ខេត្តប៉ៃលិន ៖ អ្នកយកព័ត៌មានកាសែតកម្ពុជាថ្មី និងជាភ្នាក់ងារទូរទស្សន៍អាស៊ីអាគ្នេយ៍ប្រចាំខេត្តប៉ៃលិនលោក សេង សុវណ្ណារិទ្ធ ត្រូវបានអយ្យការអមសាលាដំបូងខេត្តប៉ៃលិនកោះហៅចូលក្នុងបន្ទប់ ដើម្បីបំភ្លឺជុំវិញបណ្តឹងព្រះចៅអធិការវត្តអូរប្រើស ព្រះនាម អ៊ុំ មង្គល ដោយប្តឹងចោទប្រកាន់ពីបទ«បរិហារបង្កាច់កេរ្តិ៍ជាសាធារណៈ» ដែលបានចុះផ្សាយពាក់ព័ន្ធរឿងព្រះចៅអធិការវត្តនេះរងការចោទថា ចាប់រំលោភប្រពន្ធគេបានសម្រេច កាលពីឆ្នាំ២០១៨កន្លងមក ដែលហេតុការណ៍កោះហៅនេះបានធ្វើឡើង កាលពីវេលាម៉ោង៨និង៤០នាទីព្រឹក ថ្ងៃទី១១ ខែកុម្ភៈ ឆ្នាំ២០១៩ ។
បើយោងតាមដីកាកោះហៅរបស់អយ្យកាអមសាលាដំបូងខេត្តចុះថ្ងៃទី២៤ ខែតុលា ឆ្នាំ២០១៨ លើសំណុំរឿងព្រហ្មទណ្ឌលេខ១៦៥ អ.ក ចេញដោយលោក ថុល គឹមហ៊ឹង ព្រះរាជអាជ្ញារងអមសាលាដំបូងខេត្តប៉ៃលិន កោះហៅលោក សេង សុវណ្ណារិទ្ធ (អ្នកកាសែត) ឱ្យចូលទៅកាន់អយ្យការអមសាលាដំបូងខេត្ត នៅថ្ងៃទី០៨ ខែកុម្ភៈ ឆ្នាំ២០១៩ វេលាម៉ោង៨និង៣០នាទីព្រឹក ដើម្បីសាកសួរពីដំណើររឿងដែលព្រះចៅអធិការវត្តអូរប្រើស អ៊ុំមង្គល ប្តឹងអ្នកពីករណីបរិហារ បង្កាច់កេរ្តិ៍ជាសាធារណៈដែលប្រព្រឹត្តនៅភូមិអូរប្រើស សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។ ប៉ុន្តែសម្រាប់ការចូលទៅបំភ្លឺនោះត្រូវបានតំណាងអយ្យការខេត្តពន្យាពេលរហូតដល់ថ្ងៃទី១១ ខែកុម្ភៈនេះវិញ ។
ប្រភពព័ត៌មានពីលោក សេង សុវណ្ណារិទ្ធ អ្នកសារព័ត៌មានបានរៀបរាប់ឲ្យដឹងថា ការប្តឹងផ្តល់ វាជាសិទ្ធសេរីភាពរបស់ជនរងគ្រោះ ឬជនសង្ស័យ ។ ប៉ុន្តែបណ្តឹងរបស់ព្រះចៅអធិការវត្តខាងលើក៏ដូចជា ដីកាកោះហៅរបស់តុលាការដែរ គឺលោកមិនបានផ្សាយបរិហារកេរ្តិ៍ ឬបង្កាច់បង្ខូចអ្វីនោះទេ ពោលលោកគ្រាន់តែចុះផ្សាយទៅតាមបណ្តឹងប្រជាពលរដ្ឋដែលប្តឹងព្រះសង្ឃពាក់ព័ន្ធនឹងករណីរំលោភសេពសន្ធវៈប្រពន្ធរបស់គេតែប៉ុណ្ណោះ ។ លោកបានបន្តថា ការដែលលោកដាក់ផ្សាយតាមកាសែត និងទូរទស្សន៍នេះ គឺលោកបានធ្វើបទសម្ភាសន៍ជាមួយជនរងគ្រោះជាមួយសាក្សីដឹងហេតុការណ៍ជាមួយមន្ត្រីជំនាញមន្ទីរធម្មការ និងសាសនា សមត្ថកិច្ចជំនាញ ជាពិសេសបានធ្វើបទសម្ភាសន៍ជាមួយព្រះចៅអធិការវត្តអូរប្រើស ដែលរងការចោទប្រកាន់តែម្តង ។
លោកបានបញ្ជាក់ថា ក្រឡាបញ្ជីបានសួរនាំអស់រយៈពេលជាង៣ម៉ោងពីការដែលចុះផ្សាយកន្លងមក និងសួររកឯកសារពាក់ព័ន្ធដែលបានសម្ភាសន៍ជាមួយជនរងគ្រោះ និងព្រះសង្ឃផងដែរ ។ លោកក៏បង្ហាញជូនទាំងអស់ គឺមានគ្រប់គ្រាន់ព្រមទាំងមានសាក្សីដឹងឮផងដែរ ។ លោកសំណូមពរឱ្យខាងអយ្យការរកយុត្តិធម៌ជូនក្នុងនាមជនរងគ្រោះអាជីពជាអ្នកសារព័ត៌មានប្រចាំខេត្តប៉ៃលិន ។
បើយោងតាមកំណត់ហេតុរបស់ក្រុមការងារការពារសិទ្ធស្ត្រី និងកុមារដែលមានសមាសភាពចូលរួមពីអភិបាលរងខេត្តប៉ៃលិនមន្ត្រីជំនាញនៃមន្ទីរកិច្ចការនារីមន្ត្រីជំនាញនៃមន្ទីរសង្គមកិច្ច និងភាគីពាក់ព័ន្ធបានចុះស្រាវជ្រាវ ករណីព្រះចៅអធិការវត្តអូរប្រើសរំលោភសេពសន្ធវៈលើប្រពន្ធគេបានបញ្ជាក់ថា ករណីនេះជាករណីរំលោភសេពសន្ធវៈពិតប្រាកដមែនដោយកំណត់ហេតុនេះបានបញ្ចប់តាំងពីថ្ងៃទី២៧ ខែតុលា ឆ្នាំ២០១៨ កន្លងទៅហើយ រហូតមកដល់ពេលនេះព្រះចៅអធិការវត្តដែលរងការចោទប្រកាន់នៅមានសេរីភាពព្រមទាំងមានសិទ្ធិប្តឹងជនរងគ្រោះ និងអ្នកយកព័ត៌មានពីបទបរិហារបង្កាច់កេរ្តិ៍ជាសាធារណៈទៀតផង ។
គួររំលឹកដែរថា កាលពីកំឡុងពេលខែតុលា ឆ្នាំ២០១៨កន្លងទៅភា្នក់ងារទូរទស្សន៍អាស៊ីអាគ្នេយ៍ប្រចាំខេត្តប៉ៃលិនត្រូវប្រជាពលរដ្ឋម្នាក់ទូរស័ព្ទឲ្យចុះទៅយកព័ត៌មានពាក់ព័ន្ធនឹងករណីព្រះចៅអធិការវត្តអូរប្រើសរំលោភសេពសន្ធវៈប្រពន្ធគេ ហើយអ្នកយកព័ត៌មានក៏បានចុះទៅសម្ភាសន៍ជនរងគ្រោះដោយជនរងគ្រោះលើកឡើងថា ព្រះចៅអធិកាវត្តអូរប្រើសបានចាប់រំលោភសេពសន្ធវៈលើរូបគាត់ចំនួនពីរដងសុទ្ធតែបានសម្រេច ព្រមទាំងគំរាមសម្លាប់មួយពូជទៀតផងដែរ បើហ៊ានប្រាប់គេឲ្យដឹង ក្នុងនោះភ្នាក់ងារព័ត៌មានក៏បានចុះសម្ភាសន៍សាក្សីដែលដឹងហេតុការណ៍ដោយលើកឡើងថា វាជារឿងពិតប្រាកដ ។ ពាក់ព័ន្ធនឹងការចោទប្រកាន់នេះ ព្រះចៅអធិការវត្តអូរប្រើសព្រះនាម អុំ មង្គល ក៏បានផ្តល់បទសម្ភាសន៍ជាមួយអ្នកយកព័ត៌មានដែរថាវាជារឿងគំនុំទំនាស់បុគ្គលទាំងស្រុង និងសូមធ្វើការបដិសេធផងដែរ ៕
ចែករំលែកព័តមាននេះ