អ្នកនិពន្ធ ៖ ប្រេវីន
បើកឆាក២០១៩ មិនទាន់បានក្តៅសាច់ផង នាយករដ្ឋមន្ត្រីកម្ពុជាបានមានវិធានការក្តៅដកមេបញ្ជាការ កងរាជអាវុធហត្ថខេត្តរតនគិរី ដែលបានអួតអាងពីការចែកលុយម្នាក់១០ម៉ឺនដុល្លារដល់កូនរបស់គាត់
បន្ទាប់ពីការចេញព្រះរាជក្រិត្យ ដោយព្រះមហាក្សត្រដើម្បីដកលោក គឹម រស្មី ពីតួនាទីមេបញ្ជាការ កងរាជអាវុធហត្ថខេត្តរតន:គីរីរួច សម្តេចតេជោក៏បានមានប្រសាសន៍ថា ប្រសិនបើមានករណីនេះតទៅទៀតមិនត្រូវលើកលែងឡើយ ។ អ្នកដែលធ្វើអន្តរាគមន៍ទប់ស្កាត់ទាំងឡាយ ក៏ត្រូវទទួលទណ្ឌកម្មដូចដូចគ្នា ។សុំយល់ថា ពេលវេលានេះ គឺជាពេលវេលាល្អបំផុត ដែលយើងត្រូវកែប្រែនូវអ្វីដែលជាកំហុសឆ្គង ។
សម្តេចតេជោក៏បានសម្តែងការព្រួយបារម្ភថា ផ្ទៃក្នុងរបស់គណបក្សកាន់អំណាច និងរដ្ឋាភិបាល បានមើលស្រាលគូប្រកួតដោយគិតថា គូប្រកួតបានស្លាប់ទៅហើយ ហើយពួកគេបានប្រព្រឹត្តិនូវអ្វីដែលមិនគួរប្រព្រឹត្តិផ្គើនជាមួយនឹងបទបញ្ជា ។
សម្តេចបានព្រមានថា ការមើលស្រាលសភាពការណ៍នោះអាចធ្វើអោយគណបក្សប្រជាជន ឈានដល់ស្លាប់បាន ប្រសិនបើយើងមិនដោះស្រាយបានបញ្ហានេះទេ ។ ដូច្នេះ សម្តេចមិនអនុគ្រោះឲ្យអ្នកណាក៏ដោយ ឋានៈប៉ុណ្ណាក៏ដោយ ដែលធ្វើរឿងមិនគប្បី ចំពោះភ្នែកមហាជន ។ យើងមិនទុកឲ្យគណបក្សប្រជាជនកម្ពុជា និងរាជរដ្ឋាភិបាល ត្រូវទទួលការបំផ្លាញដោយបុគ្គលណាម្នាក់នោះទេ ។
ប្រសាសន៍របស់សម្តេចបានបង្ហាញពីជំហរមិនអាចទ្រាំបាននឹងមន្ត្រីខិលខូច ដែលធ្វើអោយប៉ះពាល់ដល់ រដ្ឋាភិបាលផលប្រយោជន៍ប្រជាជន និងប្រទេសជាតិ ។
ហេតុការណ៍មួយនេះ អាចបញ្ជូនសារដល់មន្ត្រីទាំងអស់ថា ពួកគេមិនអាចធ្វើខ្លួនជា «សាច់មហារីក»ដែលរាលដាល និងបំផ្លាញរាងកាយរបស់រដ្ឋាភិបាលទាំងមូលបានឡើយ ។ ផ្ទុយមកវិញ មន្ត្រីទាំងអស់ ត្រូវតែបំពេញការងារ ដែលបម្រើដល់ផលប្រយោជន៍ប្រជាជន និងប្រទេសជាតិអោយបានល្អ ។
ស្ថានភាពនយោបាយនៅប្រទេសកម្ពុជា តម្រូវអោយរដ្ឋាភិបាលនិងមន្ត្រីទាំងអស់បង្កើនប្រសិទ្ធិភាពការងាររបស់ខ្លួន ដើម្បីទប់ទល់នឹងការឃោសនារិះគន់របស់អ្នកនយោបាយប្រឆាំង ដែលតែងតែនិយាយអំពីបញ្ហាពុករលួយ និងបក្សពួកនិយម ដែលប្រព្រឹត្តដោយមន្ត្រី ។ ការប្រព្រឹត្តិអំពើពុករលួយដោយមន្ត្រី ឬក៏ ការបង្ហាញភាពមានបានហួសហេតុរបស់មន្ត្រីនឹងក្លាយជាការដកដាវចេញពីស្រោមដោយហុចដងទៅអោយសត្រូវ។
ដូច្នេះ មន្ត្រីទាំងអស់មិនត្រូវថ្លើមធំផ្គើននឹងការតាំងចិត្តរបស់មេដឹកនាំ ដែលចង់បានរដ្ឋាភិបាលមួយដែលស្អាតស្អំ និងមានប្រសិទ្ធភាព បម្រើដល់ផលប្រយោជន៍ប្រជាជន និងប្រទេសជាតិឡើយ ៕
បើសិនជាមន្ត្រីទាំងនោះនៅតែបន្តថ្លើមធំប្រព្រឹត្តអំពើពុករលួយតទៅទៀតនោះ ពួកគេនឹងត្រូវព្រនង់ កាន់ តែធំជាមិនខាន៕
ចែករំលែកព័តមាននេះ