គោជល់ ភេសជ្ជៈប៉ូវកម្លាំងទីមួយ ដែលរៀបចំព្រឹត្តិការណ៍ប្រដាល់ជើងឯកគុនខ្មែរ នៅតាមខេត្ត/ក្រុង

ថ្ងៃទី ១២ ខែ កុម្ភៈ ឆ្នាំ ២០១៩
ម៉ោង ១៦:០៤
សហការី

រាជធានីភ្នំពេញ ៖ គោជល់ អ្នកឧបត្ថម្ភកម្មវិធីប្រដាល់ឈានមុខមួយនៅកម្ពុជា បានក្លាយជាភេសជ្ជៈប៉ូវកម្លាំងទីមួយ ដែលរៀបចំព្រឹត្តិការណ៍ប្រដាល់ជើងឯកគុនខ្មែរ នៅតាមបណ្តាក្រុង-ខេត្តនានា។ ការប្រកាសបើកកម្មវិធី «ដំណើរឆ្ពោះទៅតាមខេត្ត/ក្រុង» របស់អ្នកតស៊ូគុនខ្មែរ គោជល់ ត្រូវបានធ្វើឡើងនៅក្នុងពិធីសន្និសីទសារព័ត៌មាននាថ្ងៃនេះ ។

លោក មាន សំអុល នាយកចាត់ការទូទៅ ភេសជ្ជៈប៉ូវកម្លាំង គោជល់ នៅកម្ពុជា មានប្រសាសន៍ថា តាមរយៈការឧបត្ថម្ភរបស់ គោជល់ កម្មវិធីប្រដាល់គុនខ្មែរមិនត្រឹមតែរៀបចំនៅក្នុងស្ថានីយទូរទស្សន៍ប៉ុណ្ណោះទេ គោជល់ បានរៀបចំកម្មវិធីប្រដាល់នៅតាមបណ្ដាខេត្ត ដែលជាស្រុកកំណើតរបស់កីឡាករ និងទស្សនិកជនមួយចំនួនទៀត។ ដូច្នេះទស្សនិកជនអាចទស្សនាការប្រដាល់ និងគាំទ្រកីឡាករនៅក្នុងខេត្ត/ក្រុងរបស់ខ្លួនផ្ទាល់តែម្តង។

យោងតាមប្រសាសន៍លោក ហួរ រតនៈ ប្រធានផ្នែកទីផ្សារ ទូរទស្សន៍ស៊ីអិនស៊ី បានឲ្យដឹងថា គោជល់ គឺជាភេសជ្ជៈប៉ូវកម្លាំងដំបូងគេដែលនាំយកកម្មវិធីប្រដាល់របស់ទូរទស្សន៍ ស៊ីអិនស៊ី ទៅកាន់ខេត្តនានា និងធ្វើការផ្សាយផ្ទាល់តាមប៉ុស្តិ៍ ស៊ីអិនស៊ី។ នេះគឺជាឱកាសល្អមួយ ដើម្បីទស្សនា និងគាំទ្រដល់កីឡាករវ័យក្មេងដែលកំពុងលេចធ្លោនៅតាមបណ្តាខេត្ត ហើយនេះគ្រាន់តែជាការចាប់ផ្តើម ប៉ុណ្ណោះ។ ស៊ីអិនស៊ី និងគោជល់ នឹងធ្វើការសិក្សាបន្ថែមលើលទ្ធភាពក្នុងការពង្រីកទៅតាមបណ្តាខេត្តផ្សេងៗទៀតនាពេលអនាគត។

កម្មវិធី «ដំណើរឆ្ពោះតាមទៅខេត្ត/ក្រុង» របស់ គោជល់ នឹងទៅកាន់ខេត្តបាត់ដំបង កំពង់ស្ពឺ កំពង់ធំ និងកំពង់ចាម ដើម្បីប្រកួតជ្រើសរើសកីឡាករវ័យក្មេងលេចធ្លោ និងបន្តប្រកួតយកខ្សែក្រវាត់នៅរាជធានីភ្នំពេញ។ ព្រឹត្តិការណ៍នៅតាមខេត្តនីមួយៗ ក៏មានការចូលប្រកួតពីកីឡាករជើងខ្លាំងល្បីឈ្មោះជាច្រើនផងដែរ។

នេះគឺជាលើកដំបូងសម្រាប់បងប្អូនដែលរស់នៅតាមបណ្តាខេត្តខាងលើក្នុងការទស្សនាព្រឹត្តិការណ៍ប្រដាល់គុនខ្មែរនៅនឹងខេត្តបងប្អូនផ្ទាល់តែម្តង។ ទស្សនិកអាច ចូលរួមគាំទ្រកីឡាករប្រចាំខេត្ត និងទស្សនាការប្រកួតរបស់កីឡាករជើងខ្លាំងល្បីឈ្មោះផងដែរ។ នៅក្នុងកម្មវិធីប្រដាល់នេះ ក៏មានការប្រគំតន្ត្រីដែលចូលរួមដោយ តារាចម្រៀងល្បី ខេម ទៀតផង។ នេះគឺជាព្រឹត្តិការណ៍ដ៏អស្ចារ្យតែមួយប្រចាំឆ្នាំ!

គោជល់ ផ្តួចផ្តើមកម្មវិធី ដំណើរឆ្ពោះទៅខេត្តក្រុង ក្រោមកិច្ចសហការជាមួយស្ថានីយទូរទស្សន៍ស៊ីអិនស៊ី និងសហព័ន្ធគុនខ្មែរ។ ព្រឹត្តិការណ៍ប្រដាល់គុនខ្មែរ នៅខេត្តបាត់ដំបងនៅថ្ងៃទី២៣ ខែកុម្ភៈ ឆ្នាំ ២០១៩ នៅខេត្តកំពង់ស្ពឺ នៅថ្ងៃទី ៣០ ខែមីនា ឆ្នាំ២០១៩ នៅខេត្តកំពង់ធំ នៅថ្ងៃទី ២៧ ខែមេសា ឆ្នាំ ២០១៩ និងនៅខេត្តកំពង់ចាម នៅថ្ងៃទី ៤ ខែឧសភា ឆ្នាំ ២០១៩។ កម្មវិធីនេះផ្សាយផ្ទាល់តាមប៉ុស្តិ៍ស៊ីអិនស៊ី ពីម៉ោង ៥៖៣០ នាទីដល់ម៉ោង ៨យប់៕ ដោយសហការ