ខេត្តកណ្តាល ៖ ពិតជារងកម្មណាស់ សម្រាប់ស្ត្រីដែលមានប្តីប្រចណ្ឌ ហើយតែងតែរងការវាយដំដោយសារតែភ្លើងប្រចណ្ឌនេះ ។ តើអាចឆ្លើយបានទេថា ការប្រចណ្ឌមកពីស្រឡាញ់ខ្លាំងឬបែបណា ? បើនិយាយបែបនេះ ក៏មិនត្រឹមត្រូវដែរ ព្រោះមិនមែនតែអ្នកប្រចណ្ឌទេដែលស្រឡាញ់ប្រពន្ធ បុរសដែល
មិនប្រចណ្ឌប្រពន្ធក៏ស្រឡាញ់ដូចគ្នាដែរ ។
រឿងរ៉ាវវាយដំប្រពន្ធដោយសារតែការប្រចណ្ឌយ៉ាងងប់ងុល ទីបំផុតបុរសជាប្តីបានត្រូវនគរបាលចាប់វាយខ្នោះកាលពីថ្ងៃទី៦ ខែកុម្ភៈ វេលាម៉ោង៥និង៣០នាទីល្ងាច នៅភូមិចុងកោះ ឃុំកោះឧកញ៉ាតី ស្រុកខ្សាច់កណ្តាល ។
ស្ត្រីជាប្រពន្ធឈ្មោះ ផល សុខេង អាយុ៤០ឆ្នាំ ជាចុងភៅនៅភោជនីយដ្ឋាន មានទីលំនៅក្នុងភូមិ ឃុំខាងលើ បានរងរបួសពកក្បាល ជាំថ្ពាល់ខាងស្តាំ និងជាំភ្នែកខាងស្តាំ ។ ឯបុរសជាប្តីដែលប្រើអំពើហិង្សាឈ្មោះ ជៀម គឹមជាអាយុ៤០ឆ្នាំដូចគ្នា ជាជាងសំណង់ ។ នគរបាលស្រុកខ្សាច់កណ្តាលបានឲ្យដឹងថា កន្លងមកបុរសជាប្តីរូបនេះ ធ្លាប់ប្រើអំពើហិង្សាលើប្រពន្ធជាច្រើនលើកមកហើយ និងធ្លាប់ធ្វើកិច្ចសន្យាអប់រំនៅប៉ុស្តិ៍នគរបាលចំនួន១លើក ។
នៅថ្ងៃទី៦ ខែកុម្ភៈ វេលាម៉ោង៥ និង៣០នាទីល្ងាច ខណៈប្រពន្ធត្រឡប់មកពីធ្វើការនៅភោជនីយដ្ឋានចំការស្នេហ៍ដល់ផ្ទះវិញ ក៏ត្រូវប្តីស្តីបន្ទោសថា ទៅធ្វើការនៅចម្ការស្នេហ៍សំខាន់ជាងកូនឬ? ឯប្រពន្ធឆ្លើយថា គ្មានអ្វីពាក់ព័ន្ធជាមួយឯងទេ ។ ភ្លាមនោះ បុរសជាប្តីបានស្ទុះទៅវាយប្រពន្ធចំនួន២ដៃ ត្រូវចំមុខបណ្តាលឱ្យហើមជាំ រួចធាក់ចំនួន២ជើងត្រូវពោះ ។
បន្ទាប់មក ជននេះស្ទុះទៅយកកាំបិតខ្វែវវាយក្បាលប្រពន្ធ១ខ្នងកាំបិតទៀត បណ្តាលឲ្យហើមពក ។ ភ្លាមនោះ ប្រពន្ធបានឡើងជិះម៉ូតូរត់មកប្តឹងនគរបាលប៉ុស្តិ៍កោះឧកញ៉ាតី ទើបនគរបាលប៉ុស្តិ៍ទៅឃាត់ខ្លួនបុរសជាប្តីរូបនេះបញ្ជូនទៅអធិការដ្ឋាននគរបាលស្រុក ដើម្បីបន្តចាត់ការតាមនីតិវិធី ៕
ចែករំលែកព័តមាននេះ