រាធានីភ្នំពេញ ៖ ជនសង្ស័យ២នាក់ធ្វើសកម្មភាពឆក់កាបូបយួរដៃពីស្ត្រីជនជាតិចិនធ្វើដំណើរតាមកង់បី (ផាស់អេប) បានសម្រេច ហើយគេចខ្លួនបាត់ស្រមោល ដោយសុវត្ថិភាពមិនរំខានសមត្ថកិច្ច កាលពីវេលាម៉ោង២២និង៥០នាទីយប់ ថ្ងៃទី០៩ ខែកុម្ភៈ ឆ្នាំ២០១៩ នៅតាមបណ្តោយផ្លូវសហព័ន្ធរុស្សីភូមិតាងួន សង្កាត់កាកាប់១ ខណ្ឌពោធិ៍សែនជ័យ ។
ស្ត្រីរងគ្រោះឈ្មោះ DAI SIBO អាយុ៤៥ឆ្នាំ ជនជាតិចិន មុខរបរអ្នកគ្រប់គ្រងក្រុមហ៊ុន
ស្នាក់នៅខុនដូរ អាគាលេខ១០៨៥ផ្លូវ៣៧១សង្កាត់ស្ទឹងមានជ័យ ខណ្ឌមានជ័យ ។
ប្រភពបានឲ្យដឹងថា មុនកើតហេតុគេឃើញស្ត្រីជាជនជាតិចិនបានជិះផាស់អេប ពណ៌លឿងធ្វើដំណើរពីមុខព្រលានយន្តហោះអន្តរជាតិភ្នំពេញ ក្នុងទិសដៅលិចទៅកើត ខណៈមកដល់ចំណុចខាងលើ ស្រាប់តែមានជនសង្ស័យ២នាក់ ជិះម៉ូតូមួយគ្រឿងម៉ាកឌ្រឹមសង់ សេ១២៥ ពណ៌ខ្មៅ មិនចាំស្លាកលេខ តាមពីក្រោយមកធ្វើឆក់យកកាបូបយួរកាន់ជាប់ដៃ ពេលនោះបានប្រតាយប្រតប់ទៅវិញទៅមក តែដណ្តើមបានតែដៃកាបូបប៉ុណ្ណោះ ចំណែកកាបូបចោរឆក់យកទៅបាត់ដោយសុវត្ថិភាព ។ ក្នុងកាបូប មានលុយដុល្លារ៩៦៥ដុល្លារ កាតATMចំនួន០៨ បាស្ព័រមួយ និងឯកសារមួយចំនួន។
សកម្មភាពប្រព្រឹត្តបទល្មើសឆក់ខាងលើត្រូវបានប្រជាពលរដ្ឋរិះគន់សមត្ថកិច្ច សង្ស័យមេប៉ុស្តិ៍ មិននាំកូនចៅដើរល្បាតទើបជាឱកាសជនល្មើសដើរធ្វើសកម្មភាពឆក់កាបូបបានយ៉ាងងាយបែបនេះ ។
ជនរងគ្រោះក្រោយកើតហេតុបានត្រឹមដើរគ្រវីក្បាលហួសចិត្ត ត្បិតបទល្មើសដូចជា ងាយៗ ស្រែកដង្ហោយហៅរកប៉ូលិស តែគ្មានឃើញមាន តែរត់ទៅប្តឹងនៅប៉ុស្តិ៍នគរបាលរដ្ឋបាលកាកាប១ ឲ្យជួយស្រាវជ្រាវ ៕
ចែករំលែកព័តមាននេះ