ប្រទេសអីុរ៉ង់ ៖ យោងតាមទីភ្នាក់ងារព័ត៌មានSEPAHរបស់កងទ័ពអីុរ៉ង់ថា កងកម្លាំងឆ្មាំបដិវត្តន៍អីុរ៉ង់បានលាតត្រដាងកាលពីថ្ងៃទី៧កម្ភៈ មីស៊ីលបណ្ដែតថ្មីអាចបាញ់បានចម្ងាយ១០០០គីឡូម៉ែត្រ។
ឧត្ដមសេនីយAMIRALI HAJIZADEH មេបញ្ជាការកងកម្លាំងអាកាស របស់កងឆ្មាំបដិវត្តន៍អីុរ៉ង់គូសបញ្ជាក់ថា មីសីុលថ្មីនោះមានឈ្មោះថាDEZFUL ជាមីស៊ីលថ្មីជាងមីសីុលបណ្ដែតធុនZOLFAGHAR ដែលអាចបាញ់បានចម្ងាយតែ៧០០គីឡូម៉ែត្រ។
អីុរ៉ង់ធ្លាប់ប្រកាសរួចហើយកាលពីថ្ងៃទី២កុម្ភៈ ពីការបាញ់្សាកល្បងប្រកបដោយជោគជ័យ មីស៊ីលបណ្ដែតធុន HOVEIZED ដែលអាចបាញ់បានចម្ងាយ លើសពី១៣៥០គីឡូម៉ែត្រ ហើយការសាកល្បងនោះធ្វើឡើងជួនពេលគ្នានឹងខួបលើកទី៤០ នៃបដិវត្តន៍អីុស្លាមអីុរ៉ង់។ ការបង្ហាញមីស៊ីលថ្មីកាលពីថ្ងៃទី៧កុម្ភៈ ធ្វើឡើងដោយលោកAMIRALI HAJIZADEH និងមេបញ្ជាការកងឆ្មាំបដិវត្តន៍ ឧត្ដមសេនីយMOHAMED ALI JAAFARI ក្នុងរោងចក្រផលិតមីស៊ីលមួយដែលពុំប្រាប់ទីតាំង។
កម្មវិធីបាលីស្ទិករបស់សាធារណរដ្ឋអ៊ីស្លាមអីិុរ៉ង់នាំឲ្យពួកលោកខាងលិចមានការព្រួយបារម្ភ ហើយចោទប្រកាន់អីុរ៉ង់ថា ចង់បង្កើនចម្ងាយបណ្ដាមីសីុលរបស់ខ្លួន ហើយបង្កអស្ថេរភាពនៅតំបន់មជ្ឈឹមបូព៌ាព្រមទាំងអីុស្រាអែល ជាសត្រូវដ៏ជូរចត់របស់ខ្លួន។ ឧត្ដមសេនីយអីុរ៉ង់មួយចំនួនតែងអះអាងថា ចង់កម្ទេចរដ្ឋអីុស្រាអែល។
អីុរ៉ង់សង្ឃឹមថាកម្មវិធីមីសីុលរបស់ខ្លួន គឺដើម្បីឆ្លើយតបចំពោះកិច្ចការពារសន្តិសុខជាតិហើយក្នុងគោលដៅការពារ និងថាបញ្ហានេះមិនអាចចរចាបានឡើយ។ កាលពីដំណាច់ខែមករារដ្ឋមន្ត្រីការបរទេសបារាំង លោកJEAN YVES LE DRIAN ធ្លាប់គំរាមអីុរ៉ង់ថា នឹងដាក់ទណ្ឌកម្មនានាប្រសិនអីុរ៉ង់ពុំបោះបង់ចោលជាពិសេសផលិតកម្មមីស៊ីលរបស់ខ្លួន៕
ចែករំលែកព័តមាននេះ