រាជធានីភ្នំពេញ ៖ ស្ត្រីម្នាក់ជិះម៉ូតូឌុបពីម្តុំកាំកូលស៊ីធីមកលោតទឹកសម្លាប់ខ្លួននៅស្ពានជ្រោយចង្វារមិនបានសម្រេច ត្រូវសមត្ថកិច្ចឃាត់យកទៅសួរនាំ តែមិនទាន់បានប៉ុន្មាននាទីផង ស្រាប់តែមានស្ត្រីម្នាក់ទៀតខូចចិត្តរឿងប្តីរត់មកលោតទឹកម្នាក់ទៀត តែមិនបានសម្រេចបំណងដូចគ្នា ហេតុការណ៍នេះបានកើតឡើង កាលពីវេលាម៉ោង១១យប់ ថ្ងៃទី១០ ខែកុម្ភៈ ឆ្នាំ២០១៩ តាមបណ្តោយផ្លូវជាតិលេខ៦ នៅចំណុចលើស្ពានជ្រោយចង្វារ ស្ថិតនៅក្នុងសង្កាត់ជ្រោយចង្វារខណ្ឌជ្រោយចង្វារ ។
សាក្សីដែលឃើញហេតុការណ៍បានអោយដឹងថា មុនពេលកើតហេតុគេបានឃើញស្ត្រីម្នាក់មិនស្គាល់អត្តសញ្ញាណវ័យជាង៣០ឆ្នាំជិះម៉ូតូឌុបមកពីម្តុំរង្វង់មូលកាំកូលស៊ីធីមកដល់លើស្ពានជ្រោយចង្វារ សង្ស័យមានវិបត្តិរឿងប្តីបានសម្រេចមកលោតទឹកសម្លាប់ខ្លួនសំណាងល្អត្រូវបានសមត្ថកិច្ចយាមនៅគោលដៅនោះជួយឃាត់បានទាន់ពេលវេលា រួចយកទៅប៉ុស្តិ៍ ដើម្បីសួរនាំតែមិនបានប៉ុន្មាននាទីផង ក៏ស្រាប់តែមានស្ត្រីម្នាក់ទៀតខូចចិត្តរឿងប្តីដើរបណ្តើរយំបណ្តើរបម្រុងទៅលោតទឹកសម្លាប់ខ្លួនម្នាក់ទៀត ត្រូវបានអ្នកដំណើរតាមផ្លូវនោះឃាត់ជាប់រួចជួយទំនាក់ទំនងហៅប្តីរបស់គាត់មកទទួលយកត្រឡប់ទៅផ្ទះវិញ ដោយរង់ចាំប្រមាណជា១០នាទីប្តីរបស់គាត់បានមកដល់ដឹកប្រពន្ធយកទៅផ្ទះវិញ។
ក្រោយពេលកើតហេតុខាងក្រុមគ្រួសាររបស់ស្ត្រីរងគ្រោះទី១ ក៏បានមកទទួលយកពីប៉ុស្តិ៍ជ្រោយចង្វាររួចដឹកយកទៅផ្ទះបាត់ទៅដែរ ៕
ចែករំលែកព័តមាននេះ