នាយក្តឹបបានអំណោយលើកទី២ពីកាកបាទក្រហម
- ភ្នំពេញ
រាជធានីភ្នំពេញ ៖ នៅទីស្នាក់ការកណ្តាល នារសៀលថ្ងៃទី៦ ខែកុម្ភៈ ឆ្នាំ២០១៩ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន…
រាជធានីភ្នំពេញ ៖ នៅទីស្នាក់ការកណ្តាល នារសៀលថ្ងៃទី៦ ខែកុម្ភៈ ឆ្នាំ២០១៩ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ជាប្រធានបានជួបសំណេះសំណាល សួរសុខទុក្ខជាមួយអ្នកស្រីហួន ថាត ពីស្ថានភាពជំងឺរបស់ស្វាមីអ្នកស្រី គឺតារាកំប្លែងជើងចាស់នាយក្តឹបអាយុ៦០ឆ្នាំ មានជំងឺសម្ពាធសរសៃឈាមបេះដូងធ្ងន់ កកឈាមក្នុងខួរក្បាល ទឹកនោមផ្អែម និងទឹកចូលសួត កំពុងសម្រាកព្យាបាលនៅគេហដ្ឋានស្ថិតនៅភូមិខ្ទរ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ ។
នៅក្នុងឱកាសនោះលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ដែលផ្តាំផ្ញើការសួរសុខទុក្ខចំពោះសិល្បករជើងចាស់ធ្លាប់មានទេពកោសល្យ និងបន្សល់ទុកស្នាដៃសិល្បៈកំប្លែងជាច្រើន ។ ជាមួយគ្នានេះលោកជំទាវ បានផ្តាំផ្ញើឱ្យក្រុមគ្រួសារនាយក្តឹប ខិតខំថែទាំសុខភាពស្វាមី ឪពុក ឱ្យបានល្អ ហើយអនុវត្តតាមការណែនាំរបស់គ្រូពេទ្យ និងជូនពរឆាប់បានជាសះស្បើយឡើងវិញ ។
ទន្ទឹមនឹងនេះអ្នកស្រីហួន ថាត និងកូនប្រុសបានសម្តែងក្តីរំភើបឥតឧបមា និងថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ដែលបានយកចិត្តទុកដាក់ គិតគូរជួយសម្រាលទុក្ខលំបាក និងលើកទឹកចិត្តដល់នាយក្តឹប ក៏ដូចជាអ្នកដែលជួបទុក្ខលំបាកទូទៅដោយគ្មានការរើសអើងអ្វីឡើយ ។
អំណោយផ្តល់ជូនលើកទី២នេះ រួមមាន អង្ករ មី ត្រីខ ទឹកដោះគោ ស្ករស ទឹកប្រទាលកន្ទុយក្រពើ ទឹកត្រចៀកកាំ មុង ភួយ សារុង ក្រមា និងប្រាក់មួយចំនួន ៕
ចែករំលែកព័តមាននេះ