ខេត្តបន្ទាយមានជ័យ ៖ បុរសវ័យចំណាស់ម្នាក់បានស្លាប់ភ្លាមៗនៅនឹងកន្លែងកើតហេតុ និងយុវជនម្នាក់បានរងរបួសស្រាល ក្នុងគ្រោះថ្នាក់ចរាចរណ៍រវាងរថយន្តមួយគ្រឿងមានដឹកដំឡូងមីបុកជាមួយគោយន្តកន្ត្រៃមួយគ្រឿង ក្នុងទិសដៅស្របគ្នា ។
ហេតុការណ៍ខាងលើនេះបានកើតឡើងកាលពីវេលាម៉ោង១១និង៣០នាទីព្រឹកថ្ងៃទី៩ ខែកុម្ភៈ ឆ្នាំ២០១៩ លើកំណាត់ផ្លូវជាតិលេខ៥៦ A ត្រង់ចំណុចស្រះពីខាងត្បូងសឹករង ស្រុកថ្មពួកចម្ងាយ៥០ម៉ែត្រ ស្ថិតក្នុងភូមិថ្មដែកកេះ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ។
ជនរងគ្រោះដែលស្លាប់ឈ្មោះ ណែម រ៉ាត់ ភេទប្រុស អាយុ៥៧ឆ្នាំ រស់នៅភូមិអណ្តូងខ្លុង ឃុំគំរូ ស្រុកថ្មពួក ជាអ្នករួមដំណើរ រីឯអ្នកបើកបរគោយន្តកន្ត្រៃឈ្មោះ កូណ ដូង ភេទប្រុស អាយុ២៥ឆ្នាំ រស់នៅភូមិអណ្តូងខ្លុង ឃុំគំរូ បានរងរបួសស្រាល ។ ចំណែកភាគីខាងរថយន្តមួយគ្រឿងមានដឹកដំឡូងមី ម៉ាកមីតស៊ុយប៊ីស៊ី ក្បាលពណ៌ស ពាក់ស្លាកលេខ ប.មានជ័យ ៣A.១២៨៧ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ស្រមោល ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ មានរថយន្តដឹកដំឡូងមីមួយគ្រឿងបានធ្វើដំណើរពីទិសខាងជើងទៅត្បូង លុះមកដល់ចំណុចកើតហេតុ បានបុកគោយន្តកន្ត្រៃពីក្រោយ បណ្តាលឲ្យអ្នកបើកបរគោយន្តកន្ត្រៃរងរបួសស្រាល រីឯអ្នករួមដំណើរម្នាក់ស្លាប់បានស្លាប់ ចំណែកអ្នកបើកបររថយន្តបានរត់គេខ្លួនបាត់ស្រមោល ។
ក្រោយពេលកើតហេតុ នគរបាលជំនាញចរាចរណ៍ស្រុកបានចុះធ្វើការវាស់វែង រួចនាំយករថយន្ត និងគោលយន្តកន្ត្រៃទៅរក្សាទុកនៅអធិការដ្ឋាននគរបាលស្រុក រង់ចាំធ្វើការដោះស្រាយនៅពេលក្រោយ៕
ចែករំលែកព័តមាននេះ