDHARY អ្នកទទួលខុសត្រូវម្នាក់នៃក្រុមពន្លត់ភ្លើងនិយាយថា តុល្យការអ្នកស្លាប់នាពេលនេះមាន១៧នាក់ ក្នុងនោះមានកុមារម្នាក់ ពេលពួកគេប្រថុយលោតតាមបង្អួចមកក្រោមគេចពីអណ្ដាតភ្លើង។
អគ្គិភ័យកើតមានញឹកញាប់នៅឥណ្ឌា មកពីការធ្វេសប្រហែស និងការមិនគោរពបណ្ដាបទដ្ឋានសន្តិសុខ។ កាលពីខែធ្នូកន្លងទៅមនុស្ស៨នាក់ស្លាប់ហើយជាង១០០នាក់រងរបួស ក្នុងគ្រោះថ្នាក់ភ្លើងឆេះមន្ទីរពេទ្យមួយនៅទីក្រុងមុមបៃភាគខាងលិចប្រទេស៕ ប្រភពវីដេអូ ៖ News18 Digital
ចែករំលែកព័តមាននេះ