ប្រទេសបារាំង ៖ សម្រាប់ថ្ងៃទី១៣នៃសកម្មភាពរបស់ពួកអាវកាក់លឿងបារាំង ទោះក្រសួងមហាផៃ្ទថាមានមនុស្សចូលរួមតិចជាងមុនក្ដី ក៏មានការប៉ះទង្គិចគ្នាពិសេសនៅក្រុងប៉ារីស ដោយបាតុករម្នាក់រងរបួសដាច់ដៃ។
ថ្ងៃទី១៣នៃចលនាជាតិរបស់ពួកអាវកាក់លឿង តាមក្រសួងមហាផ្ទៃថាមានមនុស្សចូលរួម ប្រមាណជាជិត៥១.៤០០នាក់នាថ្ងៃទី៩កុម្ភៈ តាមកន្លែងនានានៃប្រទេស។ ក្នុងបាតុកម្មទាំងនោះមានផ្ទុះអំពើហិង្សាពិសេសនៅក្រុងប៉ារីស។ ក្នុងរដ្ឋធានីបារាំងឧប្បត្តិហេតុនានា កើតមានពេលក្បួនបាតុកម្ម ហែមកដល់មុខសភាជាតិ ដែលនៅទីនោះបាតុករម្នាក់របួសដាច់ដៃ។
ចំណែកនៅទីក្រុងលីយ៉ុងនាថ្ងៃទី៩កុម្ភៈ បាតុកម្មរបស់ពួកអាវកាក់លឿង មានផ្ទុះការប៉ះទង្គិចគ្នារវាងមនុស្ស២ក្រុម ដែលពាក់អាវកាក់លឿងដូចគ្នា។ ក្រោយការដើរហែក្បួនបាន៣៩នាទីរបស់ពួកអាវកាក់លឿង មនុស្សប្រមាណជា៤០នាក់ពាក់អាវកាក់លឿងដែរ បានប្រវាយប្រតប់គ្នានៅទីលានLAFAYETTE។
ពួកអាវកាក់លឿងទាំង២ក្រុមនោះ ក្រុមមួយជាក្រុមស្ដាំនិយមជ្រុល ហើយក្រុមមួយទៀតជាក្រុមប្រឆាំងហ្វាស៊ីស្ត។ សាលាក្រុងលីយ៉ុងអំពាវនាវឲ្យមានការប្រុងប្រយ័ត្ន ចំពោះពួកដែលបន្លំខ្លួនក្នុងចំណោមពួកបាតុករ។ ការប៉ះទង្គិចគ្នាមានរយៈពេល១០នាទី ហើយបញ្ចប់ពេលមានអន្តរាគមន៍របស់កងកម្លាំងសន្តិសុខ ដែលបាញ់ឧស្ម័នបង្ហូរទឹកភ្នែក។ ការប៉ះទង្គិចគ្នាបណ្ដាលឲ្យជនស៊ីវិលរបួសច្រើននាក់៕
ចែករំលែកព័តមាននេះ