ADផ្ទាំងផ្សព្វផ្សាយពាណិជ្ជកម្ម

ផ្អើលច្រកទ្វារអន្តរជាតិប៉ោយប៉ែត… ជនមិនស្គាល់មុខលួចបង្កៃគ្រឿងផ្ទុះ (មានវីដេអូ)

5 ឆ្នាំ មុន

បន្ទាយមានជ័យ
១១ ខែ កុម្ភៈ ឆ្នាំ ២០១៩ ម៉ោង ០៩:២២

ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា គ្រឿងផ្ទុះមិនទាន់ស្គាល់ម៉ាកមួយគ្រាប់ត្រូវបានជំនាញស៊ីម៉ាក់បំផ្លាញចោលមុខកាស៊ីណូជាប់ដងផ្លូវនៃច្រកទ្វារអន្តរជាតិប៉ោយប៉ែត ដែលមានសម្លេងកក្រើកកាលពីយប់ថ្ងៃទី១០ ខែកុម្ភៈ ឆ្នាំ២០១៩ បន្ទាប់ពីជនសង្ស័យមិនទាន់ស្គាល់មុខលួចបង្កៃក្នុងកាស៊ីណូមួយក្នុងក្រុងប៉ោយប៉ែត។ គ្រឿងផ្ទុះដែលគេលួចបង្កៃនេះ មានទ្រនិចដើរអាចជាគ្រឿងផ្ទុះកំណត់រយៈពេលវេលា…

សេចក្តីរាយការណ៍បន្តទៀតថាថា គ្រឿងបំផ្ទុះនោះត្រូវបានបុរសម្នាក់ជាអ្នកប្រទះឃើញក្នុងបន្ទប់ទឹកកាស៊ីណូហ្គោលដិន បន្ទាប់មកត្រូវគេយកមកដាក់ចំណុចបំផ្ទុះ (ប្រហោងលូ ឬរ៉ាហ្គា)និងដាក់សំបកកង់រថយន្តជាច្រើនដើម្បីបង្កាអំបែងគ្រាប់ បើសិនជាគ្រាប់នោះផ្ទុះដោយខ្លួនឯង។ ហើយនៅចំណុចកើតហេតុ មានសមត្ថកិច្ចជំនាញពាក់ព័ន្ធជាច្រើននៅការពារ និងរៀបចំសណ្តាប់ធ្នាប់មិនឲ្យប្រជាពលរដ្ឋចូលទៅជិតនោះទេ ។ ច្រកទ្វារអន្តរជាតិប៉ោយប៉ែតត្រូវបានហាមឃាត់មិនឲ្យឆ្លងកាត់។

នៅម៉ោងជិត8យប់ថ្ងៃដដែលខាងជំនាញកម្ចាត់មីនស៊ីម៉ាក់បានទៅដល់ និងពិនិត្យជាក់ស្តែងដែលមិនអាចទុកយូរបាន ដោយលោកឧត្តមសេនីយ៍ទោ អាត់ ខែម ស្នងការនគរបាលខេត្តបានប្រឹក្សាជាមួយជំនាញខាងលើ ឲ្យបំផ្ទុះ និងកន្លែងទទួលបានជោគជ័យ។ ក្រោយការបំផ្ទុះតាមជំនាញរបស់ក្រុមស៊ីម៉ាក់ក៏មានរថយន្តពន្លត់អគ្គិភ័យសម្រុកចូលបាញ់ទឹកចំណុចបំផ្ទុះនោះភ្លាមៗផងដែរ ដើម្បីបង្ការភ្លើងរាលដាល និងបំបាត់ក្លិនផ្ទុះនោះ។

ចំណែកបុរសដែលប្រទះឃើញគ្រឿងផ្ទុះក្នុងបន្ទប់ទឹកកាស៊ីណូ ត្រូវបានសមត្ថកិច្ចនាំយកទៅសួរនាំ ប៉ុន្តែគេមិនទាន់ប្រាប់ពីអត្តសញ្ញាណនៅឡើយទេ។ ចំណែកគ្រឿងផ្ទុះដែលជនមិនស្គាល់មុខលួចបង្កៃ ខាងជំនាញមិនទាន់ប្រាប់ឲ្យដឹងថា ជាប្រភេទអ្វី និងផលិតនៅប្រទេសណានៅឡើយដែរ។

គួរបញ្ជាក់ថា យប់មិញនេះក៏មានវត្តមានអភិបាលក្រុងប៉ោយប៉ែតលោកសាន ស៊ានហូ, លោកឧត្តមសេនីយ៍ត្រី សិទ្ធ ឡោះ ស្នងការរងផងដែរ។ លោកស្នងការបានប្រកាសតាមមេក្រូឲ្យអ្នកស្រុកចាកចេញពីចំណុចកើតហេតុ។ ហើយបច្ចុប្បន្ននេះជំនាញស៊ីម៉ាក់បានយកសំណល់នៃគ្រឿងផ្ទុះទៅពិនិត្យហើយ។

ព័ត៌មានលំអិតនឹងមានផ្សាយជូននៅលើកាសែតកោះសន្តិភាព