ទីក្រុងគួឡាឡាំពួ ៖ កំណើននៃតម្រូវការទុរេនក្នុងប្រទេសចិន ត្រូវបានស្តីបន្ទោសថា ជាមូលហេតុបង្កឲ្យមានការបាត់បង់ព្រៃឈើយ៉ាងច្រើនក្នុងប្រទេសម៉ាឡេស៊ី ព្រោះប្រជាជនត្រូវការដីសម្រាប់ការដាំដុះ ។
យោងតាមសារព័ត៌មាន Channel NewsAsia បានឲ្យដឹងកាលពីថ្ងៃទី៦ កុម្ភៈ កន្លងមកថា កសិករដាំដុះទុរេនក្នុងប្រទេសម៉ាឡេស៊ីកំពុងតែងាកចេញពីការដាំដុះទ្រង់ទ្រាយតូចទៅទ្រង់ទ្រាយធំវិញ ដែលបង្កឲ្យអ្នកការពារបរិស្ថានព្រមានថា អាចនឹងប៉ះពាល់ដល់ព្រៃឈើធ្ងន់ធ្ងរ ។
អ្នកស្រី Sophine Tann ដែលមកពីក្រុមការពារបរិស្ថាន PEKA បាននិយាយថា ៖«បច្ចុប្បន្ននេះផ្លែទុរេនបានទទួលចំណាប់អារម្មណ៍យ៉ាងខ្លាំងពីទីផ្សារប្រទេសចិន។ ការកាប់ព្រៃឈើដើម្បីដាំដុះទុរេនគឺកើតមានឡើងដើម្បីត្រៀមផ្គត់ផ្គង់តាមតម្រូវការ »។
ដោយតម្លៃប្រេងដូងម៉ាឡេស៊ីបន្តធ្លាក់ចុះជាបន្តបន្ទាប់ កសិករចាប់ផ្តើមងាកទៅកាន់ដំណាំទុរេនវិញ ។ ចំណែករដ្ឋាភិបាលក៏បានគាំទ្រដល់ការលូតលាស់វិស័យនេះផងដែរដើម្បីទាញអត្ថប្រយោជន៍ពីទីផ្សារក្នុងប្រទេសចិន ។
យោងតាមក្រសួងកសិកម្មរបស់ប្រទេសនេះ បានឲ្យដឹងថា ការនាំចេញផ្លែទុរេនពីម៉ាឡេស៊ីទៅកាន់ប្រទេសចិនក្នុងអំឡុងពេល៨ខែដំបូងនាឆ្នាំ២០១៨ បានកើនដល់១,៨លានដុល្លារ ច្រើនជាងពេលតែមួយនៅឆ្នាំ២០១៧ ស្ទើរតែទ្វេដងទៅហើយ ។
ម៉ាឡេស៊ីសង្ឃឹមថា កិច្ចព្រមព្រៀងដែលបានសម្រេចនៅខែសីហាដើម្បីនាំចេញទុរេនទៅកាន់ប្រទេសចិន នឹងបង្កើនការនាំចេញ ហើយពួកគែមានគោលដៅប្រមូលទិន្ននផលទុរេនឲ្យបានប្រមាណ៤៤,៣ម៉ឺនតោនផងដែរក្នុងឆ្នាំ ២០៣០ ។
យ៉ាងណាក្តី ក្រសួងកសិកម្មបានអះអាងថា ការដាំដុះនឹងត្រូវបានពង្រីកបន្តិចម្តង ហើយបានបន្ថែមថា ពួកគេបានជំរុញដល់កសិករឲ្យប្រើចម្ការដែលមានស្រាប់ ៕
ចែករំលែកព័តមាននេះ