រាជធានីភ្នំពេញ ៖ នារសៀលថ្ងៃ១១ ខែកុម្ភៈ មានព័ត៌មានទាន់ហេតុការណ៍មួយបានបង្ហោះផ្សាយក្នុងបណ្តាញសង្គមហ្វេសប៊ុកពីការចាប់ផ្សឹកព្រះតេជគុណ ហោ សុខុន ចៅអធិការវត្តច្បារអំពៅ ។ ប៉ុន្តែភ្លាមៗនោះ…
រាជធានីភ្នំពេញ ៖ នារសៀលថ្ងៃ១១ ខែកុម្ភៈ មានព័ត៌មានទាន់ហេតុការណ៍មួយបានបង្ហោះផ្សាយក្នុងបណ្តាញសង្គមហ្វេសប៊ុកពីការចាប់ផ្សឹកព្រះតេជគុណ ហោ សុខុន ចៅអធិការវត្តច្បារអំពៅ ។ ប៉ុន្តែភ្លាមៗនោះ លោក ផន ដាវី ប្រធានមន្ទីរធម្មការនិងសាសនារាជធានីភ្នំពេញបានថ្លែងថា ពុំមានការចាប់ផ្សឹកព្រះតេជគុណ ហោ សុខុន ព្រះចៅអធិការវត្តច្បារអំពៅ ដូចការផ្សាយនិងចែកចាយ តាមបណ្តាញសង្គមទេ គ្រាន់តែមានការសម្របសម្រួលជាមួយព្រះតេជគុណប៉ុណ្ណោះ ។
លោក ផន ដាវី បានប្រាប់ឱ្យដឹងថា នៅរសៀលថ្ងៃទី១១ ខែកុម្ភៈ ការសម្របសម្រួលមួយដឹកនាំដោយអភិបាលរាជធានីភ្នំពេញ លោក ឃួង ស្រេង ជាមួយមន្ទីរធម្មការនិងសាសនា គណៈសង្ឃ និងអាជ្ញាធរពាក់ព័ន្ធ បានជួបជាមួយព្រះតេជគុណ ហោ សុខុន នៅវត្តច្បារអំពៅដោយស្នើឲ្យព្រះអង្គបញ្ឈប់ការ Live វីដេអូមានថេរដីកា ពាក់ព័ន្ធទៅនឹងបញ្ហាប្រទេសជាតិតទៅទៀត ។ ក្រោយពីមានការសម្របសម្រួលរួចហើយ ព្រះតេជគុណ ហោ សុខុន បានទទួលយកការណែនាំរបស់អាជ្ញាធរ ព្រមទាំង Live វីដេអូឡើងវិញពាក់ព័ន្ធនឹងករណីដដែលនេះកុំឲ្យមានការយល់ច្រឡំតទៅទៀត ។
បញ្ហាទាក់ទងទៅនឹងព្រះតេជគុណ ហោ សុខុន នេះ គឺបន្ទាប់ពីសម្តេចក្រឡាហោម ស ខេង ឧបនាយករដ្ឋ មន្ត្រី រដ្ឋមន្ត្រីក្រសួងមហាផ្ទៃ បានច្រានចោលនូវការលើកឡើងថា សម្តេចមានលទ្ធភាពធ្វើឲ្យកម្ពុជារួចផុតពីទណ្ឌកម្មអន្តរជាតិ និងការដែលចាត់ទុកសម្តេចជាផ្កាយសំណាងរបស់កម្ពុជា ។
ប្រតិកម្មរបស់សម្តេចក្រឡាហោម គឺជាការឆ្លើយតបទៅនឹងព្រះតេជគុណ ហោ សុខុន ដែលជាចៅអធិការវត្តច្បារអំពៅ ។ កាល ពីថ្ងៃទី៩ ខែកុម្ភៈ សម្តេចក្រឡាហោមបានឆ្លើយតបទៅកាន់ព្រះតេជគុណ ហោ សុខុន ថា សម្តេចមានការរំភើបយ៉ាងខ្លាំង ប៉ុន្តែក៏មានការភ្ញាក់ផ្អើលយ៉ាងខ្លាំងណាស់ដែរចំពោះពាក្យពេចន៍នៅក្នុងសារនេះ ដែលមានន័យជាការលើកតម្កើងហួសនិស្ស័យ ។
សម្តេចក្រឡាហោម ស ខេង ចាត់ទុកថា សារនេះដូចជាបានធ្លាក់ចូលទៅក្នុងឧបាយកលរបស់អ្នកនយោបាយទុច្ចរិត ដែលតែងតែមានបំណងចង់បំបែកបំបាក់គណបក្សប្រជាជនកម្ពុជា ។ ប៉ុន្តែព្រះតេជគុណ ហោ សុខុន បានឆ្លើយតបវិញ នៅថ្ងៃបន្ទាប់ដោយ Live ក្នុងហ្វេសប៊ុកថា សម្តេចក្រឡាហោម មិនមានបាតដៃប្រឡាក់ឈាម គោរពព្រះមហាក្សត្រ និងជាអ្នកដឹកនាំមានចិត្តធ្ងន់ និងជាអ្នកប្រជាធិប តេយ្យជាដើម ។
សម្តេច ស ខេង អាចដឹកនាំប្រទេសបញ្ចៀសផុតពីការដាក់ទណ្ឌកម្មពីអន្តរជាតិ ក៏ដូចជារួចផុតពី ការផ្តាច់ប្រព័ន្ធអនុគ្រោះពន្ធ(EBA)របស់សហភាពអឺរ៉ុបផងដែរ ជាពិសេសធ្វើឲ្យមានយុត្តិធម៌សង្គម ដោះស្រាយបញ្ហាព្រំដែន ជនអន្តោប្រវេសន៍ និងប្រឆាំងអំពើពុករលួយ ។
ទោះជាយ៉ាងណាក៏ដោយ សម្តេចក្រឡាហោម ស ខេង បានអះអាងថា គ្រប់ជ័យជម្នះរបស់គណបក្សប្រជាជនកម្ពុជា មិនមែនកើតឡើងដោយសារតែអច្ឆរិយបុគ្គលណាមួយឡើយ តែគឺជាការប្រមូលផ្តុំនូវការខិតខំប្រឹងប្រែងរបស់ថ្នាក់ដឹកនាំ និងការចូលរួមគាំទ្រពីប្រជាពលរដ្ឋ ៕
ចែករំលែកព័តមាននេះ