សហរដ្ឋអាមេរិកមានការព្រួយបារម្ភកាន់តែខ្លាំងចំពោះគ្រោះថ្នាក់នៃការឡើងថ្លៃប្រេងខ្ពស់ ហើយមានរយៈពេលយូររហូតដល់អាចបង្កឱ្យមានវិបល្លាសប្រេង ដ៏ពិតប្រាកដមួយ ទោះបីជាមានសុន្ទរកថាដែលមានការធានាធ្វើឡើងដោយអាជ្ញាធរក៏ដោយ ។ មេដឹកនាំមួយរូបរបស់ធនាគារកណ្តាលអាមេរិកវាយតម្លៃកាលពីថ្ងៃទី៣ មីនា ថា គ្រោះថ្នាក់មួយបែបនេះ អាចកើតមានដោយសារការឡើងថ្លៃប្រេងខ្ពស់ បណ្តាលមកពីការបះបោរប្រជាជននៅមជ្ឈិមបូព៌ា និងនៅអាហ្វ្រិកខាងជើង ។ មេដឹកនាំរូបនេះនិយាយថា ប្រសិនបើគេចង់វាយតម្លៃដោយប្រាកដដល់ភ័ព្វវាសនានៃសេដ្ឋកិច្ចអាមេរិកបន្តមានកំណើនក៏ត្រូវគិតដល់គ្រោះថ្នាក់នៃវិបល្លាសប្រេងដ៏យូរមួយដែរ ។
លោក DENNIS LOCKHART ដែលថ្លែងនៅផ្លរីដាគូសបញ្ជាក់ថា គេនៅតែគិតជានិច្ចដល់ភាពល្អប្រសើរនៃសេដ្ឋកិច្ចរបស់អាមេរិកដែលជាមហាអំណាចសេដ្ឋកិច្ចធំទីមួយលើពិភពលោក ។ ក៏ប៉ុន្តែចាប់ពីពេលនេះទៅគេត្រូវមានការប្រុងប្រយ័ត្នបន្តិចដែលពុំមែនដូចកាលពីប៉ុន្មានសប្តាហ៍មុននោះឡើយ ។
លោកបន្តថា សេដ្ឋកិច្ចអាចមានកំណើនក្នុងល្បឿនយ៉ាងលឿនមួយជាងសង្វាក់មធ្យមដែលយើងបានគ្រោងទុក ក៏ប៉ុន្តែព័ត៌មានពិភពលោកថ្មីៗអាចធ្វើឱ្យផុយស្រួយដល់ជញ្ជីងនៃគ្រោះថ្នាក់។
ប្រធានរបស់ផ្នែកត្រៀមដំបូងសហព័ន្ធអាមេរិក FED លោក BEN BERNANKE ក៏គូសបញ្ជាក់កាលពីថ្ងៃទី១ មីនា កន្លងមកនេះដែរថា ការឡើងថ្លៃប្រេងរយៈពេលយូរជាយថាហេតុ អាចគំរាមកំហែងដល់សេដ្ឋកិច្ចរបស់សហរដ្ឋអាមេរិកពេលកំពុងមានការងើបឡើងវិញ ៕
ចែករំលែកព័តមាននេះ