ប្រទេសថៃ ៖ យោងតាមសេចក្តីរាយការណ៍របស់ Bangkok Post ដែលបានចេញផ្សាយកាលពីថ្ងៃសៅរ៍ បានឲ្យដឹងថា រដ្ឋាភិបាលថៃបានសន្យាថា នឹងចុះឈ្មោះចូលជាសមាជិកកិច្ចព្រមព្រៀងស៊ីជម្រៅ និងដំណើរការទៅមុខសម្រាប់ភាពដៃគូពាណិជ្ជកម្មឆ្លងសមុទ្រប៉ាស៊ីហ្វិក…
ប្រទេសថៃ ៖ យោងតាមសេចក្តីរាយការណ៍របស់ Bangkok Post ដែលបានចេញផ្សាយកាលពីថ្ងៃសៅរ៍ បានឲ្យដឹងថា រដ្ឋាភិបាលថៃបានសន្យាថា នឹងចុះឈ្មោះចូលជាសមាជិកកិច្ចព្រមព្រៀងស៊ីជម្រៅ និងដំណើរការទៅមុខសម្រាប់ភាពដៃគូពាណិជ្ជកម្មឆ្លងសមុទ្រប៉ាស៊ីហ្វិក (CPTPP) ។
កាលពីថ្ងៃសុក្រ កន្លងមកលោកឧប្បនាយករដ្ឋមន្ត្រី Somkid Jatusripitak បានបញ្ជាដល់ក្រសួងពាណិជ្ជកម្មឲ្យផ្ញើពាក្យសុំធ្វើជាសមាជិកកិច្ចព្រមព្រៀង CPTPP ខណៈដែលរដ្ឋាភិបាលនៅកាន់អំណាច ។
ខណៈដែលលោកបានធ្វើដំណើរទៅកាន់ក្រសួងដើម្បីពិភាក្សាពីបញ្ហានេះជាមួយនឹងមន្ត្រីថ្នាក់ខ្ពស់ លោកបានបញ្ជាឲ្យអ្នកចរចាពាណិជ្ជកម្មឲ្យខិតខំសម្រេចកិច្ចព្រមព្រៀងដៃគូពាណិជ្ជកម្ម RCEP ក្នុងឆ្នាំនេះផងដែរ ។
លោក Somkid បាននិយាយថា «គោលជំហរច្បាស់លាស់របស់រដ្ឋាភិបាលទាក់ទិននឹង CPTPP និង RCEP នឹងជួយជំរុញដល់ស្ថានការពាណិជ្ជកម្មនិងការវិនិយោគ»។
លោកស្រី Chutima Bunyapraphasara ដែលជារដ្ឋមន្ត្រីពាណិជ្ជកម្មស្តីទីប្រចាំប្រទេសថៃបាននិយាយថាក្រសួងនឹងមានកិច្ចប្រជុំជាមួយនឹងក្រុមការងារដែលធ្វើការលើ CPTPP ក្នុងខែនេះដើម្បីពិចារណាលើការសិក្សាពីអត្ថប្រយោជន៍ និងផលប៉ះពាល់នៃកិច្ចព្រមព្រៀងថ្មី ។
នៅខែមិនា ក្រសួងនឹងរៀបចំផ្ញើសំណើរទៅកាន់ទីស្តីការគណៈរដ្ឋមន្ត្រីដើម្បីសម្រេចថាប្រទេសថៃគួរតែចូលរួមក្នុងកិច្ចព្រមព្រៀង CPTPP ឬទេ ។ ពេលដែលសំណើរត្រូវបានការអនុញ្ញាតឲ្យនោះ សំណើរផ្លូវការនឹងត្រូវបានផ្ញើចេញ ។
កាលពីឆ្នាំ ២០១៨ ការធ្វើពាណិជ្ជកម្មទៅវិញទៅមករបស់ប្រទេសថៃជាមួយនឹងប្រទេសទាំង ១១ដែលជាសមាជិក CPTPP ស្មើ ១៤៨.៧ប៊ីលានដុល្លារ ដែលប្រទេសថៃនាំចេញបាន ៧៧ប៊ីលានដុល្លារ ឬស្មើ ៣០.៥%នៃការនាំចេញសរុបរបស់ប្រទេសថៃ ។ ប្រទេសថៃមានអតិរេកពាណិជ្ជកម្មប្រមាណ ៥.៣ប៊ីលានដុល្លារជាមួយនឹងសមាជិកទាំង ១១ផងដែរកាលពីឆ្នាំមុន ។
អ្នកស្រី Chutima បាននិយាយថា រដ្ឋាភិបាលព្រួយបារម្ភពីបញ្ហាមួយចំនួនដូចជាការការពាររោងកច្រប្រភេទថ្មី និងការការពារកម្មសិទ្ធិបញ្ញាជាដើម។
យ៉ាងណាក្តី រដ្ឋាភិបាលបានសន្យាថានឹងចេញវិធានការសាកសមសម្រាប់ភាគីចូលរួមដែលទទួលរងការប៉ះពាល់ពីការសម្រេចចិត្តរបស់ប្រទេសថៃក្នុងការចូលជាសមាជិករបស់ CPTPP ៕
ចែករំលែកព័តមាននេះ