ខេត្តត្បូងឃ្មុំ ៖ គ្រោះអគ្គិភ័យមួយបានកើតឡើងក្នុងរដូវប្រាំង ដោយបានលេបត្របាក់លំនៅឋានរបស់ប្រជាពលរដ្ឋចំនួន៤ខ្នង បង្កឱ្យមានការភ្ញាក់ផ្អើលកាលពីព្រឹកថ្ងៃទី០៧ កុម្ភៈ ឆ្នាំ២០១៩ ស្ថិតនៅក្នុងភូមិជាំទ្រៀក ឃុំត្រមូង ស្រុកមេមត់ បើគិតទំហំនៃខូចខាតទ្រព្យសម្បត្តិសរុបប្រមាណជាង១០ម៉ឺនដុល្លារ ។ មានការលេចឮថាគ្រោះមហន្តរាយនេះបង្កដោយភ្លើងដុតសំរាមទៅវិញ។
បើតាមអ្នកស្រី តឹះ ខុនណា អាយុ៥៦ឆ្នាំ ប្រាប់ឲ្យដឹងកាលពីរសៀលថ្ងៃទី៨ ខែកុម្ភៈ ២០១៩ថា នៅព្រឹកថ្ងៃកើតហេតុភ្លើងឆេះផ្ទះថ្ងៃទី០៧កុម្ភៈកន្លងទៅ គាត់បានចេញពីផ្ទះទៅលក់ដូរនៅឯផ្សារបាត់ ក្រោយមកស្រាប់តែមានគេមកតាម និងឌុបតាមម៉ូតូមកផ្ទះ ក៏ឃើញភ្លើងឆាបឆេះយ៉ាងសន្ធោរសន្ធៅពេញបន្ទុក ផ្សែងហុយខ្មួលខ្មាញ់ទៅលើអាកាស ខណៈនោះមិនបានជញ្ជូនទ្រព្យសំខាន់ៗចេញមកក្រៅឡើយ ។
ចំណែកអ្នកស្រី ខុន ណា ប្រាប់បន្តថា ដំបូងកូនស្រីរបស់គាត់កំពុងតែបោកខោអាវនៅក្នុងបន្ទប់ក្រោយផ្ទះ ខណៈពេលភ្លើងបានឆេះចេញពីផ្ទះទី១ តិចៗចេញពីជាន់ខាងលើនោះ ក៏មានតាម្នាក់បានស្រែកហៅឲ្យកូនស្រីរបស់គាត់ហៅថា «តឿអើយ! ចេញពីផ្ទះមកយកដងទឹកពន្លត់» បន្ទាប់មកកូនស្រីបានចេញមក ស្រាប់តែឃើញភ្លើងឆេះពីផ្ទះដែលមានរបងព័ទ្ធជុំវិញ ។
កូនស្រីគាត់ស្តាប់ឮចេញមកមើល គឺភ្លើងបានឆេះ ប្រសិនណាបើយឺតយាវបន្តិចនោះ កូននឹងត្រូវគ្រោះថ្នាក់មិនខាន។ ខណៈនោះរត់ចេញមកក្រៅដោយនាំក្មួយតូចម្នាក់ដោយចងពុងសារុង ព្រមទាំងបណ្តើរម៉ូតូចេញមកក្រៅរកកន្លែងសុវត្ថិភាព ក្នុងពេលនោះមនុស្សអ៊ូអរច្រើន ស្រាប់តែបាត់ចៅក្មួយស្រីអាយុ៥ឆ្នាំនោះ លុះពេលតាមរកទៅក៏ឃើញយំនៅនឹងចិញ្ចើមថ្នល់ឆ្ងាយពីកន្លែងផ្ទះឆេះ ។
ចំណែករូបគាត់(ខុនណា)វិញមកដល់មុខផ្ទះ បំរុងរត់ចូលទៅជញ្ជូនរបស់របរ តែត្រូវគេចាប់ទាញចេញមកវិញ ចំពោះទ្រព្យសម្បត្តិគាត់បាត់បង់មានលុយជាង៤លានរៀល ស្រូវជាង២០បាវ រួមនឹងទ្រព្យផ្សេងៗទៀត ជាមួយនោះក៏មានបណ្តាញសង្គមបានបង្ហោះភ្លើងឆេះផ្ទះអស់ចំនួន៤ ដោយមានការលើកឡើងថា ករណីនេះបណ្តាលមកពីកូនស្រីគាត់ដុតសំរាម ទើបបណ្តាលឲ្យមានគ្រោះអគ្គិភ័យកើតឡើង ដែលបង្កចេញពីផ្ទះគាត់ (ខុនណា) ហើយភ្លើងបានឆាបឆេះទៅផ្ទះទី១ ដែលមានខណ្ឌដោយរបងបេតុង ។
ចំពោះការចោទប្រកាន់នេះ គាត់សូមបដិសេធទាំងស្រុងមិនពិតទេ។ ក្រោយកើតហេតុមួយថ្ងៃត្រូវបានខាងកាកបាទក្រហមចុះមកចែកអំណោយចំនួន៤គ្រួសារដែលត្រូវបានភ្លើងឆេះនៅព្រឹកថ្ងៃទី៨ កុម្ភៈ។
បើតាមនគរបាលមូលដ្ឋានវិញបានប្រាប់ឲ្យដឹងដែរថា ក្នុងពេលដែលមានគ្រោះអគ្គោភ័យកើតឡើងត្រូវបានលោកឧត្តមសេនីយ៍ទោ បែន រ័ត្ន ស្នងការនគរបាលខេត្តបញ្ជាឲ្យរថយន្តពន្លត់អគ្គិភ័យចំនួន៤គ្រឿង និងរថយន្តចំការកៅស៊ូមេមត់០១គ្រឿងទៀត បានចេញមកជួយបាញ់ទឹកពន្លត់។ បើសរុបនៃការខូចខាតវិញគិតជាទឹកប្រាក់ប្រមាណជាង១០ម៉ឺនដុល្លារ ម្រេច៧តោន ម៉ូតូ២គ្រឿង តែមិនបានប្តឹងប្តល់គ្នាទេ៕
ចែករំលែកព័តមាននេះ