ខេត្តពោធិ៍សាត់ ៖ តាមសេចក្តីរាយការណ៍បឋមបានឲ្យដឹងថា កាលពីថ្ងៃទី១០ ខែកុម្ភៈ ឆ្នាំ២០១៩ ប្រជាពលរដ្ឋមានការភ្ញាក់ផ្អើលយ៉ាងខ្លាំង បន្ទាប់ពីប្រទះឃើញសាកសពបុរសម្នាក់ដេកស្លាប់ កណ្ដាលវាលស្រែ ស្ថិតក្នុងភូមិត្នោតទ្រេត សង្កាត់ផ្ទះព្រៃ ក្រុងពោធិ៍សាត់ ដោយមិនដឹងមូលហេតុ ។
សេចក្តីរាយការណ៍បានបន្តថា សមត្ថកិច្ចចុះពិនិត្យសាកសពបញ្ជាក់ថា ជនរងគ្រោះ មានសម្បុរខ្មៅស្រអែម អាយុប្រហែល៤០ឆ្នាំ ស្លៀកខោខូវប៊យ ពណ៌ទឹកប៊ិច និងពាក់អាវការ៉ូដៃវែង ពណ៌សលាយប្រផេះ ។ នៅលើដងខ្លួនពុំមានស្លាកស្នាមមុតដោយកាំបិត ពូថៅ ដាវ ឫក៏ស្នាមជាំ ដោយវាយនឹងដំបងដែលសង្ស័យថា ជាអំពើឃាតកម្មនោះទេ ។
ម្យ៉ាងវិញទៀតអ្នកស្រុកក្នុងភូមិត្នោតទ្រេតក៏ពុំមានអ្នកណាស្គាល់អត្តសញ្ញាណដែរ ។ សមត្ថកិច្ចសន្និដ្ឋានថា ជនរងគ្រោះអាចជាមនុស្សមកពីភូមិផ្សេង ហើយអាចស្លាប់ដោយសារស្រវឹងស្រាខ្យល់គ គាំងបេះដូង ឫក៏ជំងឺលើសឈាមជាដើម ។ ទោះយ៉ាងណានេះគ្រាន់តែជាការសន្និដ្ឋានតែប៉ុណ្ណោះ មិនអាចយកជាការនោះពិតទេ រីឯមូលហេតុពិតប្រាកដយ៉ាងណានោះ ស្ថិតនៅលើការស្រាវជ្រាវរបស់សមត្ថកិច្ច ៕
ចែករំលែកព័តមាននេះ