ប្រទេសឥណ្ឌា ៖ មនុស្សជាង១០០នាក់ស្លាប់ដោយសារផឹកស្រាលាយ កាលពីចុងសប្ដាហ៍កន្លងទៅនៅឥណ្ឌា ដែលនាំឲ្យមានប្រតិបត្តិការដ៏ធំមួយរបស់កងកម្លាំងប៉ូលិស ប្រឆាំងបណ្ដាទីតាំងផលិតស្រាលួចលាក់។ នេះជាសេចក្ដីរាយការណ៍កាលពីថ្ងៃទី១១កុម្ភៈ របស់អាជ្ញាធរនិងសារព័ត៌មានក្នុងស្រុក។
ជនរងគ្រោះច្រើននាក់ស្ថិតក្នុងមន្ទីរពេទ្យនានាក្នុងតំបន់មួយស្ថិតនៅចន្លោះ រដ្ឋអុតតាប្រាដេសនិងរដ្ឋUTTARAKHAND ភាគខាងជើងប្រទេស ហើយស្ថិតនៅចម្ងាយ១៥០គីឡូម៉ែត្រ ខាងជើងរដ្ឋធានីញូវដែល្លី។ តំបន់នោះមានមនុស្សស្លាប់ជាប់រដឹកដោយសារការផឹកស្រាលួចផលិត ចាប់តាំងពីយប់ថ្ងៃទី៨កុម្ភៈមក។
យោងតាមបណ្ដាសារព័ត៌មានឥណ្ឌាថា តុល្យការអ្នកស្លាប់ ចាប់តាំងពីថ្ងៃទី៨កុម្ភៈមកឡើងដល់១១៦នាក់ ហើយអាចមានខ្ពស់ជាងនេះទៀត។ មនុស្សជាង៣០០០នាក់សង្ស័យជាប់ទាក់ទិននឹងការរត់ពន្ធស្រា ត្រូវបានចាប់ខ្លួនបន្ទាប់ពីមានសោកនាដកម្មថ្មីនោះមក។
លោកSHAILEBDRA KUMAR SHARMA អ្នកនាំពាក្យប៉ូលិសស្រុកSAHARANPUR រដ្ឋអុតតាប្រាដេសដែលស្រង់ចំនួនអ្នកស្លាប់ក្នុងស្រុកនោះ ដោយពុលស្រាថាមាន៥៩នាក់ ថ្លែងទៅកាន់សារព័ត៌មានថា អ្នកស្លាប់ភាគច្រើនគឺកាលពីចុងសប្ដាហ៍ ហើយមនុស្សច្រើននាក់នៃបណ្ដាភូមិនៅជុំវិញ រងការពុល បញ្ជូនទៅកាន់មន្ទីរពេទ្យមូលដ្ឋាននានា។
ពលរដ្ឋក្រីក្រឥណ្ឌាជាច្រើនរយនាក់ ក្នុងមួយឆ្នាំៗបានត្រូវស្លាប់ដោយសារផឹកស្រាលាយ ដែលលក់ក្នុងតម្លៃថោក។ ពួកអ្នករកសីុរត់ពន្ធស្រាដើម្បីឲ្យស្រាខ្លាំង លក់ដាច់តែងយកអេតាណុលមកដាក់លាយ។ នៅឥណ្ឌាក្នុង១ឆ្នាំៗស្រាដល់ទៅ៥ពាន់លានលីត្រត្រូវបានគេផឹកហើយប្រមាណជា៤០%នៃស្រាទាំងនេះផលិតដោយខុសច្បាប់។ នេះបើយោងតាមការវាយតម្លៃរបស់សមាគម INTERNATIONAL SPIRITS AND WINE ASSOCIATION OF INDIA៕
ចែករំលែកព័តមាននេះ