រាជធានីភ្នំពេញ ៖ រោងចក្រចំនួន៤ត្រូវបានក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC សម្រេចផ្ដល់វិញ្ញាបនបត្រចុះបញ្ជីជាស្ថាពរ ដែលមានទឹកប្រាក់វិនិយោគសរុបជាង ៣២លានដុល្លារ និងបង្កើតការងារជូនពលរដ្ឋក្នុងស្រុកប្រមាណជាង១.៦០០នាក់ ។…
រាជធានីភ្នំពេញ ៖ រោងចក្រចំនួន៤ត្រូវបានក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC សម្រេចផ្ដល់វិញ្ញាបនបត្រចុះបញ្ជីជាស្ថាពរ ដែលមានទឹកប្រាក់វិនិយោគសរុបជាង ៣២លានដុល្លារ និងបង្កើតការងារជូនពលរដ្ឋក្នុងស្រុកប្រមាណជាង១.៦០០នាក់ ។
យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា បានឲ្យដឹងថា ក្រុមហ៊ុនចំនួន៤ដែលត្រូវបានផ្ដល់វិញ្ញាបនបត្រចុះបញ្ជីនេះ ជាប្រភេទរោងចក្រឧស្សាហកម្ម ដែលស្ថិតនៅក្នុងខេត្ត រាជធានីបីផ្សេងគ្នា ក្នុងនោះរួមមាន ៖ ១-ក្រុមហ៊ុន FASHION HOUSEWARE (CAMBODIA) CO.,LTD មានគម្រោងបង្កើតរោងចក្រផលិតសម្ភារក្នុងផ្ទះ គ្រឿងតុបតែងក្នុងពិធីបុណ្យណូអែល សម្ភារសម្រាប់ម៉ាស៊ីនដេរ និងសម្ភារផ្សេងៗទៀត ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ មានទុនវិនិយោគចំនួន១០លានដុល្លារ និងអាចបង្កើតការងារបានចំនួន ៤៦៤កន្លែង ។
២-ក្រុមហ៊ុន TUBAO (CAMBODIA) DECORATION MATERIAL CO.,LTD ដែលមានគម្រោងបង្កើតរោងចក្រផលិតក្តារប៉ាកេ និងក្តារបន្ទះ មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ មានទុនវិនិយោគចំនួន១,៥លានដុល្លារអាមេរិក និងអាចបង្កើតការងារបានចំនួន១០០កន្លែង។ ៣-ក្រុមហ៊ុន ZHONGQI LIHUI CABLE CO.,LTD មានគម្រោងបង្កើតរោងចក្រផលិតខ្សែភ្លើង និងខ្សែកាប មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសយូ ប៊ី អ៊ី ស្នួល ខេត្តក្រចេះ មានទុនវិនិយោគចំនួន២០,១លានដុល្លារអាមេរិក និងអាចបង្កើតការងារបានចំនួន៤៣៩កន្លែង ។
៤-ក្រុមហ៊ុន WINTIME (CAMBODIA) CO.,LTD ។ វាគម្រោងបង្កើតរោងចក្រផលិតដើមណូអែល គ្រឿងលម្អ និងអំពូលភ្លើងលម្អគ្រប់ប្រភេទ មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសមេនហាតធេន ខេត្តស្វាយរៀង មានទុនវិនិយោគប្រមាណ២,៤៣លានដុល្លារ និងអាចបង្កើតការងារបានចំនួន៦៥១កន្លែង ។ គួរកត់សម្គាល់ថា ក្នុងរយៈពេលជាង១ឆ្នាំចុងក្រោយនេះ បើទោះបីជាសហគមន៍ កំពុងពិចារណាលើការដកឬបន្តផ្ដល់EBAដល់កម្ពុជាក៏ដោយក្តី ក៏បណ្ដាវិនិយោគិននានាទាំងក្នុង និងក្រៅស្រុកនៅតែបន្តមកបណ្ដាក់ទុនវិនិយោគនៅក្នុងប្រទេសកម្ពុជា ដោយហេតុផលថា សេដ្ឋកិច្ចកម្ពុជា មានកំណើនរឹងមាំ បូករួមជាមួយនឹងស្ថិរភាពនយោបាយល្អប្រសើរផងដែរ ។
បើតាមលោក សោម អូន ប្រធានសភាសម្ព័ន្ធសហជីពជាតិកម្ពុជា បាននិយាយថា ក្នុងរយៈពេលចុងក្រោយនេះរោងចក្រនៅកម្ពុជា មានបើកមានបិទជាបន្តបន្ទាប់ វាជារឿងធម្មតា ព្រោះការធ្វើអាជីវកម្ម មានខាត និងចំណេញវាគ្មានអីចម្លែកទេ ។ ម្យ៉ាងទៀតទំនាស់ពាណិជ្ជកម្មរវាងមហាអំណាចសេដ្ឋកិច្ច ចិន និងអាមេរិក ក៏បានហុចផលអោយប្រទេសកម្ពុជាមួយចំនួនផងដែរ ។ ជាក់ស្ដែងក្រុមហ៊ុនដែលធ្លាប់ផលិតទំនិញនៅក្នុងប្រទេសចិន នាំចេញទៅកាន់សហរដ្ឋអាមេរិក នឹងបង្វែរទៅរកប្រទេសណាដែលមិនជាប់ពាក់ព័ន្ធនឹងបម្រាមរបស់សហរដ្ឋអាមេរិក ក្នុងនោះកម្ពុជា ក៏ជាប្រទេសសក្ដានុពលក្នុងការទាក់ទាញមួយ ជាមួយនឹងប្រាក់ឈ្មួលក៏នៅកម្រិតទាបជាងនៅប្រទេសចិនផងដែរ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ ក៏បានលើកឡើងកន្លងមកថា ដល់ពេលដែលកម្ពុជា ត្រូវពិពិធកម្មពីការផលិតរបស់ដែលមានតម្លៃទាបទៅរករបស់ដែលមានតម្លៃខ្ពស់ ក្នុងពេល EBA ស្ថិតនៅភាពមិនច្បាស់លាស់ ៕
ចែករំលែកព័តមាននេះ