សេអ៊ូល ៖ យោងទៅតាមភ្នាក់ងារសារព័ត៌មាន Yonhap News របស់កូរ៉េបានឲ្យដឹងកាលពីថ្ងៃទី១១ កុម្ភៈ កន្លងមកថា ក្រសួងហិរញ្ញវត្ថុកូរ៉េខាងត្បូងបានឲ្យដឹងថា បេក្ខជនឈរឈ្មោះធ្វើប្រធានធនាគារពិភពលោក (World Bank) គឺលោក David Malpass ដែលជាជម្រើសរបស់លោកប្រធានាធិបតី ដូណាល់ ត្រាំ (Donald Trump) ផងដែរនោះបានសន្យាថា នឹងសហការជាមួយនឹងកូរ៉េខាងត្បូងក្នុងការអភិវឌ្ឍន៍កូរ៉េខាងជើង និងក្នុងវិស័យផ្សេងៗដទៃទៀត ។
អំណះអំណាងនេះត្រូវបានលេចឡើងបន្ទាប់ពីលោក Hong Nam-Ki ដែលជារដ្ឋមន្ត្រីសេដ្ឋកិច្ចនិងហិរញ្ញវត្ថុកូរ៉េស្នើដល់ធនាគារពិភពលោកឲ្យដើរតួសំខាន់ក្នុងការផ្តល់ការគាំទ្រដល់ការអភិវឌ្ឍន៍កូរ៉េខាងជើងក្នុងករណីមានដំណើរការល្អលើការបោះបង់អាវុធនុយក្លេអ៊ែរ ។
លោកប្រធានាធិបតីត្រាំនឹងមានកិច្ចប្រជុំលើកទីពីរជាមួយនឹងអ្នកដឹកនាំ Kim Jong-un របស់កូរ៉េខាងជើងនៅថ្ងៃទី ២៧ដល់២៨ខែកុម្ភៈខាងមុខនេះនៅរដ្ឋធានីហាណូយរបស់ប្រទេសវៀតណាម ។
កាលពីឆ្នាំ ២០១៨ លោកប្រធានាធិបតី Moon Jae-in របស់កូរ៉េខាងត្បូងបាននិយាយនៅមហាសន្និបាតអង្គការសហប្រជាជាតិថាលោក Kim បានបង្ហាញភាពប្តេជ្ញាចូលរួមមូលនិធិរូបិយវត្ថុអន្តរជាតិ ធនាគារពិភពលោក និងភ្នាក់ងារអន្តរជាតិដទៃទៀត ។
លោក Mahmoud Moheildin ដែលជាអនុប្រធាន World Bank Group បាននិយាយកាលពីខែតុលាឆ្នាំ ២០១៨ ថា កូរ៉េខាងជើងត្រូវតែឆ្លងកាត់ដំណើរការចាំបាច់ដើម្បីទទួលបានការគាំទ្រពីសមាជិកប្រទេស ហើយវាអាចកើតមានឡើងបានលុះត្រាតែប្រទេសនេះគោរពតាមការសន្យាថានឹងបោះបង់ចោលកម្មវិធីផលិតអាវុធនុយក្លេអ៊ែរ ។
គួរបញ្ជាក់ដែរថា ការចូលជាសមាជិកធនាគារពិភពលោកនឹងជួយឲ្យកូរ៉េខាងជើងទទួលបានជំនួយហិរញ្ញវត្ថុ និងបច្ចេកទេសដែលមានសារៈសំខាន់ក្នុងការអភិវឌ្ឍន៍ហេដ្ឋារចនាសម្ព័ន្ធរបស់ពួកគេ ។
ជាមួយគ្នានេះផងដែរ លោក Malpass បានស្នើដល់កូរ៉េខាងត្បូងឲ្យគាំទ្រលោកក្នុងការឈរឈ្មោះជាប្រធានធនាគារពិភពលោកទៀតផង ហើយលោករដ្ឋមន្ត្រី Hong បាននិយាយថាកូរ៉េខាងត្បូងគាំទ្រដល់លោក Malpass ៕
ចែករំលែកព័តមាននេះ