យោងតាមកាសែតអេហ្ស៊ីប AL-AKHBAR ចេញផ្សាយកាលពីថ្ងៃទី២ មីនា ថា ប្រធានាធិបតីអេហ្ស៊ីបត្រូវផ្តួលរំលំលោកហូស្នី មូបារ៉ាក់ អាយុ៨២ឆ្នាំ បានទទួលការព្យាបាលជំងឺមហារីកនៅអារ៉ាប៊ី សាអូឌីត ។
កាសែតនោះដែលដកស្រង់ប្រភពព័ត៌មានច្បាស់ការអះអាងថា លោកហូស្នី មូបារ៉ាក់ បច្ចុប្បន្ន ស្ថិតនៅក្នុងមូលដ្ឋានយោធាមួយនៃទីក្រុង TABOUK ហើយទទួលការព្យាបាលជំងឺមហារីកពោះវៀនធំ និងលំពែង ។ លោកទទួលព្យាបាល CHIMIOTHERAPIE រៀងរាល់៥ថ្ងៃ។
យោងតាមកាសែត AL AKHBAR ថា អតីតប្រធានាធិបតីអេហ្ស៊ីបរូបនេះបានទៅកាន់ទីក្រុងនៅភាគពាយ័ព្យអារ៉ាប៊ី សាអូឌីត នេះ រយៈពេលប៉ុន្មានថ្ងៃមកហើយ ក្រោយលោកចាកចេញពីអំណាចដែលលោកបានប្រគល់ទៅឱ្យកងទ័ពកាលពីថ្ងៃទី១១ កុម្ភៈ កន្លងមកនេះ ក្រោយការបះបោររបស់ប្រជាជន ។ ភរិយារបស់លោក លោកស្រីស៊ូហ្សាន និងកូនប្រុសទាំង២ លោកអាឡាអេ និងលោកហ្គាម៉ាល់ ក៏ស្ថិតនៅឯមូលដ្ឋានយោធាអារ៉ាប៊ី សាអូឌីត នោះដែរ ។
អាជ្ញាធរអេហ្ស៊ីបកាលពីថ្ងៃទី២៨ កុម្ភៈ កន្លងមកនេះបានចេញការហាមឃាត់មិនឱ្យលោកហូស្នី មូបារ៉ាក់ និងគ្រួសារចាកចេញពីដែនដីអេហ្ស៊ីប ហើយសំរេចផ្អឹបទុកទ្រព្យសម្បត្តិរបស់ពួកគេនៅអេហ្ស៊ីប ៕
ចែករំលែកព័តមាននេះ