រាជធានីភ្នំពេញ ៖ សង្កាត់ចំនួន៤ដែលរាជរដ្ឋាភិបាលទើបកាត់បញ្ចូលក្នុងដែនរដ្ឋបាលក្រុងតាខ្មៅកាលពីដើមខែមករាឆ្នាំ២០១៩ រហូតមកដល់ពេលនេះ តម្លៃដីធ្លីនៅមិនទាន់មានសញ្ញាប្រែប្រួលគួរឱ្យកត់សម្គាល់នៅឡើយ ។
បើតាមប្រធានការិយាល័យបច្ចេកទេសសុរិយោដី និងភូមិសាស្ត្រ នៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកណ្ដាល លោក ប៉ោះ បូណា បានមានប្រសាសន៍ថា មកដល់ពេលនេះតម្លៃដីធ្លីនៅក្នុងសង្កាត់ទាំង៤ មិនទាន់មានអ្វីប្រែប្រួលទេ ហើយសកម្មភាពអភិវឌ្ឍន៍ក៏ពុំទាន់មានគម្រោងអ្វីដែលគួរឲ្យកត់សម្គាល់ដែរ ។ លោកលើកឡើងថា ៖« តម្លៃដីធ្លីនៅឃុំទាំង៤នេះកាលពីមុន វាខុសគ្នាទៅតាមទីតាំង និងទំហំ ។ ជាក់ស្ដែងដីជាប់ផ្លូវ ក្នុង១ម៉ែត្រការ៉េថ្លៃប្រមាណ៩០ដុល្លារ និងឆ្ងាយពីផ្លូវតម្លៃចន្លោះពី១០ទៅ២០ដុល្លារ តាមទីតាំងជាក់ស្តែង ហើយរហូតមកដល់ពេលនេះ មិនទាន់ប្រែប្រួលនៅឡើយ »។
លោក សៀ មុយខួច អនុប្រធានមន្ទីររៀបចំដែនដី គរូបីយកម្ម សំណង់ និងសុរិយោដី ខេត្តកណ្តាល បានមានប្រសាសន៍ដែរថា ឃុំទាំង៤ដែលកាត់បញ្ចូលទៅជាសង្កាត់ក្រុងតាខ្មៅនោះ មានឃុំស្វាយរលំ ,ឃុំសិត្បូ , ឃុំរកាខ្ពស់និងឃុំកោះអន្លង់ចិន ។
លោកបន្ដថា តម្លៃដីធ្លីនៅតំបន់ទាំង៤នេះវាបានប្រែប្រួលម្តងរួចមកហើយ បន្ទាប់ពីប្រមុខរាជរដ្ឋាភិបាលប្រកាសពីគម្រោងស្ថាបនាផ្លូវ៦០ម៉ែត្រ និងគម្រោងផ្សេងៗទៀត ។ ដូច្នេះបើទោះជាត្រូវបានកាត់បញ្ចូលមកជាសង្កាត់នៃក្រុងតាខ្មៅក្ដី ក៏វាមិនទាន់មានអ្វីប្រែប្រួលដែរ ។ ទោះជាយ៉ាងណា នៅថ្ងៃអនាគត វិស័យដីធ្លីក្នុងសង្កាត់ទាំង៤នេះនឹងប្រសើរឡើង ។ លោកថា ៖« ខ្ញុំគិតថា ដីនឹងមានការប្រែប្រួលតម្លៃបន្ថែមទៀតនាពេលខាងមុខនេះ »។
យោងតាមរបាយការណ៍ប្រចាំឆ្នាំ២០១៨របស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ឆ្នាំ២០១៨ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកណ្ដាល បានពិនិត្យនិងផ្តល់យោបល់លើសំណើសុំលិខិតអនុញ្ញាតសាងសង់១០២ច្បាប់ បើកការដ្ឋានសាងសង់ចំនួន២៧ច្បាប់, បិទការដ្ឋានចំនួន១១ច្បាប់, បន្តសុពលភាពប្រកបអាជីវកម្មក្រុមជាងចំនួន១ច្បាប់ និងប្រកបអាជីវកម្មក្រុមជាងចំនួន២ច្បាប់។ របាយការណ៍បញ្ជាក់ថា ឆ្នាំ២០១៨កន្លងមកនេះ មន្ទីរបានប្រមូលចំណូលពីវិស័យដីធ្លីនិងសំណង់សរុបមានប្រមាណជាង៥៨ម៉ឺនដុល្លារ ៕
ចែករំលែកព័តមាននេះ