សហរដ្ឋអាមេរិក ៖ ប្រធានាធិបតីអាមេរិកលោកដូណាល់ត្រាំ លាតត្រដាងកាលពីថ្ងៃទី៨កុម្ភៈថា គឺក្រុងហាណូយរដ្ឋធានីវៀតណាម ដែលនឹងជាកន្លែងនៃការជួបគ្នាកំពូលលើកទី២ រវាងរូបលោក និងមេដឹកនាំកូរ៉េខាងជើងលោកគីមជុងអ៊ុន។ គេដឹងរួចហើយពីឈ្មោះប្រទេសដែលត្រូវ រៀបចំការជួបគ្នាកំពូលលើកទី២នោះ តែមុននេះពុំទាន់ដឹងពីទីកន្លែងពិតប្រាកដ។
ក្នុងសារតាមTWITTER លោកត្រាំសរសេរថា បណ្ដាដំណាងរបស់ខ្ញុំ ទើបនឹងចាកចេញពីកូរ៉េខាងជើង ក្រោយកិច្ចប្រជុំសំខាន់មួយ ដែលមានលក្ខណៈស្ថាបនាបំផុត។ ការជួបគ្នាកំពូលនឹងប្រព្រឹត្តទៅនៅក្រុងហាណូយប្រទេសវៀតណាម ពីថ្ងៃទី២៧ទៅ២៨កុម្ភៈ។ លោកអះអាងថា លោកប្រញាប់ជួបជាមួយលោកគីម ហើយធ្វើឲ្យបុព្វហេតុសន្តិភាពមានការជឿនលឿនទៅមុខ។
យោងតាមក្រសួងការបរទេសអាមេរិកថា បេសកជនអាមេរិក និងសមភាគីកូរ៉េខាងជើង ក្នុងកិច្ចប្រជុំនៅក្រុងព្យុងយ៉ាង បានលើកពីការរំសាយនុយក្លេអ៊ែរទាំងស្រុង ពីការកែលម្អទំនាក់ទំនងរវាងកូរ៉េខាងជើងនិងសហរដ្ឋអាមេរិក ព្រមទាំងពីការបង្កើតសន្តិភាព ដ៏ស្ថិតស្ថេរមួយនៅឧបទ្វីបកូរ៉េ។ ភាគីទាំង២បានព្រមព្រៀងជួបគ្នា ជាថ្មីមុនថ្ងៃទី២៧កុម្ភៈ៕
ចែករំលែកព័តមាននេះ