រាជធានីភ្នំពេញ ៖ ក្រសួងសុខាភិបាល កាលពីថ្ងៃទី៧ កុម្ភៈ បានសេចក្តីជូនដំណឹងផ្លូវការមួយ គឺហាមឃាត់ការនាំចូលលក់ចែកចាយ និងផ្សព្វផ្សាយតាមបណ្តាញសង្គមហ្វេសប៊ុក (Facebook) នូវឱសថបំប៉នផ្លូវភេទបុរស ឈ្មោះRésistance ដែលគ្មានចុះបញ្ជីការ និងគ្មានច្បាប់អនុញ្ញាតពីក្រសួងសុខាភិបាលនោះ ។
ក្រសួងសុខាភិបាលបានលើកឡើងថា ក្រសួងសូមជម្រាបជូនដល់សាធារណជនទាំងអស់ឱ្យបានជ្រាបថាយោងតាមការពិនិត្យលើបណ្តាញសង្គមហ្វេសប៊ុករៀងរាល់ថ្ងៃ មានគណនីចំនួន៧បានកំពុងផ្សព្វផ្សាយលើឱសថបំប៉នផ្លូវភេទបុរស Résistanceមួយកំប៉ុង មាន៩០គ្រាប់ផលិតនៅប្រទេសបារាំង គ្មានអាសយដ្ឋានផលិតច្បាស់លាស់ គ្មានក្រុមហ៊ុននាំចូលត្រឹមត្រូវ គ្មានចុះបញ្ជី គ្មានការត្រួតពិនិត្យត្រឹមត្រូវ និងគ្មានការត្រួតពិនិត្យគុណភាព និងគ្មានការអនុញ្ញាតឱ្យផ្សព្វផ្សាយពីក្រសួងសុខាភិបាលទៀតផង ។
គណនីហ្វេសប៊ុកទាំង៧នោះ រួមមាន ១-បុរសខ្លាំងពិត, ២-កសិដ្ឋាលក់ផលិតផល មកពីបារាំង,៣-Resis-tance បុរសខ្លាំង, ៤-សុខភាពរបស់បុរស ,៥-ស្តេចថ្នាំជួយសុខភាព, ៦-បុរសខ្លាំងពិត និង ៧-Sova-vann healthy shops ។ ដែលគណនីទាំងនេះថែមទាំងផ្សព្វផ្សាយភូតកុហកបោកប្រាស់ និងបំផ្លើសហួសពីការពិត គ្មានមូលដ្ឋានវិទ្យាសាស្ត្រត្រឹមត្រូវ។
ក្រសួងបានអះអាងទៀតថា គេបានផ្សាយដូចជាការជួយសម្រួលក្រលៀន ក្រពេញប្រូស្តាតបុរស សម្រួលបញ្ហានោមញឹកឡើងអាស៊ីត សម្រួលការផលិតស្ករក្នុងសរសៃឈម សម្រូលការកន្ត្រាក់ដៃជើង ចង្កេះ ខ្នងតែបញ្ហាឆាប់ចេញដៃគូ ទន់ជ្រាយ ខ្សោយអស់កម្លាំង តូចខ្លី …។
ក្រសួងសុខាភិបាលបញ្ជាក់ថា ដើម្បីចៀសវាងការខាតបង់ប្រាក់កាស និងប៉ះពាល់ដល់សុខភាព ឬឈានទៅសល់ការបាត់បង់អាយុជីវិត (ដោយសសារការគាំងបេះដូងរបស់អ្នកប្រើប្រាស់នោះ ក្រសួងសុខាភិបាលសូមជូនដំណឹងដល់បងប្អូនទាំងអស់ កុំជឿការឃោសនាភូតកុហកបោកប្រាស់ខាងលើ និងឈប់ឲ្យប្រើប្រាស់ឱសថបំប៉នផ្លូវភេទបុរសដែលបានផ្សព្វផ្សាយទាំងអស់ខាងលើជាបន្ទាន់ ។
ចែករំលែកព័តមាននេះ